សម្ដេចក្រឡាហោម កោតសរសើរ និងវាយតម្លៃខ្ពស់ ចំពោះក្រុមប្រឹក្សានីតិកម្ម ដែលខិតខំបំពេញភារកិច្ច ធ្វើឲ្យសម្រេចបានសមិទ្ធផលការងារ ជាច្រើនគួរឱ្យកត់សម្គាល់

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសម្ដែងការកោតសរសើរ និងវាយតម្លៃខ្ពស់ចំពោះឯកឧត្តម លោកជំទាវជាថ្នាក់ដឹកនាំ និងអស់លោក លោកស្រីជាមន្រ្តីនៃក្រុមប្រឹក្សានីតិកម្មដែលបានខិតខំប្រឹងប្រែងបំពេញភារកិច្ចរបស់ខ្លួនប្រកបដោយការទទួលខុសត្រូវខ្ពស់ ធ្វើឱ្យសម្រេចបានសមិទ្ធផលការងារជាច្រើនគួរឱ្យកត់សម្គាល់ ដើម្បីរួមចំណែកសម្រេចបានតាមគោលនយោបាយរបស់រាជរដ្ឋាភិបាលកម្ពុជា។

ក្នុងពិធីប្រកាសចូលកាន់មុខតំណែង របស់ប្រធានក្រុមប្រឹក្សានីតិកម្ម និងប្រធាននាយកដ្ឋានរដ្ឋបាលសរុប នៃក្រុមប្រឹក្សានីតិកម្មក្រសួងមហាផ្ទៃ នាថ្ងៃទី២៦ ធ្នូនេះ សម្ដេចក្រឡាហោម ស ខេង បានមានប្រសាសន៍បង្ហាញអំពីការកត់សម្គាល់ចំពោះលទ្ធផលការងាររបស់ក្រុមប្រឹក្សានីតិកម្មនៃក្រសួងមហាផ្ទៃ ពិសេសនៅក្នុងដំណើរការការតាក់តែងច្បាប់ និងលិខិតបទដ្ឋានគតិយុត្តនានាដែលពាក់ព័ន្ធនឹងសមត្ថកិច្ចរបស់ក្រសួងមហាផ្ទៃ ដែលក្នុងនោះ សម្ដេចអះអាងថាការងារទាំងនេះបានរួមចំណែកយ៉ាងសំខាន់ក្នុងការងារកំណែទម្រង់ច្បាប់ និងប្រព័ន្ធយុត្តិធម៌នៅកម្ពុជា។

សម្ដេចក្រឡាហោម បានមានប្រសាសន៍ថាក្រសួងមហាផ្ទៃ ក៏មិនខុសពីក្រសួងស្ថាប័នផ្សេងទៀតនោះដែរ សុទ្ធតែមានភារកិច្ចរួមចំណែកក្នុងដំណើរការផ្ដួចផ្ដើម និងតាក់តែងច្បាប់ពាក់ព័ន្ធនានា ក៏ប៉ុន្តែចំណុចពិសេសមួយទៀតគឺទន្ទឹមគ្នានឹងការផ្ដួចផ្ដើមនិងតាក់តែងច្បាប់នោះ ក្រសួងមហាផ្ទៃមានតួនាទី និងភារកិច្ចធានាការអនុវត្តច្បាប់ជាទូទៅ។

នាឱកាសនោះដែរ សម្ដេចឧបនាយករដ្ឋមន្រ្តីបានរម្លឹកឡើងវិញអំពីប្រវត្តិនៃការតាក់តែងច្បាប់ និងលិខិតបទដ្ឋានពាក់ព័ន្ធ ពិសេសក្នុងដំណើរការដឹកនាំ និងគ្រប់គ្រងក្រសួងមហាផ្ទៃ ព្រមទាំងរដ្ឋបាលថ្នាក់ក្រោមជាតិ។ ភ្ជាប់នឹងប្រធានបទនេះ សម្ដេចក៏បានគូសបញ្ជាក់ជាថ្មីអំពីសវតា និងការប្ដេជ្ញាចិត្តរបស់រាជរដ្ឋាភិបាល ក្នុងការងារកំណែទម្រង់រដ្ឋបាលថ្នាក់ក្រោមជាតិ ពិសេសការផ្ទេរមុខងារ ធនធាន និងសិទ្ធិអំណាច ៕