អគ្គនាយករង ប.ស.ស. អញ្ជើញចូលរួមកិច្ចប្រជុំបន្តលើសេចក្តីព្រាងអនុក្រឹត្យ ស្តីពីការបង្កើត ទីភ្នាក់ងារបញ្ជាក់ចំណាយសេវាសុខាភិបាល

ភ្នំពេញ៖ បន្ទាប់ពីមានកិច្ចប្រជុំពិភាក្សាចំនួន២លើករួចមក នៅព្រឹកថ្ងៃទី២៦ ខែសីហា ឆ្នាំ២០២២ នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង បេឡាជាតិសន្តិសុខសង្គម  និងជាប្រធានក្រុមការងារកិច្ចការច្បាប់ នៃប.ស.ស. បានដឹកនាំមន្ត្រីជំនាញ  ប.ស.ស. ចូលរួមក្នុងកិច្ចប្រជុំពិភាក្សាបន្តលើសេចក្តីព្រាងអនុក្រឹត្យ ស្តីពីការបង្កើត ទីភ្នាក់ងារបញ្ជាក់ចំណាយសេវាសុខាភិបាល។

ក្នុងកិច្ចប្រជុំពិភាក្សាខាងលើធ្វើឡើងក្នុងគោលបំណងពិនិត្យ និងពិភាក្សាបន្តលើសមត្ថកិច្ចរបស់ទីភ្នាក់ងារបញ្ជាក់ចំណាយសេវាសុខាភិបាល ដែលមានតួនាទីក្នុងការពិនិត្យតាមដាន និងបញ្ជាក់រាល់ការចំណាយសេវាវេជ្ជសាស្ត្រ (១) មូលនិធិសមធម៌សុខាភិបាល និង (២) របបសន្តិសុខសង្គមផ្នែកថែទាំសុខភាព និងផ្នែកហានិភ័យការងារ ដែលអនុលោមតាមច្បាប់ស្តីពីរបបសន្តិសុខសង្គម។

គួរបញ្ជាក់ផងដែលថា បេឡាជាតិសន្តិសុខសង្គម មានតួនាទីដ៏សំខាន់ក្នុងការទូទាត់ចំណាយជូនមូលដ្ឋានសុខាភិបាលដែលចុះកិច្ចព្រមព្រៀង និងមូលដ្ឋានសុខាភិបាលមិនចុះកិច្ចព្រមព្រៀង (ករណីសង្គ្រោះបន្ទាន់) លើរបបសន្តិសុខសង្គមផ្នែកថែទាំសុខភាព និងផ្នែកហានិភ័យការងារដល់សមាជិករបស់ខ្លួន។

សូមបញ្ជាក់ថា៖ កិច្ចពិភាក្សាខាងលើនេះ រៀបចំឡើងដោយអគ្គលេខាធិការដ្ឋានក្រុមប្រឹក្សាជាតិគាំពារសង្គម ក្រោមអធិបតីភាពឯកឧត្តមបណ្ឌិត ចន ណារិទ្ធ អនុរដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងជាអគ្គនាយក នៃនិយ័តករសន្តិសុខសង្គម ដោយមានការអញ្ជើញចូលរួមពីតំណាងភាគីពាក់ព័ន្ធសរុបប្រមាណជាង ២០រូប នៅសណ្ឋាគារភ្នំពេញ៕