សិស្សនិស្សិត និងយុវជនតាមបណ្ដាគ្រឹះស្ថានឯកជន និងសាធារណៈរាជធានីខេត្ត គាំទ្រការហាមឃាត់កិច្ចសហការជាមួយឧស្សាហកម្មថ្នាំជក់
ភ្នំពេញ ៖ សិស្សនិស្សិតគាំទ្រសេចក្ដីណែនាំរបស់ក្រសួងអប់រំ យុវជន និងកីឡាស្ដីពីការហាមឃាត់ការប្រើប្រាស់ ការផ្សព្វផ្សាយ ការតាំងលក់ផលិតផលថ្នាំជក់ និងកិច្ចសហការជាមួយឧស្សាហកម្មថ្នាំជក់។
ការគាំទ្រនេះ ធ្វើឡើងតាមរយៈការចូលរួមរបស់សិស្សនិស្សិត និងយុវជនមកពីរាជធានីខេត្តក្នុងការប្រកួតនិយាយសាធារណៈក្រោមប្រធានបទ៖ “ហេតុអ្វីបានជាគ្រឹះស្ថានអប់រំ មិនត្រូវចាប់ដៃគូជាមួយក្រុមហ៊ុនថ្នាំជក់?” ដែលរៀបចំឡើងដោយក្រសួងអប់រំ យុវជន និងកីឡា។
បេក្ខជនដែលចូលរួមប្រកួតបានបង្ហាញថា ក្រុមហ៊ុនថ្នាំជក់មានចេតនាទាក់ទាញឱ្យមានការប្រើប្រាស់ថ្នាំជក់តាមរយៈការផ្សាយពាណិជ្ជកម្មថ្នាំជក់ ការបង្កើតផលិតផលជំនាន់ថ្មីដែលទាក់ទាញខ្លាំងចំពោះយុវជន និងការធ្វើសកម្មភាពឧបត្ថម្ភនានានិងបង្កើតទំនាក់ទំនងសាធារណៈក្នុងគ្រឹះស្ថានសិក្សា និងស្ថាប័នដទៃទៀត ដើម្បីបិទបាំងពីផលអាក្រក់នៃការប្រើប្រាស់ថ្នាំជក់។
គួរបញ្ជាក់ថា ប្រជាពលរដ្ឋកម្ពុជាស្លាប់ ១៥ ០០០នាក់ជារៀងរាល់ឆ្នាំបណ្ដាលមកពីការប្រើប្រាស់ថ្នាំជក់ ហើយកម្ពុជាខាត់បងថវិកាប្រមាណ ៦៤៩លានដុល្លារសហរដ្ឋអាមេរិក (យោងតាមរបាយការណ៍អង្គការសហប្រជាជាតិ)។
ការផ្ដូចផ្ដើមការការហាមឃាត់កិច្ចសហការជាមួយឧស្សាហកម្មថ្នាំជក់របស់ក្រសួងអប់រំ យុវជន និងកីឡាគឺជាការរួមចំណែកក្នុងការអនុវត្តអនុសញ្ញាស្ដីពីការត្រួតពិនិត្យថ្នាំជក់ដែលកម្ពុជាគឺជារដ្ឋភាគី។
នៅក្នុងវគ្គពាក់កណ្ដាលផ្ដាច់ព្រ័ត្រដែលប្រព្រឹត្តទៅនៅថ្ងៃទី ១៣ ខែកក្កដា ឆ្នាំ ២០២២នៅអាគាររដ្ឋបាលក្រសួងអប់រំ យុវជន និងកីឡា បេក្ខជនឆ្នើមទាំង១០រូបដែលត្រូវបានជ្រើសរើសចេញពីជាង៣០០នាក់ មកពីរាជធានីខេត្ត។
បេក្ខជនឆ្នើមទាំង១០រូបនេះមកពីវិទ្យាល័យជំនាន់ថ្មីគោកព្រីង ខេត្តស្វាយរៀង វិទ្យាល័យទួលទំពូង រាជធានីភ្នំពេញ វិទ្យាល័យសម្ដេចឪសម្ដេចម៉ែ ខេត្តរតនគីរី សាលា CIA FIRST រាជធានីភ្នំពេញ សាកលវិទ្យាល័យវិទ្យាសាស្រ្តសុខាភិបាល សាកលវិទ្យាល័យជាតិគ្រប់គ្រង សាកលវិទ្យាល័យប៊ែលធីអន្តរជាតិ និងរាជបណ្ឌិត្យសភាកម្ពុជា។ បេក្ខជនឆ្នើមទាំង៥រូប នឹងត្រូវជ្រើសរើសទៅវគ្គផ្ដាច់ព្រ័ត្រ៕
