ភ្នំពេញ៖ នគរបាលជំនាញព្រហ្មទណ្ឌនៃអធិការដ្ឋាននគរបាលខណ្ឌកំបូលរាជធានីភ្នំពេញ នៅថ្ងៃទី១ ខែសីហា ឆ្នាំ២០២២ បានបញ្ជូនជនសង្ស័យចំនួន៣នាក់ ទៅសាលាដំបូងរាជធានីភ្នំពេញចាត់ការតាមផ្លូវច្បាប់ បន្ទាប់ពីបង្ក្រាបចាប់ខ្លួនកាលពីថ្ងៃទី២៩ ខែកក្កដា ឆ្នាំ២០២២ កន្លងទៅថ្មីៗនេះ ធ្វើសកម្មភាពជិះម៉ូតូបុកម៉ូតូស្ត្រីរងគ្រោះឱ្យដួលហើយយកកាំបិតភ្ជង់គំរាមយកម៉ូតូបានសម្រេច ខណៈដែលស្ត្រីរងគ្រោះជិះម៉ូតូចេញពីកន្លែងធ្វើការ ។
លោកវរសេនីយ៍ទោ ឈឹម សាវុធ អធិការរងទទួលការងារព្រហ្មទណ្ឌនៃអធិការដ្ឋាននគរបាលខណ្ឌកំបូល ប្រាប់ឱ្យដឹងថា នៅថ្ងៃទី២៩ ខែកក្កដាឆ្នាំ ២០២២ វេលាម៉ោងប្រហែល៥និង00នាទីព្រឹក ជនរងគ្រោះឈ្មោះ ជួន ចាន់ណា ភេទស្រី អាយុ៣០ឆ្នាំ មុខរបរ កម្មកររោងចក្រ ស្នាក់នៅផ្ទះគ្មានលេខ ផ្លូវលំ ភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ បានជិះម៉ូតូម៉ាកប៊ីត ពណ៌ក្រហមលាយស ស្លាកលេខ ភ្នំពេញ 1JO-2453 ចេញពីធ្វើការរោងចក្រក្នុងតំបន់សេដ្ឋកិច្ចពិសេសភ្នំពេញ (សង្កាត់កន្ទោក) ត្រឡប់ទៅផ្ទះ ស្ថិតនៅភូមិព្រៃដូនអុក(សង្កាត់ត្រពាំងក្រសាំង) ។ ពេលជិះម៉ូតូដល់ចំណុចមុខបន្ទាយទាហាន៩១១ (សង្កាត់កំបូល) ពេលនោះជនសង្ស័យចំនួន០៣នាក់ ជិះម៉ូតូ០២គ្រឿងចេញពីកន្លែងស៊ីមីឆានៅខាងមុខព្រលានយន្តហោះអន្តរជាតិភ្នំពេញ ដែលបានរៀបចំគម្រោងរួចជាស្រេចក្នុងចេញប្លន់ម៉ូតូរកលុយចាយ ដោយពួកវាក៏បានឃើញស្ត្រីរងគ្រោះ កំពុងជិះម៉ូតូតែម្នាក់ឯងដោយមានសភាពស្ងាត់ ក្រុមជនសង្ស័យបានជិះម៉ូតូតាមពីក្រោយ រហូតដល់ចំណុច ផ្លូវកែងរបងវត្តតាភេម ភូមិតាភេម (សង្កាត់កំបូល) នៅពេលនោះជនសង្ស័យម្នាក់ បើកម៉ូតូម៉ាកហុងដាសេ១២៥ ពណ៌ខ្មៅ បើកនាំមុខ ហើយពួកវា០២នាក់ទៀតជិះម៉ូតូ០១គ្រឿងបិទគូថនៅពីក្រោយ បានធ្វើសកម្មភាពបើកម៉ូតូបុកម៉ូតូរបស់ជនរងគ្រោះបណ្ដាលឱ្យដួល ហើយបក្ខពួកវាជិះម៉ូតូបិទគូថ បានបើកម៉ូតូទៅដល់ដែរ ចុះពីលើម៉ូតូយកកាំបិតកាចែតចេញពីកាបូបស្ពាយ មកភ្ជង់ជនរងគ្រោះគម្រាមមិនឱ្យស្រែក រួចជនសង្ស័យបានលើកម៉ូតូរបស់ជនរងគ្រោះ ជិះគេចខ្លួនបាត់។
លោកវរសេនីយ៍ទោ ឈឹម សាវុធ អធិការរងបានប្រាប់ឱ្យដឹងទៀតថា បន្ទាប់ពីជនសង្ស័យបានប្លន់ម៉ូតូជនរងគ្រោះបានសម្រេចនោះហើយ ជនរងគ្រោះក៏បានមកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលកំបូល ។ បន្ទាប់ពីទទួលពាក្យបណ្ដឹងរួច កម្លាំងរបស់អធិការដ្ឋាននគរបាលខណ្ឌកំបូលដឹកនាំបញ្ជាផ្ទាល់ដោយ លោកវរសេនីយ៍ឯក ហង្ស មុនី អធិការនគរបាលខណ្ឌកំបូល បានធ្វើការស្រាវជ្រាវ ដោយសហការជាមួយកម្លាំងនគរបាលខណ្ឌពោធិ៍សែនជ័យ និងកំណត់បានមុខសញ្ញាជនសង្ស័យ នៅព្រឹកថ្ងៃដដែល ក៏ឈានទៅបង្ក្រាបជនសង្ស័យចំនួន ៣នាក់ ១,ឈ្មោះ សន សុខា ហៅ ជឺត,២ឈ្មោះ អែម សុវ៉ាត់និង៣, ឈ្មោះ យ៉ែម ពិសី នៅចំណុចក្នុងបន្ទប់ជួល ភូមិជម្ពូវ័ន្ដ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ រួមទាំងម៉ូតូចំនួន ២គ្រឿង ម៉ាក់ប៊ីត ពណ៌ក្រហមលាយស (របស់ជនរងគ្រោះ) ម៉ូតូម៉ាកហុងរបស់ជនសង្ស័យ និងកាំបិតកាចែតចំនួន១ដែលជាវត្ថុតាង។
ជនសង្ស័យត្រូវបានរងការចោទប្រកាន់ពីបទ អំពើលួចមានស្ថានទម្ងន់ទោសដោយការប្រព្រឹត្តអំពើហិង្សា។ ដោយឡែក ម៉ូតូជនរងគ្រោះសមត្ថកិច្ចក៏បានប្រគល់ជូនជនរងគ្រោះវិញផងដែរ៕
