បញ្ជូនសង្ស័យ ៣នាក់ ទៅសាលាដំបូងខេត្តព្រះសីហនុ ពាក់ព័ន្ធករណីឃាតម្ម នៅកាស៊ីណូ តុងហ្វាង ប៉ាលីរិន ក្រុងព្រះសីហនុ

ភ្នំពេញ៖ កម្លាំងជំនាញបានកសាងសំណុំរឿង បញ្ជូនជនសង្ស័យ ៣នាក់ រួមនឹងវត្ថុតាង ពាក់ព័ន្ធករណីឃាតម្ម នៅកាស៊ីណូ តុងហ្វាង ប៉ាលីរិន ក្រុងព្រះសីហនុទៅសាលាដំបូងខេត្តព្រះសីហនុ ។

គូឲ្យដឹងថា នៅថ្ងៃទី៣០ ខែកក្កដា ឆ្នាំ២០២២ វេលាម៉ោង ២២និង៣០នាទី កម្លាំងជំនាញ នៃស្នងការដ្ឋាននគរបាលខេត្តព្រះសីហនុ បានទទួលព័ត៌មានថា នៅចំណុចកាស៊ីណូ តុងហ្វាង ប៉ាលីរិន ស្ថិតនៅក្រុមទី១៣ ភូមិ១ សង្កាត់២ ក្រុង-ខេត្តព្រះសីហនុ មានករណីផ្ទុះអាវុធ បណ្តាលឲ្យបុរសជនជាតិចិន០២នាក់ ស្លាប់បាត់បង់ជីវិត ។

បន្ទាប់ពីទទួលបានពត៌មាននេះភ្លាម កម្លាំងជំនាញផែនការងារនគរបាលព្រហ្មទណ្ឌ បានសហការចុះទៅដល់កន្លែងកើតហេតុដើម្បីធ្វើការស្រាវជ្រាវ តែជនសង្ស័យបានគេចខ្លួនបាត់អស់ ។

ក្នុងកិច្ចប្រតិបត្តិការនេះ កម្លាំងសមត្ថកិច្ចបានស្រាវជ្រាវឃាត់ខ្លួនជនសង្ស័យចំនួន ០៣នាក់ ៖ ១-ឈ្មោះ Ding PingPing ហៅ Ding QiQi ភេទស្រី អាយុ៣៥ឆ្នាំ ជនជាតិចិន មុនរបរ អ្នកគ្រប់គ្រងកាស៊ីណូ តុងហ្វាងប៉ាលីរិន លិខិតឆ្លងដែន (មិននៅជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។
២-ឈ្មោះ Xu WeiWei ភេទប្រុស អាយុ ៣៥ឆ្នាំ ជនជាតិចិន មុនរបរ គ្រប់គ្រងកាំមេរ៉ាសុវត្តិភាពនៅកាស៊ីណូ តុងហ្វាងប៉ាលីរិន លិខិតឆ្លងដែន (មិននៅជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។

៣-ឈ្មោះ Du Jian Bo ភេទប្រុស អាយុ៤២ឆ្នាំ ជនជាតិចិន មុនរបរ អ្នកគ្រប់គ្រងសន្តិសុខនៅកាស៊ីណូ តុងហ្វាងប៉ាលីរិន លិខិតឆ្លងដែន (មិនជាប់ខ្លួន) ស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ ។

ដកហូតសម្ភារៈវត្ថុតាង៖ ១-អាវុធខ្លីចំនួន ៥ដើម (អាវុធខ្លីដែលជនសង្ស័យបាញ់ជនរងគ្រោះចំនួន៤ ដើម និងចំនួន១ដើមទៀត ឆែកឆេរបានពីទូរដែកក្នុងអគារកើតហេតុ)។ ២-រថយន្ត ចំនួន ៣គ្រឿង ជាមធ្យោយបាយធ្វើសកម្មភាពនិងរត់គេចខ្លួន។ ៤-សម្ភារៈនិងឯកសារមួយចំនួនទៀត ។

បច្ចុប្បន្ន ជនសង្ស័យទាំង៣នាក់ រួមនឹងវត្ថុតាង កម្លាំងជំនាញបានកសាងសំណុំរឿងបញ្ជូន ទៅសាលាដំបូងខេត្តព្រះសីហនុ នៅថ្ងៃទី០៤ ខែសីហា ឆ្នាំ២០២២ ដើម្បីអនុវត្តបន្តតាមនីតិវិធី៕