អភិបាលខេត្តកែប ដឹកនាំកិច្ចប្រជុំឆ្លងសេចក្តីព្រាងរបាយការណ៍លទ្ធផលការងារប្រចាំខែសីហា និងលើកទិសដៅអនុវត្តការងារខែបន្ទាប់

ភ្នំពេញ៖ ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប នៅថ្ងៃទី១២ ខែកញ្ញា ឆ្នាំ២០២២ បានដឹកនាំគណៈអភិបាល លោកនាយក នាយករងរដ្ឋបាល ប្រធានមន្ទីរអង្គភាពជុំវិញខេត្ត ទីចាត់ការ អង្គភាពចំណុះរចនាសម្ព័ន្ធសាលាខេត្ត និងអ្នកពាក់ព័ន្ធ ដេីម្បីប្រជុំឆ្លងសេចក្តីព្រាងរបាយការណ៍លទ្ធផលការងារប្រចាំខែសីហា និងលើកទិសដៅអនុវត្តការងារខែបន្ទាប់ ឆ្នាំ២០២២ របស់រដ្ឋបាលខេត្ត នៅសាលប្រជុំធំសាលាខេត្តកែប ។

បន្ទាប់ពីលោកនាយករដ្ឋបាលសាលាខេត្ត បានអាននូវរបាយការណ៍លទ្ធផលការងារប្រចាំខែសីហា និងលើកទិសដៅអនុវត្តការងារខែបន្ទាប់ ឆ្នាំ២០២២ របស់រដ្ឋបាលខេត្តរួចមក ឯកឧត្តមបណ្ឌិត សោម ពិសិដ្ឋ អភិបាល នៃគណអភិបាលខេត្ត បានលេីកឡេីងពីបញ្ហាប្រឈម ដែលត្រូវស្វែងរកដំណោះស្រាយសមស្រប តាមលក្ខណ ច្បាប់ សម្រាប់មន្ទីរអង្គភាពជំនាញជុំវិញខេត្ត សម្រាប់ ធ្វេីការដោះស្រាយបន្ត ។

លេីសពីនេះឯកឧត្តមបណ្ឌិត មានប្រសាសន៍ណែនាំបន្ថែមទៀតថា បញ្ហាប្រឈមត្រូវតែដោះស្រាយឱ្យបានទាន់ពេលវេលា និងបានដាក់ចេញនូវគោលការណ៍សំខាន់ៗ មួយចំនួនមានដូចជា ពង្រឹងការផ្សព្វផ្សាយអំពីសកម្មភាពអភិវឌ្ឍន៍មូលដ្ឋានឱ្យបានទូលំទូលាយ គ្រប់មន្ទីរអង្គភាពទាំងអស់ត្រូវតែមាន ប្រព័ន្ធផ្សព្វផ្សាយផ្លូវការ ។ ក្នុងឱកាសបុណ្យភ្ជុំបិណ្ឌនេះ គ្រប់ទីវត្តអារាម ត្រូវមានរៀបចំឱ្យបានស្អាត គិតគូរពីសុវត្តិភាព នៃការរីករាយដាលនៃជំងឺកូវីដ-១៩ ផងដែរ៕