នាយឧត្តមសេនីយ៍ សែម សុវណ្ណនី ស្នើឱ្យភាគីជប៉ុនបន្តហ្វឹកហ្វឺនផ្នែករក្សាសន្តិភាពដល់ទ័ពកម្ពុជា

ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានស្នើរទៅក្រសួងការពារជាតិជប៉ុន បន្តហ្វឹកហ្វឺនផ្នែករក្សាសន្តិភាព ដល់ទ័ពមួកខៀវកម្ពុជា ដើម្បីបង្កើនសមត្ថភាព មុនបញ្ជូនចេញទៅចូលរួមបំពេញបេសកកម្មក្រោមឆ័ត្រអង្គការសហប្រជាជាតិ។

ឯកឧត្តម នាយឧត្តមសេនីយ៍ បានលើកឡើងដូច្នេះ ក្នុងឱកាសដែលឯកឧត្តម អនុញ្ញាតឱ្យ លោកវរសេនីយ៍ឯក Ishihara Masanao អនុព័ន្ធយោធា ស្ថានទូតជប៉ុនប្រចាំប្រទេសវៀតណាម ចូលជួបសម្តែងការគួរសមនិងពិភាក្សាការងារ នៅទីស្តីការមជ្ឈមណ្ឌលជាតិរក្សាសន្តិភាព នាថ្ងៃទី២៥ ខែសីហា ឆ្នាំ២០២២នេះ។

ក្នុងជំនួបនេះ ឯកឧត្តម សែម សុវណ្ណនី បានឱ្យដឹងថា ចាប់តាំងពីឆ្នាំ២០១៣ រហូតមកដល់បច្ចុបប្បន្ននេះ ភាគីជប៉ុនបានបើកវគ្គបណ្តុះបណ្តាលនៅក្នុងប្រទេស បានចំនួន៩វគ្គ ដែលមានសិក្ខាកាមសរុប១៤០នាក់ លើជំនាញបច្ចេកទេសវិស្វកម្មនិងវាស់ស្ទង់។ ក្នុងអំឡុងពេលCOVID-19 ក៏ភាគីជប៉ុនបានផ្តល់ការហ្វឹកហ្វឺនដល់គ្រូបង្គោលកម្ពុជាចំនួន៥រូបផងដែរ តាមប្រព័ន្ធOnline។ ចំណែកនៅក្រៅប្រទេសវិញជប៉ុនបានទទួលសុក្ខាកាមមួកខៀវកម្ពុជាចំនួន៧រូប ក្នុងវគ្គបំប៉នវិស្វកម្មសំណង់ផ្តេកនិងគ្រឿងផ្ទុះ។

ក្នុងឱកាសនោះ ឯកឧត្តម នាយឧត្តមសេនីយ៍ សែម សុវណ្ណនី បានសំណូមពរ ទៅភាគីជប៉ុន ផ្តល់ការហ្វឹកហ្វឺនរយៈពេល៥ឆ្នាំបន្តទៀត លើផ្នែកវាស់ស្ទង់តូប៉ូ សំណង់ផ្តេក សំណង់បញ្ឈរ, បន្តផ្តល់ការហ្វឹកហ្វឺនដល់គ្រូបង្គោលកម្ពុជា តាមទិដ្ឋភាពជាក់ស្តែងនៃតំបន់បេសកកម្ម ដើម្បីផ្តល់ការហ្វឹកហ្វឺនមុននឹងចល័តដល់កងកម្លាំងវិស្វកម្មកម្ពុជា សម្រាប់បេសកកម្មអង្គការសហប្រជាជាតិ, ផ្តល់ការហ្វឹកហ្វឺនទាំងទ្រឹស្តីនិងការអនុវត្តជាក់ស្តែងលើជំនាញវាស់ស្ទង់ តាមរយៈម៉ាស៊ីនទំនើប និងការប្រើប្រាស់ Droneផង ដើម្បីឆ្លើយតបទៅនឹងស្ថានការណ៍បច្ចុប្បន្នដែលមានភាពស្មុគស្មាញ និងផ្លាស់ប្តូរទស្សនកិច្ចប្រចាំឆ្នាំរវាងប្រទេសទាំង២។ ឯកឧត្តម អគ្គនាយកមជ្ឈមណ្ឌលជាតិរក្សាសន្តិភាព បានបញ្ជាក់ថា ឆ្នាំ២០២២នេះ គឺខួបលើកទី៣០ ដែលប្រទេសជប៉ុនបានបញ្ជូនកម្លាំងចូលរួមបេសកកម្មUNTACនៅកម្ពុជា ដែលមានសមាជិក២នាក់បានពលីក្នុុងបេសកកម្មនេះផងដែរ។

ឯកឧត្តម សែម សុវណ្ណនី បានលើកឡើងថា មជ្ឈមណ្ឌលជាតិបាននិងកំពុងសាងសង់របងសុវត្ថិភាព ហេដ្ឋារចនាសម្ព័ន្ធនៅសាលាPKO ដើម្បីធ្វើជាម្ចាស់ផ្ទះលើគម្រោងត្រីភាគី (ជប៉ុន អ.ស.ប និងកម្ពុជា) ស្តីពីការហ្វឹកហ្វឺនប្រើប្រាស់គ្រឿងចក្រវិស្វកម្មធុនធ្ងន់ នាឆ្នាំ២០២៤ ដែលមានការចូលរួមពីបណ្តាប្រទេសក្នុងអាស៊ាននិងតំបន់។

ទាក់ទិនទៅនឹងសំណូមពររបស់ប្រមុខទ័ពមួកខៀវកម្ពុជាខាងលើនេះ លោកវរសេនីយ៍ឯក Ishihara Masanao បានលើកឡើងថា ខាងក្រសួងការពារជាតិជប៉ុននឹងបន្តសហការជាមួយកម្ពុជាជារហូត ជាពិសេសផ្នែករក្សាសន្តិភាព។ ដែលកន្លងទៅថ្មីៗនេះ ខាងភាគីជប៉ុនទើបបណ្តុះបណ្តាល ផ្នែកវិស្វកម្មវាស់ស្ទង់ ដល់កម្លាំងមួកខៀវកម្ពុជា មុនចេញទៅបេសកកម្មផងដែរ៕