ឧត្តមសេនីយ៍ត្រី អ៊ុ សុភា នាំយកអំណោយ មេបញ្ជាការកងទ័ពជើងគោក ឧបត្ថម្ភដល់អតីតយុទ្ធជនពិការ មានជំងឺប្រចាំកាយ នៅក្នុងស្រុករលាប្អៀរ
ភ្នំពេញ៖ ឯកឧត្តម ឧត្តមសេនីយ៍ត្រី អ៊ុ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង ប្រធានសមាគមអតីតយុទ្ធជនកម្ពុជាខេត្ត នាថ្ងៃទី១២ ខែកញ្ញា ឆ្នាំ២០២២ បានដឹកនាំក្រុមការងារមនុស្សធម៌របស់អង្គភាព នាំយកអង្ករចំនួន ៥០គីឡូក្រាម ស័ង្កសី ៣០សន្លឹក មី ១កេស ត្រីខ ១យួរ អាវរងា១ មុង១ ជែលលាងដៃ ៣ដប រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងទ័ពជើងគោកនិងលោកជំទាវ ឧបត្ថម្ភដល់លោក នុត សុភ័ណ្ឌ ជាអតីតយុទ្ធជនពិការ មានជំងឺប្រចាំកាយ ត្រូវប្រពន្ធរត់ចោល និងកំពុងរស់នៅម្នាក់ឯងលើដីរបស់បងប្អូន ស្ថិតក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដើម្បីដោះស្រាយជីវភាពប្រចាំថ្ងៃ និងសម្រាប់ធ្វើបុណ្យ ក្នុងឱកាសបុណ្យកាន់បិណ្ឌ ភ្ជុំបិណ្ឌ នាពេលនេះផងដែរ ។
ស្ថិតក្នុងឱកាសនេះ ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខរបស់ សម្តេចតេជោ នាយករដ្ឋមន្ត្រី ប្រធានសមាគមអតីតយុទ្ធជនកម្ពុជា ក៏ដូចជាឯកឧត្តម មេបញ្ជាការ កងទ័ពជើងគោក និងលោកជំទាវ ដល់លោក នុត សុភ័ណ្ឌ ។ ឯកឧត្តម មេបញ្ជាការ បានបញ្ជាក់ថា សម្តេចតេជោ ប្រធានសមាគម ព្រមទាំង ឯកឧត្តម មេបញ្ជាការ កងទ័ពជើងគោក និងលោកជំទាវ តែងតែគិតគូរពីសុខទុក្ខរបស់បងប្អូនអតីតយុទ្ធជន ទីណាមានបងប្អូនអតីតយុទ្ធជនជួបការលំបាក ទីនោះតែងមានការជួយឧបត្ថម្ភរបស់ សម្តេចតេជោ និង ឯកឧត្តម ហ៊ុន ម៉ាណែត ជានិច្ច ។
ជាចុងក្រោយ លោក នុត សុភ័ណ្ឌ បានគោរពថ្លែងអំណរគុណយ៉ាងជ្រាលជ្រៅជូនចំពោះ សម្តេចតេជោ ប្រធានសមាគមអតីតយុទ្ធជនកម្ពុជា ឯកឧត្តម ហ៊ុន ម៉ាណែត និងលោកជំទាវ ព្រមទាំង ឯកឧត្តម មេបញ្ជាការ តំបន់ប្រតិបត្តិការសឹករងខេត្ត ដែលបានយកចិត្ដទុកដាក់គិតគូរអំពីសុខទុក្ខរបស់ប្រជាពលរដ្ឋ ជាពិសេស បងប្អូនអតីតយុទ្ធជនដែលជួបការលំបាក និងសូមគោរពជូនពរ សម្តេច ឯកឧត្តម លោកជំទាវ និងក្រុមការងារ សូមមានសុខភាពល្អ ប្រកបបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
