អ៊ីរ៉ង់បានចោទប្រកាន់អាមេរិកថាបានរំលោភលើបទឈប់បាញ់ បន្ទាប់ពីកងទ័ពអាមេរិកបានបើកប្រតិបត្តិការដែលខ្លួនហៅថាជា «ការវាយប្រហារការពារ» នៅភាគខាងត្បូងប្រទេសអ៊ីរ៉ង់

បរទេស៖ ប្រទេសអ៊ីរ៉ង់បានចោទប្រកាន់សហរដ្ឋអាមេរិកថាបានរំលោភលើបទឈប់បាញ់ បន្ទាប់ពីកងទ័ពអាមេរិកបានបើកប្រតិបត្តិការដែលខ្លួនហៅថាជា «ការវាយប្រហារការពារ» នៅភាគខាងត្បូងប្រទេសអ៊ីរ៉ង់ ខណៈដែលរដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ (Marco Rubio) បានថ្លែងថា ការចរចាស្វែងរកកិច្ចព្រមព្រៀងដើម្បីបញ្ចប់ជម្លោះនេះ អាចនឹង «ចំណាយពេលប៉ុន្មានថ្ងៃទៀត»។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្រសួងការបរទេសអ៊ីរ៉ង់ បានចាត់ទុកការវាយប្រហាររបស់សហរដ្ឋអាមេរិកនៅក្នុងខេត្ត Hormozgan ជាទីដែលប្រព័ន្ធផ្សព្វផ្សាយអ៊ីរ៉ង់រាយការណ៍ថាមានឮសំឡេងផ្ទុះជាច្រើនកាលពីព្រឹកថ្ងៃអង្គារ ថាជាការរំលោភបំពានយ៉ាងធ្ងន់ធ្ងរលើបទឈប់បាញ់ដ៏ផុយស្រួយ ដែលមានរយៈពេលជិត ៧សប្តាហ៍មកនេះ។ ការប៉ះទង្គិចគ្នានេះកើតឡើងស្របពេលដែលភាគីទាំងពីរហាក់បង្ហាញពីវឌ្ឍនភាពលើអនុស្សរណៈយោគយល់គ្នា ដែលអាចបញ្ឈប់សង្គ្រាម និងបើកនាវាចរណ៍នៅច្រកសមុទ្រហ័រមូសឡើងវិញ ព្រមទាំងផ្តល់ពេល ៦០ថ្ងៃសម្រាប់ការចរចាលើបញ្ហាស្មុគស្មាញផ្សេងទៀត ដូចជាកម្មវិធីនុយក្លេអ៊ែររបស់អ៊ីរ៉ង់។

យោធាអាមេរិកបានអះអាងថា ការវាយប្រហាររបស់ខ្លួនគឺសំដៅទៅលើគោលដៅនានា រួមទាំងទូកដែលព្យាយាមដាក់មីនក្នុងសមុទ្រ និងទីតាំងបាញ់មីស៊ីលរបស់អ៊ីរ៉ង់។ ថ្លែងប្រាប់អ្នកសារព័ត៌មាន លោក រូប៊ីយ៉ូ បានសង្កត់ធ្ងន់ថា ច្រកសមុទ្រហ័រមូស ត្រូវតែបើកដំណើរការឡើងវិញជាដាច់ខាត «ទោះដោយមធ្យោបាយណាក៏ដោយ»។

គួរបញ្ជាក់ថា សង្គ្រាមរវាងអាមេរិក-អ៊ីស្រាអែល និងអ៊ីរ៉ង់ បានបង្កឱ្យមានវិបត្តិផ្គត់ផ្គង់ប្រេងពិភពលោកដែលមិនធ្លាប់មានពីមុនមក ដោយធ្វើឱ្យតម្លៃប្រេង ឥន្ធនៈ ជី និងស្បៀងអាហារហក់ឡើងយ៉ាងខ្លាំង។ បច្ចុប្បន្ន នាវាដែលហ៊ានឆ្លងកាត់ច្រកសមុទ្រដ៏សំខាន់នេះ មានត្រឹមតែរាប់សិបគ្រឿងប៉ុណ្ណោះ ធៀបនឹងចន្លោះពី ១២៥ ទៅ ១៤០គ្រឿង ក្នុងមួយថ្ងៃមុនពេលសង្គ្រាមផ្ទុះឡើង។ ដំណឹងស្តីពីការវាយប្រហារថ្មីៗរបស់អាមេរិកនេះ ក៏បានរុញច្រានតម្លៃប្រេងឆៅប្រភេទ Brent ឱ្យកើនឡើងជិត ៣ភាគរយ ដល់កម្រិត ៩៨.៩១ដុល្លារក្នុងមួយធុងផងដែរ៕