ឯកឧត្តម ជ្រុន ថេរ៉ាវ៉ាត អញ្ជើញជួបសំណេះ សំណាល ជា មួយ ថ្នាក់ដឹកនាំ និង ក្រុមជំនួយ ការ ផ្នែកផែនការ យុទ្ធសាស្រ្ត នៃ យុវជនគណបក្សប្រជាជនកម្ពុជា ថ្នាក់កណ្តាល

ភ្នំពេញ៖ ឯកឧត្តមបណ្ឌិត ជ្រុន ថេរ៉ាវ៉ាត អនុប្រធានយុវជនគណបក្សប្រជាជនកម្ពុជាថ្នាក់កណ្តាល តំណាងដ៏ខ្ពង់ខ្ពស់ ឯកឧត្តមបណ្ឌិត ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល នាព្រឹកថ្ងៃទី២២ ខែសីហា ឆ្នាំ២០២២ បានអញ្ជើញជាអធិបតីក្នុងពិធីជួបសំណេះសំណាលជាមួយថ្នាក់ដឹកនាំ និងក្រុមជំនួយការផ្នែកផែនការយុទ្ធសាស្រ្ត នៃយុវជនគណបក្សប្រជាជនកម្ពុជាថ្នាក់កណ្តាលប្រមាណ ២០០នាក់នៅមន្ទីរគណបក្សប្រជាជនកម្ពុជារាជធានីភំ្នពេញ។

តាមរយៈមតិស្វាគមន៍ និងរបាយការណ៍របស់ ឯកឧត្តម ពៅ ប៉ូលីណែល ប្រធានផ្នែកផែនការយុទ្ធសាស្រ្ត កម្មវិធីសំណេះសំណាលនេះត្រូវបានរៀបចំឡើងក្នុងគោលបំណងសំខាន់២រួមមាន៖ (១) ពង្រឹងការងារកសាងបក្សក្នុងជួរយុវជន នៃផ្នែកផែនការយុទ្ធសាស្រ្ត ដែលជាផ្នែកមួយដ៏សំខាន់ នៃយុវជនគណបក្សប្រជាជនកម្ពុជាថ្នាក់កណ្តាល តាមរយៈការថ្លែងអំណរគុណ និងលើកទឹកចិត្ត ស្វែងយល់អំពីតួនាទី ភារកិច្ច និងរបៀបរបបការងាររបស់យុវជនគណបក្ស ស្តាប់របាយការណ៍អំពីសកម្មភាព និងលទ្ធផលការងារ ព្រមទាំងតម្រង់ទិសដៅការងារគន្លឹះសម្រាប់ត្រៀមយកប្រៀបឈ្នះ ក្នុងការបោះឆ្នោតជ្រើសរើសតំណាងរាស្រ្តនីតិកាលទី៧ ក្នុងឆ្នាំ២០២៣ ខាងមុខ និង (២) ធានាបាននូវឯកភាពផ្ទៃក្នុងគណបក្សខ្ពស់ តាមរយៈការពង្រឹងនូវចំណងទំនាក់ទំនងដ៏រឹងមាំរវាងថ្នាក់ដឹកនាំថ្នាក់កណ្តាល និងមន្រ្តីយុវជនគណបក្សនៅមូលដ្ឋាន។

ថ្លែងនៅក្នុងពិធីដ៏មានសារៈសំខាន់នេះ ឯកឧត្តមបណ្ឌិត ជ្រុន ថេរ៉ាវ៉ាត បានពាំនាំនូវការផ្តាំផ្ញើសួរសុខទុក្ខរបស់ឯកឧត្តមបណ្ឌិត ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល ជូនដល់សមាជិកសមាជិកានៃអង្គពិធី ព្រមទាំងបានលើកឡើងពីតួនាទីដែលមិនកាត់ផ្តាច់បានរបស់គណបក្សប្រជាជនកម្ពុជា ក្នុងកសាង និងអភិវឌ្ឍប្រទេសកម្ពុជាចាប់តាំងពីថ្ងៃបង្កើត ថ្ងៃ២៨ ខែមិថុនា ឆ្នាំ១៩៥១ រហូលដល់ពេលបច្ចុប្បន្ន។

ទន្ទឹមនឹងលទ្ធផលដែលសម្រេចបាននាពេលកន្លងមករបស់ផ្នែកផែនការយុទ្ធសាស្រ្ត ឯកឧត្តមបានសង្កត់ធ្ងន់នូវភារកិច្ចចំពោះមុខដែលផ្នែកផែនការយុទ្ធសាស្រ្តចាំបាច់ត្រូវអនុវត្តបន្ត ដើម្បីធានាបានប្រៀបឈ្នះសម្រាប់គណបក្សក្នុងការបោះឆ្នោតឆ្នាំ២០២៣ខាងមុខរួមមាន ការរៀបចំការសិក្សាស្រាវជ្រាវស្ទាបស្ទង់មតិអំពីសតិអារម្មណ៍ និងតម្រូវការរបស់យុវជន ការរៀបចំយុទ្ធសាស្រ្តសម្រាប់យុវជនគណបក្សថ្នាក់កណ្តាលឆ្ពោះទៅកាន់ការបោះឆ្នោតឆ្នាំ២០២៣ និងការរៀបចំគោលនយោបាយអភិវឌ្ឍបន្ត ២០២៣-២០២៨ សម្រាប់យុវជនគណបក្សថ្នាក់កណ្តាល៕