អភិបាលខេត្តស្វាយរៀង អញ្ជើញចូលរួមពិធីអបអរសាទរខួបអនុស្សាវរីយ៍លើកទី៥៥ នៃការបង្កើតទំនាក់ទំនងការទូត រវាងកម្ពុជា និងវៀតណាម

ភ្នំពេញ៖ ឯកឧត្ដម ជុំ ហាត ប្រធានក្រុមប្រឹក្សាខេត្ត និងឯកឧត្ដម ម៉ែន វិបុល អភិបាលខេត្តស្វាយរៀងនៅថ្ងៃទី០៦ ខែកញ្ញា ឆ្នាំ២០២២នេះ បានអញ្ជើញចូលរួមក្នុងពិធីអបអរសាទរខួបអនុស្សាវរីយ៍លើកទី៥៥ នៃការបង្កើតទំនាក់ទំនងការទូត រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម (២៤.០៦.១៩៦៤-២៤.០៦.២០២២ ) រវាងខេត្ត ស្វាយរៀង ខេត្តព្រៃវែង ខេត្តត្បូងឃ្មុំ និងខេត្តកំពង់ចាម ដែលប្រារព្ធធ្វើនៅខេត្តតៃនិញប្រទេសវៀតណាម ។

ឯកឧត្តម អភិបាលខេត្តបានថ្លែងថា ក្នុងនាមអាជ្ញាធរខេត្តស្វាយរៀងសូមសម្តែងនូវការចូលរួមអបអរសាទរក្នុងឱកាសរំលឹកខួបអនុស្សាវរីយ៍លើកទី៥៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងអបអរសាទរផងដែរជាមួយប្រជាពលរដ្ឋបក្ស និងរដ្ឋ នៃខេត្តតៃនិញ ក្នុងឱកាសខួបលើកទី៧៧ នៃទិវាបុណ្យឯករាជ្យជាតិវៀតណាម ថ្ងៃទី០២ ខែកញ្ញា ឆ្នាំ១៩៤៥-២០២២ និងសូមប្រសិទ្ធពរបវមហា ប្រសើរគ្រប់ប្រការជូនឯកឧត្ដម លោកជំទាវ លោក លោកស្រី ថ្នាក់ ដឹកនាំ កម្មាភិបាល យុទ្ធជន យុទ្ធនារី និងប្រជាជនវៀតណាម ជាពិសេសប្រជាជនខេត្តតៃនិញ ទាំងមូល សូមឲ្យសម្រេច បាននូវលទ្ធផលដ៏ត្រចះចង់ថែមទៀត ទាំងក្នុងកិច្ចការកសាងជីវភាព គ្រួសារ និងសង្គមជាតិ សម្បូរសប្បាយជានិច្ចនិរន្តរ៍តរៀងទៅ ។

ឯកឧត្តមបន្តថា ការសហការរៀបចំពិធីដ៏មានសារៈសំខាន់នៅថ្ងៃនេះ ដោយមានផ្សារភ្ជាប់ជាមួយនឹងសកម្មភាពផ្លាស់ប្ដូរវប្បធម៌ សិល្បៈ កីឡា និងការតាំងពិព័រណ៍ផលិតផលតំបន់របស់បណ្ដាខេត្ត នីមួយៗ គឺមិនត្រឹមតែបានឆ្លុះបញ្ចាំងឲ្យឃើញពីមិត្តភាពដ៏ជិតស្និទ្ធ និងកិច្ចសហប្រតិបត្តិការ ដ៏រឹងមាំរវាងប្រទេសយើងទាំងពីរ ក៏ដូចជាខេត្ត យើងទាំងសងខាងរួមគ្នាកសាង និងសម្រេចបានកន្លងមកប៉ុណ្ណោះទេ ប៉ុន្តែក៏បានបង្ហាញពីឆន្ទៈដ៏ម៉ឺងម៉ាត់មុតស្រួច ច្បាស់លាស់ និង ខ្លាំងក្លា ក្នុងការចូលរួមបន្តពូនជ្រំនូវប្រពៃណីទំនាក់ទំនងសាមគ្គីភាព មិត្តភាពជាបងប្អូនល្អ សហប្រតិបត្តិការ លើគ្រប់វិស័យ រឹងមាំ គង់វង្ស យូរអង្វែង។

ឯកឧត្តមបន្ថែមថា ក្នុងរយៈពេល ៥៥ឆ្នាំកន្លងមកនេះ ប្រទេសយើងទាំងពីរកម្ពុជា-វៀតណាម បានឆ្លងកាត់នូវដំណាក់កាល ជាប្រវត្តិសាស្ត្រជាច្រើន ដោយបានជួយគាំទ្រគ្នាទៅវិញទៅមក ដើម្បីបុព្វហេតុឯករាជ្យ អធិបតេយ្យភាព បូរណភាព និងការអភិវឌ្ឍ ។ បច្ចុប្បន្នប្រជាជន បណ្ដាខេត្តជាប់ព្រំដែន និងប្រទេសយើងទាំងពីរ បាននិងកំពុងសប្បាយរីករាយ ដោយការពេញចិត្ត ចំពោះ វឌ្ឍនភាព នៃទំនាក់ទំនងដ៏ល្អប្រសើរលើគ្រប់វិស័យ ដែលបានផ្ដល់ផលប្រយោជន៍ ទៅវិញទៅមកដល់ការរីកចម្រើនផ្នែកសង្គម សេដ្ឋកិច្ច នាំមកនូវការអភិវឌ្ឍ និងវិបុលភាពរួមដ៏ត្រចះត្រចង់។

ឯកឧត្តមបញ្ជាក់ថា តាមរយៈមនុញ្ញផលដែលកើតចេញពីទំនាក់ទំនងការទូតដ៏ល្អពិសិដ្ឋរវាងប្រទេសយើងទាំងពីរកម្ពុជា-វៀតណាម ក្នុងរយៈពេល ៥៥ឆ្នាំមកនេះ ជាពិសេសក្រោមការដឹកនាំដ៏ត្រឹមត្រូវរបស់រដ្ឋាភិបាលប្រទេសទាំងពីរ កម្ពុជា-វៀតណាម ក៏ដូចជាបណ្តាខេត្តជាប់ព្រំដែនពិតជារួមគ្នារក្សា បណ្ដុះ និងពូនជ្រំនូវចំណងទំនាក់ទំនងដ៏ថ្លៃថ្លា ក្នុងភាពជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យ កាន់តែមានភាព ខ្លាំងក្លា មានប្រសិទ្ធភាពជាក់ស្ដែង និងរឹតតែល្អប្រសើរទ្វេរឡើងថែមទៀត ដែល ជាកាលានុវត្តភាពក្នុងការជំរុញកំណើនសេដ្ឋកិច្ច និងការអភិវឌ្ឍតាមតំបន់ព្រំដែន ប្រកបដោយ សន្តិភាព មិត្តភាព ភាតរភាព និងចីរភាព៕