សម្ដេចតេជោ៖ វិបត្តិកូវីដ១៩ បានបង្កើតកាលានុវត្តន៍ភាព នៃការប្រើប្រាស់ប្រព័ន្ធឌីជីថល ជាពិសេសក្នុងវិស័យអប់រំ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានលើកឡើងថា វិបត្តិនៃជំងឺកូវីដ-១៩ ក៏បានបង្កើតនូវកាលានុវត្តន៍ភាព នៃការប្រើប្រាស់ប្រព័ន្ធឌីជីថល ជាពិសេសក្នុងវិស័យអប់រំ ពោលគឺនៅពេលដែល កម្ពុជាជួបនូវវិបត្តិកូវីដ-១៩នោះ សាលាបានធ្វើការបណ្ដុះបណ្ដាល សិស្សនិស្សិតតាមរយៈការ សិក្សាតាមប្រព័ន្ធអនឡាញ។
ក្នុងឱកាសអញ្ជើញ ចែកសញ្ញាបត្រជូន និស្សិតសាកលវិទ្យាល័យពុទ្ធិសាស្ត្រសរុប ៦២៣នាក់ នៅព្រឹកថ្ងៃទី១៧ ខែសីហា ឆ្នាំ២០២២នេះ សម្តេចតេជោ ហ៊ុន សែន បានមានប្រសាសន៍ កោតសរសើរដល់ក្រុមប្រឹក្សាភិបាល ថ្នាក់ដឹកនាំគ្រប់រូប សាស្ត្រាចារ្យ និងបុគ្គលិកទាំងអស់ នៃសាកលវិទ្យាល័យពុទ្ធិសាស្ត្រ ដែលបានប្រឹងប្រែងបណ្តុះបណ្តាលសិស្សនិស្សិតប្រកបដោយភាពជោគជ័យ និងជម្នះបាននូវវិបត្តិនៃជំងឺកូវីដ-១៩ ដែលអាចឱ្យសាលានៅតែដំណើរការបានជាធម្មតា។
សម្តេចតេជោ ហ៊ុន សែន គូសបញ្ជាក់ថា ការចាក់ស្រោចវ៉ាក់សាំងនៅទូទាំងប្រទេសក្នុងអត្រាខ្ពស់នេះ គឺបានធ្វើឱ្យមានភាពសាំ និងទប់ស្កាត់បានការឆ្លងរាតត្បាតនៃជំងឺនេះបន្ថែមទៀត ៕
