ឯកឧត្តម ម៉ម ប៊ុននាង នាំយកឧបករណ៍ និងសម្ភារពេទ្យប្រគល់ជូនមន្ទីរពេទ្យជ័យវរ្ម័នទី៧ ខេត្តសៀមរាប
ភ្នំពេញ៖ នាព្រឹកថ្ងៃទី២១ ខែសីហា ឆ្នាំ២០២២ គណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា (គណៈកម្មការទី១០) ដឹកនាំដោយឯកឧត្តម ម៉ម ប៊ុននាង ប្រធានគណៈកម្មការទី១០ អ្នកនាំពាក្យព្រឹទ្ធសភា និងជាតំណាងដ៏ខ្ពង់ខ្ពស់របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានអញ្ជើញនាំយកម៉ាស៊ីនពិនិត្យសម្ពាធបេះដូង ចំនួន០១គ្រឿង និងម្សៅទឹកដោះគោសម្រាប់ទារក និងកុមារ ម៉ាក PURELAC ចំនួន ៥,៤៧២កំប៉ុង (ក្នុង១កំប៉ុង=៨០ក្រាម ស្មើនឹង ៤,៣៣៧.៦គីឡូក្រាម) ដែលជាអណោយរបស់មូលនិធិចែករំលែកសង្គ្រោះជីវិតសកល នៃសាធារណរដ្ឋកូរ៉េ មកប្រគល់ជូនមន្ទីរពេទ្យជ័យវរ្ម័នទី៧ (មន្ទីរពេទ្យគន្ធបុប្ផាទី៣ ខេត្តសៀមរាប)។
បន្ទាប់មក គណៈប្រតិភូគណៈកម្មការទី១០ព្រឹទ្ធសភា បានអញ្ជើញសួរសុខទុក្ខ និងចែកជូនថវិកាដល់ឪពុក ម្តាយ របស់ទារក និងកុមារ ដែលកំពុងសម្រាកព្យាបាលជំងឺ ក្នុងម្នាក់ថវិកា៥ម៉ឺនរៀល ដោយចំណាយសរុបថវិកាចំនួន២០លានរៀល ដែលជាថវិកាផ្ទាល់របស់ឯកឧត្តម ម៉ម ប៊ុននាង៕
