បច្ចេកវិទ្យា ICT កំពុងត្រូវបានបញ្ជ្រាបទៅដល់គណៈគ្រប់គ្រង និងគ្រូបង្រៀនពហុភាសាជនជាតិដើមភាគតិច

ភ្នំពេញ៖ ក្នុងគោលដៅចូលរួមលើកកម្ពស់គុណវុឌ្ឍិគណៈគ្រប់គ្រងសាលារៀន និងគ្រូបង្រៀនថ្នាក់អប់រំពហុភាសាជនជាតិដើមភាគតិចកម្រិតបឋមសិក្សា ឱ្យទទួលបានបំណិន និងសមត្ថភាពអប់រំបែបឌីជីថល ក្នុងបរិបទបដិវត្តន៍ឧស្សាហកម្ម ៤.០ ក្រសួងអប់រំ យុវជន និងកីឡា នាថ្ងៃទី៩ កញ្ញា បានរៀបចំវគ្គបណ្ដុះបណ្ដាលស្ដីពី មូលដ្ឋានគ្រឹះនៃការប្រើប្រាស់បច្ចេកវិទ្យាព័ត៌មាន និងសារគមនាគមន៍ ជូនដល់សិក្ខាកាមចំនួន ១៦៨នាក់ ស្រី ៥៤នាក់ ដោយសិក្ខាកាមទាំងនោះអញ្ជើញមកពីស្រុកវឺនសៃ អូរជុំ កូនមុំ បរកែវ និងលំផាត់ ខេត្តរតនគិរី និងស្រុកសៀមប៉ាង និងសេសាន ខេត្តស្ទឹងត្រែង។

វគ្គបណ្ដុះបណ្ដាលនេះ ត្រូវបានសហការរៀបចំដោយនាយកដ្ឋានអប់រំពិសេស និងនាយកដ្ឋានបច្ចេកវិទ្យាព័ត៌មាន នៃក្រសួងអប់រំ យុវជន និងកីឡា គាំទ្រថវិកាដោយមូលនិធិអង្គការសហប្រជាជាតិដើម្បីកុមារ UNICEF ។ ក្រសួងអប់រំ យុវជន និងកីឡា នឹងបន្តរៀបចំវគ្គបណ្ដុះបណ្ដាលនេះ ជូនដល់គ្រូបង្រៀនថ្នាក់អប់រំពហុភាសានៅខេត្តដទៃទៀតនាពេលខាងមុខ។

ការដំណើរការវគ្គបណ្ដុះបណ្ដាលនេះ លោកគ្រូ អ្នកគ្រូបង្រៀនថ្នាក់អប់រំពហុភាសា និងគណៈគ្រប់គ្រងសាលារៀន បានខិតខំប្រឹងប្រែង និងយកចិត្តទុកដាក់ខ្ពស់លើការសិក្សារៀនសូត្រជំនាញបច្ចេកវិទ្យាព័ត៌មាន ព្រមទាំងបានប្ដេជ្ញាប្រើប្រាស់សម្ភារបច្ចេកវិទ្យាឱ្យបានទូលំទូលាយក្នុងសហគមន៍ បង្រៀនដល់សិស្ស បង្កើនការសិក្សាស្រាវជា្រវ ដើម្បីធានាថាកុមារជនជាតិដើមភាគតិចអាចបន្ដការសិក្សានៅកម្រិតមធ្យមសិក្សា និងឧត្ដមសិក្សា ព្រមទាំងអាចចូលរួមអភិវឌ្ឍសង្គមសេដ្ឋកិច្ចប្រទេសកម្ពុជា និងសកលលោកប្រកបដោយចីរភាព។

សូមជម្រាបថា ក្រសួងអប់រំ យុវជន និងកីឡា បាន និងកំពុងអនុវត្តកម្មវិធីអប់រំពហុភាសាចាប់ពីមត្តេយ្យសិក្សា ដល់ថ្នាក់ទី៣ លើភាសាព្នង ទំពួន គ្រឹង ព្រៅ កាវ៉ែត កួយ ចារាយ កាចក់ លុន ក្រោល ជាស្ពានចម្លងពីការរៀនភាសាកំណើតទៅភាសាជាតិសម្រាប់កុមារជនជាតិដើមភាគតិចក្នុងតំបន់ភូមិភាគឦសាន ឱ្យទទួលការអប់រំប្រកបដោយ គុណភាព សមធម៌ និងបរិយាបន្ន៕