ឧត្តរមានជ័យ៖ នៅថ្ងៃទី០១ ខែមិថុនា ឆ្នាំ២០២៦នេះ សាខាកាកបាទក្រហមកម្ពុជាខេត្តឧត្តរមានជ័យ បានរៀបចំពិធីមីទ្ទីងដើម្បីអបអរខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ី ប្រសិទ្ធិ ប្រធានក្រុមប្រឹក្សាខេត្ត និង ឯកឧត្តម មាន ចាន់យ៉ាដា ប្រធានគណៈកម្មាធិការសាខាកាកបាទក្រហមកម្ពុជាខេត្តឧត្តរមានជ័យ។
ក្នុងឱកាសនោះ ឯកឧត្តម មាន ចាន់យ៉ាដា បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ ឯកឧត្តម លោកជំទាវ លោក/អ្នកឧកញ៉ា និងសប្បុរសជនគ្រប់មជ្ឈដ្ឋាន ដែលបានបរិច្ចាគធនធានថវិកា និងសម្ភារៈផ្ទាល់ខ្លួន ដើម្បីទ្រទ្រង់ដល់សកម្មភាពមនុស្សធម៌របស់សាខាខេត្តនាពេលនេះ។ សកម្មភាពទាំងនេះស្តែងឱ្យឃើញពីវប្បធម៌នៃការចែករំលែក និងសាមគ្គីភាពជាតិដ៏រឹងមាំ។
ជាមួយគ្នានេះ ឯកឧត្តម មាន ចាន់យ៉ាដា សូមសម្តែងនូវការកោតសរសើរ និងវាយតម្លៃខ្ពស់ចំពោះគណៈកម្មាធិការសាខា មន្ត្រីប្រតិបត្តិ យុវជន និងអ្នកស្ម័គ្រចិត្តកាកបាទក្រហមទាំងអស់ ដែលបានខិតខំប្រឹងប្រែងមិនខ្លាចនឿយហត់ ក្នុងការចុះជួយសង្គ្រោះប្រជាពលរដ្ឋរងគ្រោះដោយគ្រោះមហន្តរាយផ្សេងៗ ដូចជា គ្រោះខ្យល់កន្ត្រាក់ ភ្លើងឆេះផ្ទះ និងគ្រួសារទីទ័លក្របានទាន់ពេលវេលា៕
