ក្រសួងបរិស្ថាន ប្រាប់ម្ចាស់គណនីហ្វេសប៊ុក Kaa Official ឲ្យបញ្ឈប់ធ្វើមុខម្ហូប ដែលធ្វើពីសាច់សត្វព្រៃជាបន្ទាន់!

ភ្នំពេញ៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់ម្ចាស់គណនីហ្វេសប៊ុក Kaa Official ឲ្យបញ្ឈប់ការផុសធ្វើមុខម្ហូប ដែលធ្វើពីសាច់សត្វព្រៃជាបន្ទាន់ ។

បើតាមឯកឧត្ដម នេត្រ ភក្ត្រា បានបញ្ជាក់យ៉ាងដូច្នេះថា «សូមជម្រាបជូនដល់ម្ចាស់ទំព័រហ្វេសប៊ុក Kaa Official សូមបញ្ឈប់ការប៉ុស្តិ៍ធ្វើមុខម្ហូបដែលធ្វើពីសាច់សត្វព្រៃជាបន្ទាន់! យោងតាមសម្តីរបស់តួអង្គបុរសនិងស្ត្រីទាំង ២នាក់ក្នុងវីដេអូបានបញ្ជាក់ថា មុខម្ហូបនេះបានយកសត្វក្តាន់ញ៉ែងមកធ្វើ» ។

ឯកឧត្ដមរដ្ឋលេខាធិការ លើកឡើងថា ក្តាន់ញែងជាសត្វព្រៃដែលត្រូវអភិរក្ស ហើយបច្ចុប្បន្ននេះ ក្រសួងបរិស្ថានបាននិងកំពុងដឹកនាំការធ្វើយុទ្ធនាការអន្ទាក់សូន្យដើម្បីបញ្ឈប់ការបរបាញ់ ការដាក់អន្ទាក់ចាប់សត្វព្រៃគ្រប់ប្រភេទ ការផ្លាស់ប្តូរឥរិយាបថជនមួយចំនួនដែលនិយមហូបសាច់សត្វព្រៃឱ្យងាកមកចូលរួមការពារអភិរក្សសត្វព្រៃ និងផ្តល់ជម្រកសុវត្ថិភាពដល់សត្វព្រៃ។

ឯកឧត្ដមគូសបញ្ជាក់ថា ទង្វើនៃការប៉ុស្តិ៍មុខម្ហូបធ្វើពីសាច់សត្វព្រៃជាទង្វើអសីលធម៌ និងបានបំពានច្បាប់ និងសូមបញ្ឈប់សកម្មភាពនេះជាបន្ទាន់ ព្រោះពលរដ្ឋភាគច្រើនលើសលប់ សូម្បីក្នុងវីដេអូដែលប៉ុស្តិ៍ បងប្អូនប្រជាពលរដ្ឋទាំងអស់មានការយល់ដឹងនិងចូលរួមថែរក្សាសត្វព្រៃ។

ឯកឧត្ដម នេត្រ ភក្ត្រា ក៏បានឲ្យបញ្ឈប់សកម្មភាពនេះ ព្រោះមនុស្សទូទៅមិនគាំទ្រ និងកោតសរសើរនូវទង្វើ ខ្វះទទួលខុសត្រូវនេះឡើយ និងបានក្លាយជាជនចម្លែកតែឯង ខណៈពលរដ្ឋភាពច្រើនលើសលប់ បានយល់ដឹងយ៉ាងច្បាស់ពីសារៈប្រយោជន៍ នៃការការពារនិងអភិរក្សសត្វព្រៃ ។

ឯកឧត្ដម នេត្រ ភក្ត្រា ក៏បានប្រកាសថា ប្រសិនបើបងប្អូនណាបានស្គាល់ម្ចាស់ហ្វេសប៊ុក Kaa Official សូមជួយផ្តល់ព័ត៌មានបន្ទាន់ ៕