ទិវាអក្ខរកម្ម ៨កញ្ញា ឆ្នាំ២០២២នេះ ប្រព្រឹត្តទៅក្រោមប្រធានបទ «អក្ខរកម្មជាស្ពាន ឆ្ពោះទៅរកជំនាញមុខរបរ ក្នុងការសិក្សាបន្ត»

ទិវាអក្ខរកម្ម៨កញ្ញា ឆ្នាំ ២០២២នេះ ប្រព្រឹត្តទៅក្រោមប្រធានបទ «អក្ខរកម្មជាស្ពាន ឆ្ពោះទៅរកជំនាញមុខរបរ ក្នុងការសិក្សាបន្ត» ក្នុងន័យជំរុញប្រជាពលរដ្ឋកម្ពុជា គ្រប់រូបឱ្យទទួលបានឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ ប្រកប ដោយវិជ្ជាសម្បទា បំណិនសម្បទា ចរិយាសម្បទា និងគុណសម្បទា ដើម្បីរួមចំណែកស្តារឡើងវិញ សង្គម សេដ្ឋកិច្ចបន្ទាប់ពីវិបត្តិកូវីដ-១៩។

លោកគួច គូលំអ ប្រធាននាយកដ្ឋានអប់រំក្រៅប្រព័ន្ធ នៃក្រសួងអប់រំយុវជននិង កីឡា មានប្រសាសន៍ថា រាជរដ្ឋាភិបាលបានប្រារព្ធទិវាអក្ខរកម្ម៨កញ្ញាជារៀងរាល់ឆ្នាំ ដើម្បីបំផុសប្រជាពលរដ្ឋកម្ពុជា គ្រប់រូបឱ្យទទួលបានឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ ប្រកប ដោយវិជ្ជាសម្បទា បំណិនសម្បទា ចរិយាសម្បទា និងគុណសម្បទា ។

លោកបានបញ្ជាក់ថា ក្រសួងអប់រំយុវជននិងកីឡា បានយកចិត្តទុកដាក់ក្នុងការបង្រៀនអក្ខរកម្ម ពីព្រោះមានសារសំខាន់សម្រាប់អនក្ខរជនទូទៅ ហើយបច្ចុប្បន្នកម្មវិធីបង្រៀនអក្ខរកម្ម កំពុងតែពង្រឹងបន្ថែមនៅតាមបណ្តា រាជធានី ខេត្ត ក្រុងនៅទូទាំងប្រទេស ដើម្បីកាត់បន្ថយអនក្ខរជន ដើម្បីឱ្យសិស្សរៀនអក្ខរកម្មអាចបន្តការសិក្សាទៅថ្នាក់មធ្យមសិក្សាឬចូលសិក្សាជំនាញណាមួយដែលខ្លួនចង់បាន។

លោកបន្តទៀតថា កម្មវិធីអក្ខរកម្ម ក្រៅពីបានផ្តោតការបង្រៀនទៅលើអនក្ខរជននៅទីជនបទហើយ ក៏បានផ្តោតការបង្រៀនទៅលើកម្មករ កម្មការិនី នៅតាមរោងចក្រ សហគ្រាស ទូទាំងប្រទេស ដែលចង់រៀនអក្ខរកម្មនេះ ដើម្បីយកចំណេះដឹងទៅអនុវត្តក្នុងជីវភាពប្រចាំថ្ងៃ ខណៈតាមរយៈកម្មវិធីបង្រៀនអក្ខរកម្មរបស់ក្រសួង ក្នុងមួយឆ្នាំមានអនក្ខរជនប្រមាណជាង១៧,០០០នាក់ បានចូលរៀន និងប្រមាណជាង១៤,០០០បានបញ្ចប់ដោយជោគជ័យ។
ពីដើមកម្មវិធីអក្ខរកម្មយើង ចប់ហ្នឹងគឺស្មើត្រឹមថ្នាក់ទី៤ទេ អ៊ីចឹងអ៊ីចឹងគាត់ចង់ចូលរៀននៅមធ្យម សិក្សាបឋមភូមិអត់បានទេ ចង់រៀនតទៀតអត់បានហើយចូលរៀនជំនាញអីក៏រាងស្ទើរដែរ ដល់ឥឡូវនេះកម្មវិធីយើងខំប្រឹងធ្វើបច្ចុប្បន្នកម្ម កម្មវិធីហ្នឹង អ្នកដែលរៀនចប់គឺស្មើនិងថ្នាក់ទី៦ អ៊ីចឹងស្មើថ្នាក់ទី៦ គាត់ចេះរាងគ្រាន់បើបន្តិច ស្មើនិងចប់បឋមសិក្សាហើយ អ៊ីចឹងនៅក្នុងកម្មវិធីអក្ខរកម្មហ្នឹងគេមានដាក់កម្មវិធីអប់រំសុខភាព កម្មវិធីអំពើហិង្សាក្នុងហ្នឹង កម្មវិធីចរាចរណ៍ ហើយជំងឺផ្សេងៗអី ហើយអ្នកដែលរៀនចប់មិនត្រឹមតែចេះអាន ចេះសរសេរ ចេះគិត លេខទេ គាត់អាចជួយដោះ ស្រាយបញ្ហាផ្ទាល់ខ្លួន របស់គាត់នៅក្នុងគ្រួសារបាន ហើយគាត់អាចរៀនមុខជំនាញផ្សេងៗបាន នេះជាកម្មវិធីថ្មីរបស់យើង។

សូមជម្រាបផងដែរថា ទិវាអក្ខរកម្ម៨កញ្ញា ឆ្នាំ២០២២ នេះ គ្រោងនឹងប្រារព្ធទិវានេះ នៅក្នុងខេត្តបន្ទាយមានជ័យ ក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ៕ ប្រភព៖ ក្រសួងព័ត៌មាន