ថ្នាក់ដឹកនាំ បុគ្គលិក នៃសមាគមសណ្ឋាគារកម្ពុជា ជាប្រតិបត្តិករនៃវិស័យបដិសណ្ឋាគារកិច្ច និងអាជីវកម្មពាក់ព័ន្ធ ជាង ៤០នាក់ ចូលរួមឈ្វេងយល់ពី របបសន្តិសុខសង្គមផ្នែកប្រាក់សោធន

សៀមរាប៖ ក្នុងយុទ្ធនាការ ៩០ថ្ងៃ នៃការចុះផ្សព្វផ្សាយរបបសន្តិសុខសង្គមផ្នែកប្រាក់សោធន នាថ្ងៃទី២៥ ខែសីហា ឆ្នាំ២០២២ នេះដើម្បីឆ្លើយតបតាមការស្នើសុំរបស់សមាគមនសណ្ឋាគារកម្ពុជា ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម បានចាត់លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម ចូលរួមជាវាគ្មិនក្នុងការធ្វើបទបង្ហាញស្តីពី “ការដាក់ឱ្យអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ” ជូនដល់ ឯកឧត្តម លោកជំទាវ លោក លោកស្រី ជាសមាជិកសមាជិកាសមាគមសណ្ឋាគារកម្ពុជា ជាប្រតិបត្តិករនៃវិស័យបដិសណ្ឋាគារកិច្ច និងអាជីវកម្មពាក់ព័ន្ធ សរុបប្រមាណជាង ៤០នាក់ នៅសណ្ឋាគារ Sofitel Angkor ខេត្តសៀមរាប។

កិច្ចប្រជុំខាងលើនេះធ្វើឡើងក្នុងគោលបំណង ដើម្បីបង្កើតជំនួបរវាងសមាជិកសមាជិកាដែលជាប្រតិបត្តិករនៃវិស័យបដិសណ្ឋាកិច្ច និងអាជីវកម្មពាក់ព័ន្ធឲ្យមានឱកាសទទួលបានចំណេះដឹង និងព័ត៌មានច្បាស់លាស់ក្នុងការអនុវត្តឲ្យបានត្រឹមត្រូវអំពីនីតិវិធី លក្ខខណ្ឌ និងការទទួលបានអត្ថប្រយោជន៍ ស្របតាមច្បាប់ស្តីពីរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ដែលជារបបសន្តិសុខសង្គមថ្មីមួយនៅកម្ពុជា៕