លោកជំទាវ ម៉ុម ថានី អញ្ជើញសំណេះសំណាល និងចែកមុងជ្រលក់ថ្នាំដល់គ្រួសារសហគមន៍តំបន់ ការពារធម្មជាតិជាំពេន និងមន្រ្តីឧទ្យានុរក្សដែនជម្រកសត្វព្រៃបឹងពែរ

ភ្នំពេញ៖ ដើម្បីជំរុញ និងលើកទឹកចិត្តដល់ប្រជាសហគមន៍ មន្រ្តីឧទ្យានុរក្ស និងអ្នកពាក់ព័ន្ធ អនុវត្តវិធានការ ការពារ បង្ការទប់ស្កាត់ជំងឺគ្រុនចាញ់ និងការថែទាំសុខភាព តាមរយៈសម្រាកនៅក្នុងមុង និងរស់នៅស្អាត ក្នុងជីវភាពរស់នៅប្រចាំថ្ងៃ និងក្នុងពេលបំពេញការងារនៅតាមតំបន់ការពារធម្មជាតិ ដែលប្រឈមទៅនឹងជំងឺ ផ្សេងៗ លោកជំទាវ ម៉ុម ថានី រដ្ឋលេខាធិការ និងជាប្រធានសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន បានអញ្ជើញជាអធិបតីក្នុងពិធីសំណេះសំណាល និងចែកជូនមុងជ្រលក់ថ្នាំ ដល់គ្រួសារសហគមន៍តំបន់ការពារធម្មជាតិជាំពេន និងមន្រ្តីឧទ្យានុរក្ស នៃដែនជម្រកសត្វព្រៃបឹងពែរ ឃុំរមទម្យ ស្រុករវៀង ខេត្តព្រះវិហារ ជាមួយឯកឧត្ដម វ៉ាត ប៉ារ៉ាមីន អភិបាលរង នៃគណៈអភិបាលខេត្ដព្រះវិហារ លោក អ៊ុក ណាវ៉ាន់ អគ្គនាយករង មន្ទីរសុខាភិបាលខេត្ដ មន្ទីរបរិស្ថាន សមាជិក សមាជិកាក្រុមការងារប្រយុទ្ធប្រឆាំង និងជំងឺគ្រុនចាញ់ក្រសួងបរិស្ថាន មន្ដ្រីឧទ្យានុរក្ស អាជ្ញាធរមូលដ្ឋាន ប្រជាសហគមន៍ចំនួន១៦០ នាក់។

លោកជំទាវ ម៉ុម ថានី បានមានប្រសាសន៍ថា ពិធីសំណេះសំណាលនៅក្នុងថ្ងៃនេះ ក៏ជាការ ចូលរួមអនុវត្តផែនការ យុទ្ធសាស្រ្តជាតិលុបបំបាត់ជំងឺគ្រុនចាញ់ ឆ្នាំ២០១១-២០២៥ របស់ក្រសួងសុខាភិបាល និង ការយកចិត្តទុកដាក់ របស់ក្រសួងបរិស្ថាន មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ នៃក្រសួងសុខាភិបាល និងអ្នកពាក់ព័ន្ធ ក្នុងការថែទាំសុខភាពសហគមន៍ និងមន្រ្តីឧទ្យានុរក្ស ដែលជាតួអង្គជួរមុខដ៏សំខាន់ ក្នុងការចុះល្បាតព្រៃសហគមន៍ ការពារធនធានធម្មជាតិ និងជីវចម្រុះ ក្នុងតំបន់ការពារធម្មជាតិ។

បន្ទាប់ពីបញ្ចប់ពិធីសំណេះសំណាល គណៈប្រតិភូបានបន្តចុះជួបគ្រួសារប្រជាសហគមន៍គំរូ ចិញ្ចឹមជ្រូក មាន់ និងចុះពិនិត្យមជ្ឈមណ្ឌលវប្បធ៍មជនជាតិដើមភាគតិចគួយ ដែលពឹងផ្អែកលើអនុផលព្រៃឈើ ដើម្បីបង្កើនចំណូល និងលើកកម្ពស់ជីវភាពគ្រួសារផងដែរ៕