អភិបាលខេត្តកណ្ដាល៖ ករណីវិវាទដីធ្លីក្នុងខេត្តកណ្ដាលសរុប ៤៦២ករណី ដោះស្រាយបញ្ចប់បាន ១៤១ ករណី និងកំពុងដំណើរការដោះស្រាយ ៣២១ ករណី

ភ្នំពេញ៖ ឯកឧត្តម គង់ សោភ័ណ្ឌ អភិបាលខេត្តកណ្តាល បានឲ្យដឹងថា គិតមកដល់ខែសីហា ករណីវិវាទដីធ្លីក្នុង ខេត្តកណ្ដាលសរុប ៤៦២ករណី ដោះស្រាយបញ្ចប់បាន ១៤១ ករណី និងកំពុងដំណើរការដោះស្រាយ ៣២១ ករណី។

ថ្លែងនៅក្នុងជំនួបពិភក្សាការងារជាមួយ ប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា នៅថ្ងៃទី៥ ខែកញ្ញា ឆ្នាំ២០២២ ឯកឧត្តម គង់ សោភ័ណ្ឌ បានឲ្យដឹងថា ការងារចុះបញ្ជីដីរដ្ឋក្នុងខេត្ត បានសរុបចំនួន ១២,២៧៤ ហិកតា ក្នុងនោះ រាជរដ្ឋាភិបាលបានសម្រេចជា គោលការណ៍ប្រគល់សិទ្ធិជូនក្រុមហ៊ុនធ្វើការជួល និងដោះដូរដើម្បីវិនិយោគ ចំនួន ១៦ កន្លែង ស្មើនឹង ៥,៧៩៥ ហិកតា ដើម្បីលើកកម្ពស់សេដ្ឋកិច្ច និងការអភិវឌ្ឍន៍ នៅមូលដ្ឋាន។

ឯកឧត្តមបបន្តថា ការចុះបញ្ជីដីធ្លីមានលក្ខណៈជាប្រព័ន្ធ សរុបតាំងពីចាប់ផ្តើមអនុវត្តសម្រេចបាន ៥៦៩ភូមិ លើ ១០១០ភូមិ ស្មើ ៥៧% និងនៅសល់ ៤៤១ភូមិ ស្មើនឹង ៤៣% ដែលគ្រោងបញ្ចប់ នៅ ឆ្នាំ២០២៩ ហើយបច្ចុប្បន្ន នេះក្រុមការងារមន្ទីរ ១០ក្រុម កំពុងដំណើរការអនុវត្ត ចំនួន ៦៩ភូមិ លើ ៤៤១ភូមិ ដែលនៅសល់ ០៩ស្រុក។ ដោយឡែក ស្រុកកណ្ដាលស្ទឹង បានបញ្ចប់ ការចុះ បញ្ជីជាប្រព័ន្ធជាស្ថាពរ និងក្រុងតាខ្មៅ កំពុងសំអាតទិន្នន័យ។ បានចែកប័ណ្ណសរុប ២១,៣៩៧ក្បាលដី (សរុបតាំងពីចាប់ផ្តើមអនុវត្តបាន ២៤៤,៥៩៣ប័ណ្ណ)។ ការចុះបញ្ជីដី មានលក្ខណៈដាច់ដោយដុំ បានចេញប័ណ្ណ ចំនួន ៦,៧៦៧ ប័ណ្ណ (សរុប តាំងពីចាប់ផ្តើមអនុវត្តបាន ១៨០,៣៤៤ ប័ណ្ណ)។

ពាក់ព័ន្ធនឹងលទ្ធផលនៃការដោះស្រាយករណីវិវាទដីធ្លីក្នុងខេត្ត ឯកឧត្តមអភិបាលបានបញ្ជាក់ថា គិតមកដល់ខែសីហា ឆ្នាំ២០២២ នេះ ករណ៏ដីធ្លីទូទាំងខេត្ត សរុបចំនួន ៤៦២ ករណី ដោះស្រាយបញ្ចប់បានចំនួន ១៤១ ករណី និងកំពុងដំណើរការដោះស្រាយ ចំនួន ៣២១ ករណី។

នាឱកាសនោះដែរ ឯកឧត្តម សរ ចំរុង ប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនង រដ្ឋសភា ព្រឹទ្ធសភា នៃរដ្ឋសភា បានថ្លែងនូវការកោតសរសើរ និងវាយតម្លៃខ្ពស់ ចំពោះការដោះស្រាយ បញ្ហាប្រឈមនានា ពាក់ព័ន្ធយន្តការដោះស្រាយករណីទំលាស់ដីធ្លី ដែលសម្រេចបានលទ្ធផលយ៉ាងល្អប្រសើរ ធ្វើឱ្យជីវភាពរស់នៅរបស់ប្រជាពលរដ្ឋធូធារ កាត់បន្ថយភាពក្រីក្រ ជាពិសេស ឯកឧត្តមក៏បានជំរុញនិងលើកទឹកចិត្ត ដល់រដ្ឋបាលខេត្ត ត្រូវបន្តខិតខំអនុវត្តការងាររបស់ខ្លួនឱ្យមានកាន់តែប្រសិទ្ធភាពខ្ពស់ ធ្វើឱ្យមានការអភិវឌ្ឍ រីកចម្រើន ខិតខំកសាងឱ្យបាននូវសមិទ្ធផលថ្មីៗជាច្រើនទៀតជូនប្រជាពលរដ្ឋ៕