ឧត្តមសេនីយ៍ត្រី កុយ សិរីវុឌ្ឍី សំណេះសំណាល បំពាក់ឋានន្តរសក្តិ និងគ្រឿងឥស្សរិយយស ជូនយោធិនចូលសោធននិវត្តន៍
ភ្នំពេញ៖ នៅបញ្ជាការដ្ឋានរថក្រោះ កងទ័ពជើងគោក បានប្រារព្វពិធី សំណេះសំណាល បំពាក់ឋានន្តរស័ក្តិ និងគ្រឿងឥស្សរិយយស ជូនយោធិនចូលសោធននិវត្តន៍ របស់បញ្ជាការដ្ឋានរថក្រោះ ផ្ទេរចេញពីក្របខណ្ឌក្រសួងការពារជាតិឆ្នាំ២០២២ ស្ថិតក្រោមអធិបតីភាព ឧត្តមសេនីយ៍ត្រី កុយ សិរីវុឌ្ឍី មេបញ្ជាការរង បញ្ជាការដ្ឋានរថក្រោះ ជានាយសេនាធិការ តំណាងដ៏ខ្ពង់ខ្ពស់របស់ ឯកឧត្តម ឧត្តមសេនីយ៍ឯក ពៅ ស៊ីថា មេបញ្ជាការរង កងទ័ពជើងគោក មេបញ្ជាការ បញ្ជាការដ្ឋានរថក្រោះ កងទ័ពជើងគោក ។
ឧត្ដមសេនីយ៍ត្រី កុយ សិរីវុឌ្ឍី បានថ្លែងកោតសរសើរ និងអំណរគុណយ៉ាងជ្រាលជ្រៅបំផុតចំពោះគុណ បំណាច់ដ៏ធំធេងរបស់យោធិនចូលសោធននិវត្តន៍ និងពិការ ដែលបានធ្វើពលិកម្មគ្រប់បែបយ៉ាង ក្នុងការការពារជាតិ បំពេញភារកិច្ចកន្លងមក ចាប់ពីរំដោះប្រទេសជាតិ និងទប់ស្កាត់ការវិលត្រឡប់របបប្រល័យពូជសាសន៍ ជាពិសេសបានចូលរួមយ៉ាងសកម្មជាប្រតិបត្តិករនយោបាយ ឈ្នះ ឈ្នះ ដែលបាននាំមកនូវសុខសន្តិភាពនិងការឯកភាពជាតិពេញលេញនាពេលនេះ។ គំរូវីរភាពដ៏ល្អផូរផង់នេះនឹងបានដិតជាប់ក្នុងក្រអៅបេះដូងអ្នកជំនាន់ក្រោយយ៉ាងពិតប្រាកដ។ ថ្វីត្បិត ឯកឧត្តម អស់លោក លោកស្រីបានចេញពីជួរកងយោធពលខេមរភូមិន្ទ ផ្ទេរទៅក្រសួងសង្គមកិច្ចអតីតយុទ្ធជន និងយុវនីតិសម្បទាក៏ដោយ ក៏ប្រមុខរាជរដ្ឋាភិបាលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅតែបន្តយកចិត្តទុកដាក់គិតគូរជួយដោះស្រាយគ្រប់កាល:ទេស:ដល់បងប្អូនអតីតយុទ្ធជនជានិច្ច។
ក្នុងឱកាសនោះ ឯកឧត្តម ក៏ក្រើនរម្លឹកដល់បងប្អូនយោធិនទាំងអស់ពេលវិលទៅរួមរស់ជាជីវភាពស៊ីវិលវិញត្រូវចូលរួម សហការជាមួយអាជ្ញាធរមូលដ្ឋានឲ្យបានល្អ ចូលរួមអភិវឌ្ឍន៍ប្រទេសជាមួយរាជរដ្ឋាភិបាលកាន់តែរីកចម្រើន។ ត្រូវប្រុងប្រយ័ត្នឱ្យបានខ្ពស់ចំពោះការ ការពារខ្លួន ដើម្បីជៀសឆ្ងាយពីជំងឺកូវីដ-១៩ នឹងត្រូវអនុវត្តន៍ ៣កុំ ៣ការពារ ជាប្រចាំ
ក្នុងពិធីនោះដែរ ឧត្តមសេនីយ៍ត្រី កុយ សិរីវុឌ្ឍី បានអញ្ជើញបំពាក់ឋានន្តរសក្តិ ជូនយោធិនចូលសោធននិវត្តន៍ នឹងគ្រឿងឥស្សរិយយសជូនទាំង ៤នាក់ និងបានប្រគល់ជូនថវិការបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកជំទាវ ក្នុងម្នាក់ៗទទួលបានថវិកាចំនួន ២០០,០០០រៀល និងថវិការបស់អង្គភាពបញ្ជាការដ្ឋាន រថក្រោះ កងទ័ពជើងគោក ក្នុងម្នាក់ៗទទួលបានថវិកាចំនួន ១០០,០០០ រៀល រួមជាមួយគ្រឿងឧបភោគបរិភោគមួយចំនួនផងដែរ ផងដែរ៕
