ទំនប់ដូនទ្រី សាងសង់បានជាង ៦០% ហើយគ្រោងនឹងបញ្ចប់ក្នុងឆ្នាំ២០២៤
ភ្នំពេញ៖ ទំនប់ដូនទ្រីសាងសង់បានជាង៦០%ហើយគ្រោងនឹងបញ្ចប់ក្នុងឆ្នាំ២០២៤ ដើម្បីបំពេញសេចក្តីត្រូវការរបស់ប្រជាកសិករ និងអាចជួយលើកកម្ពស់វិស័យកសិកម្មក្នុងខេត្តបាត់ដំបង កាន់តែល្អប្រសើរថែមទៀត។
ថ្លែងក្នុងសន្និសីទសារព័ត៌ មានស្តីពី [សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងធនធានទឹក និងឧតុនិយម] នៅព្រឹកថ្ងៃទី២៥ ខែសីហា នាទីស្តីការគណៈរដ្ឋមន្ត្រី លោក ឡុង ផលគុណ ប្រធាន មន្ទីរធនធានទឹកខេត្តបាត់ ដំបង បានមានប្រសាសន៍ថា គម្រោងអភិវឌ្ឍន៍ទំនប់ដូនទ្រី គឺជាប្រព័ន្ធធារាសាស្ត្រថ្មីមួយជាប្រវត្តិសាស្ត្រសម្រាប់ប្រទេសកម្ពុជា ដែលសំណង់នេះ ជាប្រភេទទំនប់ធំ ដែលការសាងសង់តម្រូវឱ្យប្រើ ប្រាស់វិធីសាស្ត្រថ្មី មិនដែលអនុវត្តន៍នៅក្នុងប្រទេសកម្ពុជា នាពេលកន្លងមក ដូចជា ការជីករូងក្នុងភ្នំ ការជីកថ្មក្នុងលក្ខខណ្ឌភូគ្គពសាស្ត្រមិនអនុគ្រោះ និងវិធីសាស្ត្រពង្រឹងកែច្នៃបាតគ្រឹះទំនប់ជាដើម ។
លោកបន្តថា គម្រោងនេះ មិនត្រឹមតែផ្តល់ទឹកសម្រាប់បង្កើនផលិតកម្មកសិកម្មទាំងនៅរដូវវស្សា និងនៅរដូវប្រាំង ប៉ុណ្ណោះទេ ប៉ុន្តែថែមទាំងរួមចំណែកក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់តាមតំបន់មួយចំនួននៅផ្នែកខាងក្រោមទៀតផង ។
[អាងទឹកដូនទ្រីនេះ ឥឡូវនេះយើងកំពុងចាប់ដៃគូជាមួយភាគីកូរ៉េហើយភាគីកូរ៉េកំពុងធ្វើការសាងសង់ ហើយឥឡូវនេះសាងសង់បានប្រហែល៦០ ភាគរយនិងគ្រោងបញ្ចប់ការសាងសង់នៅឆ្នាំ២០២៤ ប្រព័ន្ធនេះមានសក្តានុពលខ្លាំង បើប្រៀបធៀបប្រព័ន្ធទូទាំងប្រទេស ប្រព័ន្ធនេះគឺជាប្រព័ន្ធស្វ័យប្រវត្តិទំនើបបំផុតនៅទូទាំងប្រទេស គឺយើងលុងភ្នំតែម្ដង]។
លោកបានបន្ថែមថា ទំនប់ដូនទ្រី ក៏នឹងមានលទ្ធភាពផ្គត់ផ្គង់មួយផ្នែកនូវទឹកសម្រាប់ការស្រោចស្រពទៅឱ្យគម្រោងនៅផ្នែកខាងក្រោម ដូចជា អនុគម្រោងពោធិកាណាល់ និងអនុគម្រោងរាមគុណ តាមរយៈស្ទឹងដូនទ្រី។នេះគឺជាសមិទ្ធផលទី ២ នៅក្នុងខេត្តបាត់ដំបង ក្រោមហិរញ្ញប្បទានសម្បទានរបស់សាធារណរដ្ឋកូរ៉េ បន្ទាប់ពីគម្រោងអភិវឌ្ឍន៍ទំនប់សាលាតាអន ក្នុងការធានាដល់ការផ្គត់ផ្គង់ទឹកគ្រប់គ្រាន់សម្រាប់ការបង្កបង្កើនផលស្រូវ ដំណាំគ្រប់ប្រភេទ និងសម្រាប់ការប្រើប្រាស់ប្រចាំថ្ងៃ ដែលជាផ្នែកមួយជួយលើកស្ទួយដល់ជីវភាពរស់នៅរបស់បងប្អូនប្រជាពលរដ្ឋ តាមរយៈវិស័យទឹក ។
សូមបញ្ជាក់ថា : គម្រោងអភិវឌ្ឍន៍ទំនប់ដូនទ្រី មានទីតាំងស្ថិតនៅចម្ងាយប្រមាណ ៩០ គីឡូម៉ែត្រ ភាគពាយ័ព្យពីក្រុងបាត់ដំបង ហើយក៏ជាគម្រោងមួយក្រោមហិរញ្ញប្បទានសម្បទានរបស់សាធារណរដ្ឋកូរ៉េ ។ គម្រោងនេះ បានចាប់ផ្តើមធ្វើការសាងសង់កាលពីថ្ងៃទី២៥ ខែមិថុនា ឆ្នាំ២០១៨ ហើយគ្រោងនឹងបញ្ចប់នៅក្នុងឆ្នាំ២០២៤ ។ គិតមកដល់បច្ចុប្បន្ននេះ ការងារសម្រេចបានប្រមាណជាង៦០% លើទំហំការងារសរុបរបស់គម្រោង ។ បន្ទាប់ពីការសាងសង់ត្រូវបានបញ្ចប់ គម្រោងអភិវឌ្ឍន៍ទំនប់ដូនទ្រី អាចស្តុកទឹកបានប្រមាណ១៦៣លានម៉ែត្រត្រីគុណអាចផ្គត់ផ្គង់ទឹកសម្រាប់ការ ស្រោចស្រពលើផ្ទៃដីស្រូវវស្សាបាន ចំនួន៣៣. ០០០ ហិកតា ផ្ទៃដីស្រូវប្រាំងបានចំនួន ៤.៥០០ ហិកតា ៕ ប្រភព៖ ក្រសួងព័ត៌មាន
