ភ្នំពេញ៖ កម្លាំងអធិការដ្ឋាននគរបាលស្រុកទឹកផុស នៅថ្ងៃទី៤ ខែវិច្ឆិកា ឆ្នាំ២០២២ វេលាម៉ោង០១ និង៣០នាទីរំលងអាធ្រាត្រ បានធ្វើការឃាត់ខ្លួនជនសង្ស័យចំនួន ២នាក់ ករណីលួចក្របីចំនួន ៤ក្បាល (ញីចំនួន៣ក្បាល និងកូនឈ្មោលចំនួន ១ក្បាល) បានដឹកឡើងរថយន្ត នៅចំនុចព្រែកជីក ស្ថិតក្នុងភូមិអញ្ចាញ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង។
មន្រ្តីនគរបាលស្រុកទឹកផុស បានឲ្យដឹងថា ជនសង្ស័យចំនួន ២នាក់មានឈ្មោះ ១-ឈ្មោះ ម៉េន បាវ ភេទប្រុស អាយុ៣១ឆ្នាំ ។ ២-ឈ្មោះ ឈន ដានឹត ភេទប្រុស អាយុ២៧ឆ្នាំ ។ ជនសង្ស័យទាំង២នាក់ រស់នៅភូមិអណ្តូងតាជោ ឃុំរូង ស្រុកមេមត់ ខេត្តត្បូងឃ្មុំ ។
វត្ថុតាងដកហូតរួមមាន៖ រថយន្តសាំងយ៉ុង ១គ្រឿង (កែឆ្នៃ) ក្របី ៤ ក្បាល ។
បច្ចុប្បន្នជនសង្ស័យ រួមទាំងវត្ថុតាងត្រូវបានកម្លាំងជំនាញស្រុក កសាងសំណុំរឿងបញ្ជូនមកកាន់ការិយាល័យជំនាញ នៃស្នងការដ្ឋាននគរបាលខេត្តចាត់ការបន្តតាមនីតិវិធី៕
