ឧត្តមសេនីយ៍ឯក ឯក សំអូន និងឯកអគ្គរដ្ឋទូតវៀតណាម អញ្ជើញសម្ពោធដាក់ឱ្យប្រើប្រាស់អគារព្រះវិហារ រក្សាទុកអដ្ឋិធាតុកងទ័ពស្ម័គ្រចិត្តវៀតណាម

ភ្នំពេញ៖ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរង កងទ័ពជើងគោក មេបញ្ជាការ យោធភូមិភាគទី៥ និងឯកឧត្ដម ង្វៀន ហ៊ុយថាំង (H.E NGUYEN HUY TANG) ឯកអគ្គរដ្ឋទូត នៃសាធារណរដ្ឋសង្គមនិយមវៀតណាម ប្រចាំកម្ពុជា នាព្រឹកថ្ងៃទី១០ ខែកញ្ញា ឆ្នាំ២០២២ បានអញ្ជើញសម្ពោធដាក់ឱ្យប្រើប្រាស់អគារព្រះវិហារ សម្រាប់រក្សាទុកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅលើទឹកដីកម្ពុជា ក្នុងភូមិសាស្ដ្រខេត្តបាត់ដំបង នៅទីបញ្ជាការ តំបន់ប្រតិបត្តិការសឹករងបាត់ដំបង។

អញ្ជើញចូលរួមក្នុងពិធីនេះរួមមាន មេបញ្ជាការ មេបញ្ជាការរង តំបន់សឹកប្រតិបត្តិការសឹករងបាត់ដំបង ឯកឧត្តម អគ្គកុងស៊ុល នៃសាធារណរដ្ឋសង្គមនិយមវៀតណាម ប្រចាំខេត្តបាត់ដំបង ខេត្តព្រះសីហនុ, សេនានុព័ន្ធរង យោធានៃសាធារណរដ្ឋសង្គមនិយមវៀតណាម ប្រចាំកម្ពុជា, លោកប្រធាន ការងារក្រុមរុករក ជីកគាស់អដ្ឋិធាតុ K73, លោកអគ្គនាយក ក្រុមហ៊ុនមិត្តហ្វូន (Metfone), លោកអគ្គនាយក ធនាគារ អឹម ប៊ី (MB), លោកមេបញ្ជាការ តំបន់ប្រតិបត្តិការសឹករង ប៉ៃលិន ព្រមទាំងលោក លោកស្រី មេបញ្ជាការរង នាយសេនាធិការរង នាយ នាយរង ការិយាល័យ ផ្នែក តំបន់ប្រតិបត្តិការសឹករង បាត់ដំបង និងបុគ្គលិក ក្រុមហ៊ុនមិត្តហ្វូនខេត្តបាត់ដំបងជាច្រើនរូបផងដែរ៕