ឧត្តមសេនីយ៍ត្រី ហួម ខ្វែក ណែនាំដល់កម្លាំងទាំងអស់ ត្រូវពង្រឹងការងារគ្រប់គ្រងកម្លាំង និងត្រៀមកម្លាំងអន្តរាគមន៍ ចុះជួយប្រជាពលរដ្ឋរងគ្រោះដោយធម្មជាតិ បានទាន់ពេលវេលា
ភ្នំពេញ៖ ឧត្តមសេនីយ៍ត្រី ហួម ខ្វែក មេបញ្ជាការតំបន់ប្រតិបត្តិការសឹករងបាត់ដំបង នៅព្រឹកថ្ងៃទី៨ ខែសីហា ឆ្នាំ២០២២ បានណែនាំដល់លោកនាយការិយាល័យ ផ្នែកទាំងអស់ ត្រូវពង្រឹងការងារគ្រប់គ្រងកម្លាំង និងត្រៀមកម្លាំងអន្តរាគមន៍ ដើម្បីចុះជួយប្រជាពលរដ្ឋរងគ្រោះដោយធម្មជាតិ បានទាន់ពេលវេលា។
ការលើកឡើងនេះធ្វើឡើងក្នុងពិធីផ្សព្វផ្សាយសភាពការណ៍និវត្តន៍ថ្មីៗដែលកើតមានឡើងនៅក្នុងប្រទេស និងក្នុងតំបន់ ដែលមានការអញ្ជើញចូលរួមពីសំណាក់អស់លោក លោកស្រី មេបញ្ជាការរង នាយសេនាធិការរង នាយ នាយរងការិយាល័យ ផ្នែក ព្រមទាំងនាយទាហាន នាយទាហានរង ពលទាហាន ចំណុះតំបន់ប្រតិបត្តិការសឹករង បាត់ដំបង។
ឧត្តមសេនីយ៍ត្រី ហួម ខ្វែក បានធ្វើការផ្សព្វផ្សាយ សភាពការណ៍ថ្មីៗ និងផែនការរបស់ថ្នាក់លើបានដាក់ចុះ និងបានណែនាំដល់កងកម្លាំងទាំងអស់ត្រូវគោរពអនុវត្តបទវិន័យ និងលក្ខន្តិកៈទូទៅរបស់កងយោធពលខេមរភូមិន្ទ ហើយត្រូវជៀសឲ្យឆ្ងាយពីគ្រឿងញៀនគ្រប់ប្រភេទ ខិតខំហ្វឹកហ្វឺនរៀនសូត្រ ពិសេសគោរពឲ្យបាននូវបទបញ្ជារបស់ប្រមុខរដ្ឋាភិបាល ក្រសួងការពារជាតិ អគ្គបញ្ជាការ បញ្ជាការដ្ឋានកងទព័ជើងគោក និងបទបញ្ជា សេចក្តីណែនាំរបស់ថ្នាក់លើបានដាក់ចុះ ។
ឧត្តមសេនីយ៍ត្រី ហួម ខ្វែក ក៏បានក្រើនរំលឹកដល់នាយទាហាន នាយទាហានរង ពលទាហាន ទាំងអស់ឲ្យបន្តយកចិត្តទុកដាក់ខ្ពស់ក្នុងការថែទាំសុខភាពតាមការណែនាំរបស់ក្រសួងសុខាភិបាល និងអនុវត្តឲ្យបាននូវអនុសាសន៍ដ៏ខ្ពង់ខ្ពស់របស់សម្តេច អគ្គមហាសេនាបតីតេជោ ហ៊ុន សែន នូវវិធានការ ៣ការពារ និង៣កុំជាប់ជាប្រចាំដើម្បីទប់ស្កាត់ការរីករាលដាល នៃជំងឺកូវីដ-១៩ ៕
