រុស្ស៊ី និងចិន រិះគន់គម្រោងខែលការពារមីស៊ីល Golden Dome របស់ប្រធានាធិបតី ដូណាល់ ត្រាំ
ម៉ូស្គូ៖ បើតាមការចេញផ្សាយដោយទីភ្នាក់ងារសារព័ត៌មាន Reuters ប្រទេសរុស្ស៊ី និងចិន នៅថ្ងៃពុធនេះបានរិះគន់គម្រោងខែលការពារមីស៊ីល Golden Dome របស់ប្រធានាធិបតីអាមេរិក លោក ដូណាល់ ត្រាំ ដោយចាត់ទុកថាជាការគំរាមកំហែងដល់ស្ថិរភាពយុទ្ធសាស្ត្រ។
ប្រទេសទាំងពីរក៏បានចោទប្រកាន់ទីក្រុងវ៉ាស៊ីនតោនថា គ្មានការទទួលខុសត្រូវដែលមិនព្រមរៀបចំសន្ធិសញ្ញានុយក្លេអ៊ែរថ្មី ជំនួសសន្ធិសញ្ញាចាស់ដែលផុតកំណត់។
សេចក្តីថ្លែងការណ៍រួមនេះ ត្រូវបានធ្វើឡើងក្នុងអំឡុងពេលដែលប្រធានាធិបតីចិន លោក ស៊ី ជិនពីង ទទួលស្វាគមន៍យ៉ាងកក់ក្តៅចំពោះប្រធានាធិបតីរុស្ស៊ី លោក វ្ល៉ាឌីមៀ ពូទីន នៅទីក្រុងប៉េកាំង។
គម្រោង Golden Dome របស់អាមេរិក គឺជាផែនការពង្រីកប្រព័ន្ធការពារលើដី រួមមានមីស៊ីលស្ទាក់ចាប់ និងប្រព័ន្ធរ៉ាដា ព្រមទាំងការបន្ថែមបច្ចេកវិទ្យាអាវុធក្នុងលំហអវកាស ដែលមានសមត្ថភាពតាមដាន និងបាញ់ទម្លាក់រាល់មីស៊ីលដែលគំរាមកំហែងពីគន្លងតារាវិថី។
ចិន និងរុស្ស៊ីបានសង្កត់ធ្ងន់ថា គម្រោងសាងសង់ប្រព័ន្ធការពារមីស៊ីលពហុកម្រិតគ្មានដែនកំណត់របស់អាមេរិកនេះ គឺជាការគំរាមកំហែងយ៉ាងច្បាស់លាស់ ដែលផ្ទុយស្រឡះពីគោលការណ៍នៃរក្សាស្ថិរភាពយុទ្ធសាស្ត្រពិភពលោក៕
