ឧត្តមសេនីយ៍ឯក ហ៊ុន ម៉ាណែត និងលោកជំទាវ ឧបត្ថម្ភ អង្ករ និងស័ង្កសី ជូនអង្គភាពកងពលតូចថ្មើរជើងលេខ៥១

ភ្នំពេញ៖ នាថ្ងៃទី១២ ខែកញ្ញា ឆ្នាំ២០២២ អង្ករចំនួន ៣តោន, និងស័ង្កសី ចំនួន ៦០០០សន្លឹក ជាអំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ពេជ ចន្ទមុន្នី ត្រូវបានផ្តល់ជូនអង្គភាព កងពលតូចថ្មើរជើងលេខ៥១ សម្រាប់ចែកជូនដល់គ្រួសារយោធិន និងប្រជាពលរដ្ឋ ដែលមានជីវភាពជួបការលំបាក ជាពិសេសប្រជាពលរដ្ឋរងគ្រោះដោយគ្រោះមហន្តរាយធម្មជាតិផ្សេងៗ។

អំណោយត្រូវបានក្រុមការងារជំនួយការ ឯកឧត្តម មេបញ្ជាការកងទ័ពជើងគោក បានប្រគល់ជូន មេបញ្ជាការ កងពលតូចថ្មើរជើងលេខ៥១ ដើម្បីរក្សាទុក នៅទីបញ្ជាការ កងពល និងបែងចែកមួយចំនួន ជូនតាមអង្គភាពវរសេនាតូច ចំនួន ៣ ឈរជើងនៅជិតបន្ទាត់ព្រំដែនកម្ពុជា-ថៃ ដើម្បីធានាបានជួយប្រជាពលរដ្ឋបានទាន់ពេលវេលា។

លោកឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ ជំនួសមុខឲ្យ នាយទាហាន នាយទាហានរង និងពលទាហាន នៃអង្គភាព កងពលតូចថ្មើរជើងលេខ៥១ សូមគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់គិតគូរដល់សុខទុក្ខ ការរស់នៅ របស់យោធិន គ្រួសារយធិន និងបងប្អូនអតីតយុទ្ធជន សំដៅលើកកម្ពស់គុណភាព ការរស់នៅរបស់កងទ័ពឲ្យកាន់តែប្រសើរ ក៏ដូចជាប្រជាពលរដ្ឋជួបការលំបាក និងជួបគ្រោះមហន្តរាយធម្មជាតិផ្សេងៗ៕