ជប៉ុន សង្ឃឹមថា ទៅថ្ងៃអនាគតជប៉ុន នឹងមានស្ថានសេនានុព័ន្ធកម្លាំង ស្វ័យការពារជាតិជប៉ុន ប្រចាំនៅកម្ពុជា
ភ្នំពេញ៖ ឯកឧត្តម មីកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា បានថ្លែងប្រាប់ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ថាទៅថ្ងៃអនាគតជប៉ុន នឹងមានស្ថានសេនានុព័ន្ធកម្លាំង ស្វ័យការពារជាតិជប៉ុន ប្រចាំនៅកម្ពុជា ។
នាថ្ងៃទី២៤ ខែសីហា ឆ្នាំ២០២២ នាយឧត្តមសេនីយ៍ វង្ស ពិសេន បានទទួលជួបពិភាក្សាការងារជាមួយឯកឧត្តម មីកាមិ ម៉ាសាហ៊ីរ៉ូ និងលោកវរសេនីយ៍ឯក អ៊ីស៊ីហារ៉ា ម៉ាសៅ សេនានុព័ន្ធកម្លាំងស្វ័យការពារជាតិជប៉ុនថ្មីប្រចាំកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ។
នាឱកាសនោះ ឯកឧត្តម មីកាមិ ម៉ាសាហ៊ីរ៉ូ បានផ្តល់នូវការជឿជាក់ ចំពោះបេសកម្មការទូតរបស់លោកវរសេនីយ៍ឯក អ៊ីស៊ីហារ៉ា ម៉ាសៅ ថានឹងបន្តកិច្ចសហប្រតិបត្តិការយ៉ាងសកម្មដូចសេនាអនុព័ន្ធមុនដែរ បើទោះបីបច្ចុប្បន្នសេនានុព័ន្ធស្វ័យការពារជាតិជប៉ុនប្រចាំកម្ពុជា មាននិវេសនដ្ឋាននៅប្រទេសវៀតណាមក្តី ។
ជាកិច្ចឆ្លើយតបពាក់ព័ន្ធដល់កិច្ចសហប្រតិបត្តិការលើវិស័យយោធា ឯកឧត្ដម នាយឧត្តមសេនីយ៍ វង្ស ពិសេន បានថ្លែងអំណរគុណដល់មិត្តជប៉ុន ដែលបានជួយបណ្ដុះបណ្ដាលធនធានមនុស្ស ក្នុងកងយោធពលខេមរភូមិន្ទ ធ្វើឲ្យកងយោពលខេមរភូមិន្ទមានសមត្ថភាព និងរួមចំណែកនៅក្នុងបេសកកម្មថែរក្សាសន្តិភាព ក្រោមឆ័ត្រអង្គការសហប្រជាជាតិ។
ឯកឧត្តម នាយឧត្តមសេនីយ៍ ក៏បានស្នើសុំប្រទេសជប៉ុន បន្តជួយកសាងធនធានមនុស្សក្នុងកងយោពលខេមរភូមិន្ទបន្តទៀត រួមទាំងការជួយឧបត្ថម្ភសម្ភារៈផ្សេងៗដែលអាចជួយបាន ពិសេសសម្ភារៈជួយសង្គ្រោះគ្រោះមហន្តរាយ ៕
