“តោះយើងត្រឡប់ទៅផ្ទះយើងវិញ!” នេះជាប្រសាសន៍របស់លោកស្រីអ៊ុង សានស៊ូជី អតីតៈមេដឹកនាំ ប្រទេសភូមាក្នុងដំណើរទស្សនៈកិច្ចក្នុងប្រទេសថៃនៅចំពោះមុខពលកររាប់ពាន់នាក់កាលពីឆ្នាំ២០១៦។ គួររំលឹកថា កាលណោះគ្រាន់តែលោកស្រី អ៊ុង សានស៊ូជី ស្តោះពាក្យនេះចេញភ្លាម រីឯលោក សម រង្ស៊ី បានស្ទុះទៅលិឍ រួចព្រុសតាមក្រោយថា “…តោះទៅ ផ្ទះ យើង វិញ ទាំង អស់ គ្នា ទៅ យក ផ្ទះ យើង ទៅ យក ដីធ្លី យើង វិញ ទៅយកប្រទេសយើងវិញ…”។
ក្នុងន័យនេះ លោកសម រង្ស៊ី មិនចោលគំនិតនយោបាយកន្ទុយខ្វៀន ដែលតែងតែចង់ពន្យុះខ្មែរអោយ ចងកំហឹងបង្ហូរឈាមគ្នាក្នុងគោលបំណងញុះញង់ខ្មែរក្នុងស្រុកក្រោកបះបោរធ្វើបដិវត្តន៍ពណ៌យកគំរូតាមប្រទេសទូនីហ្សុី (Tunisie) ដែលលោក សម រង្ស៊ី ធ្លាប់បានទៅទស្សនាដោយផ្ទាល់។ លោកសម រង្ស៊ី ក៏ធ្លាប់បានអំពាវនាវអ្នកគាំទ្រអតីតៈគណបក្សសង្រ្គោះជាតិអោយក្រោកបះបោរដោយយកគំរូតាមមេដឹកនាំបក្សប្រឆាំងលោក ហ័ន ហ្កាយដូ (Juan Guaido) នៃប្រទេសវេណេស៊ូអេឡា (Venezuela) ដើម្បីផ្តួលរំលំរដ្ឋាភិបាលស្របច្បាប់ រួមទាំងគំរូអាក្រក់បែបហិង្សារបស់ប្រទេសដ៏ទៃទៀតផងដែរ។
បើពិនិត្យពិច័្ចយអោយមែនទែនទៅ គឺលោក សម រង្ស៊ី គ្មានគោលនយោបាយ និងបន្ទាត់នយោបាយបក្ស ត្រឹមត្រូវសោះឡើយ។ ពោលគឺ ប៉ះអីលួចហ្នឹង ឬដើរមួយជំហានគិតមួយជំហានប្រៀបបាន ទៅនឹង”អាលុក”រត់បណ្តើរ ហៀរទឹកមាត់កក្លាក់បណ្តើរ ព្រោះវង្វេងផ្ទះ និងដាច់អាហារ។
ទោះជាយ៉ាងណា វាចាចាក់ដោតរបស់លោក សម រង្ស៊ី នាពេលកន្លងមកពុំបានត្បុលចូលជ្រៅទៅក្នុង បេះដូងពលករខ្មែរមួយចំនួនធំ ដែលជឿជាក់លើការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាលសម្តេច ហ៊ុន សែន និងដែលកាលណោះពលករកម្ពុជាកំពុងធ្វើការ និងទទួលផលពីប្រទេសថៃ ម៉ាឡេស៊ី កូរ៉េ និងជប៉ុន ផ្ទុយស្រឡះពីការរំពឹងទុករបស់លោក សម រង្ស៊ី ។
សូមបញ្ជាក់ថា កាលណោះនៅពេលលោកស្រី អ៊ុង សានស៊ូជី វិលត្រឡប់មកប្រទេសវិញ គឺពុំមានពលករភូមាចូលរួមដង្ហែរតាមការអំពាវនាវឡើយ។ យ៉ាងណាមិញ សម្តីព្រុស និងពន្យុះរបស់លោក សម រង្ស៊ី ក៏មិនសូវខុសគ្នាដែរ។ មានន័យថា ប្រសិនបើលោក សម រង្ស៊ី វិលត្រឡប់មកកម្ពុជា នោះពលករខ្មែរនៅក្រៅប្រទេសនឹងមិនបោះបង់ការងារ និងផលប្រយោជន៍ ដើម្បីបុគ្គលលោក សម រង្ស៊ី រួមជាមួយបក្សពួកបនភឿនរបស់គាត់ ដែលកំពុងគេចខ្លួនពីសំណាញ់ច្បាប់។ ម្យ៉ាងទៀត ប្រសិនបើលោក សម រង្ស៊ី ពិតជាក្លាហានវិលចូលកម្ពុជា នោះពន្ធនាគារនឹងរង់ចាំស្វាគមន៍។ ដោយសារតែការភ័យខ្លាចគុកនេះហើយ ទើបបានជាលោក សម រង្ស៊ី តែងស៊ីញ៉ូឆ្វេងបត់ស្តាំពាក់ព័ន្ធនឹង ការវិលត្រឡប់របស់គាត់។
ចូរសាធារណជនចងចាំថា លោក សម រង្ស៊ី ខុសប្លែកពីលោកស្រី អ៊ុង សានស៊ូជី ព្រោះគាត់ជាប្រភេទ ធូលីមនុស្សបែប “ក្របីដើរចេញបងដេញអោយស្រីមើល”។ ម្យ៉ាងទៀត ប្រសិនបើលោក សម រង្ស៊ី វិលមកកម្ពុជាដើម្បីជាប់ពន្ធនាគារ នោះលោក សម រង្ស៊ី នឹងដឹកនាំបាតុករធ្វើបាតុកម្មនៅក្នុងគុក បន្តទៀត។ ហេតុដូច្នេះហើយ ទើបកន្លងមកលោកសម រង្ស៊ី មានងារជា”ថៅកែបាតុកម្ម”ពេញមួយជីវិត៕
ដោយ៖ ស្ទីវិន សាន់អគ្គនាយករង HNA NEWS
