រដ្ឋបាលខេត្តរតនគិរី រៀបចំទិវាជាតិប្រយុទ្ធប្រឆាំងអំពើជួញដូរមនុស្សលើកទី១៩ ក្រោមប្រធានបទ «យើងរួមគ្នាដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមអនឡាញ»
រតនគិរី៖ រដ្ឋបាលខេត្តរតនគិរី នៅថ្ងៃទី១៩ ខែឧសភា ឆ្នាំ២០២៦ បានរៀបចំទិវាជាតិប្រយុទ្ធប្រឆាំងអំពើជួញដូរមនុស្ស លើកទី១៩ ក្រោមប្រធានបទ «យើងរួមគ្នាដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមអនឡាញ» ក្រោមអធិបតីភាព ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និងឯកឧត្តម ញ៉ែម សំអឿន អភិបាលខេត្តរតនគិរី និងជាប្រធានគណ:កម្មាធិការខេត្ត ប្រយុទ្ធប្រឆាំងអំពើជួញដូរមនុស្ស។
បន្ទាប់ពីលោកជំទាវ ញាន ទិត្យចិន្តា អភិបាលរងខេត្ត និងជាអនុប្រធានអចិន្ត្រៃយ៍គណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស បានអានរបាយការណ៍សង្ខេប ស្តីពីលទ្ធផលការងារសម្រេចបាន របស់គណៈកម្មាធិការខេត្តប្រយុទ្ធប្រឆាំងអំពើជួញដូរមនុស្សរយ:ពេល ១ឆ្នាំ២០២៥ រួចមក ឯកឧត្តម ញ៉ែម សំអឿន អភិបាលខេត្តរតនគិរី បានចាត់ទុកវេទិកា នៃការជួបជុំគ្នានាឱកាសនេះ បានបង្ហាញនូវជំហរឥត ងាករេ របស់រាជរដ្ឋាភិបាល ក្នុងការគោរព និងការពារសិទ្ធិមនុស្សនៅកម្ពុជា ដោយមិនមានការ រើសអើង ស្មារតីសាមគ្គីភាព និងការយកចិត្តទុកដាក់ ចំពោះសុខសុវត្ថិភាព និងផលប្រយោជន៍ ប្រជាពលរដ្ឋ ក្នុងការប្រយុទ្ធប្រឆាំងនឹងអំពើជួញដូរមនុស្ស និងកលល្បិចដ៏ពិសពុលរបស់ជន ល្មើស គួបផ្សំនឹងការឆបោកតាមបច្ចេកវិទ្យា (Online Scams) ដ៏ទំនើប ដែលអូសទាញ មនុស្សឱ្យធ្លាក់ក្នុងភាពរងគ្រោះយ៉ាងធ្ងន់ធ្ងរ។
ឯកឧត្តម អភិបាលខេត្ត បានកោតសរសើរដោយស្មោះចំពោះស្មារតីរួម សាមគ្គី សហការគ្នាប្រកបដោយការទទួលខុសត្រូវខ្ពស់របស់ ឯកឧត្តម លោកជំទាវ លោក លោកស្រីជាថ្នាក់ដឹកនាំគ្រប់មន្ទីរ/អង្គភាព កងកម្លាំងប្រដាប់អាវុធគ្រប់អង្គភាព រដ្ឋបាលក្រុង ស្រុក រដ្ឋបាលឃុំ សង្កាត់ ប៉ុស្តិ៍នគរបាលរដ្ឋបាល សមត្ថកិច្ចពាក់ព័ន្ធ អាជ្ញាធរគ្រប់លំដាប់ថ្នាក់ អង្គការសង្គមស៊ីវិល វិស័យឯកជន និងបងប្អូនប្រជាពលរដ្ឋទាំងអស់ ដែលបានរួមសហការ ជាមួយលេខាធិការដ្ឋានខេត្ត (គ.ខ.ប.ជ) នៃគណៈកម្មាធិការប្រយុទ្ធប្រឆាំងអំពើជួញដូរមនុស្ស ខេត្ត បានធ្វើឱ្យសម្រេចនូវលទ្ធផលតាមការរំពឹងទុក។
ឯកឧត្តម ញ៉ែម សំអឿន អភិបាលខេត្តរតនគិរី បានអំពាវឱ្យថ្នាក់ដឹកនាំគ្រប់មន្ទីរ/អង្គភាព កងកម្លាំងគ្រប់កងឯកភាព រដ្ឋបាលក្រុង ស្រុក ឃុំ សង្កាត់ សូមបន្តរៀបចំការផ្សព្វព្វផ្សាយតាមគ្រប់រូបភាពផ្សេងៗនូវសារដ៏មានសារៈ សំខាន់ នៃទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ក្រោមប្រធានបទ “យើង រួមគ្នាដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមអនឡាញ” ជាការ ដាស់តឿនដល់ពលរដ្ឋ និងយុវជន ក្នុងមូលដ្ឋាន ឱ្យបានយល់ដឹង និងចូលរួមបង្ការ ទប់ស្កាត់ការប្រព្រឹត្តល្បែងស៊ីសងខុសច្បាប់ អំពើហិង្សា ការរំលោភបំពានលើស្ត្រី និងកុមារ អំពើជួញដូរមនុស្ស គ្រឿងញៀន គ្រឿងស្រវឹងគ្រប់ប្រភេទ ដែលប្រឈមដល់ការដាក់ ទោសទណ្ឌតាមច្បាប់ជាធរមាន៕
