កប៉ាល់ដឹកប្រេងខ្នាតយក្ស កំពុងធ្វើដំណើរទៅវៀតណាម ដោយដឹកប្រេងឆៅរបស់ខ្លួនចេញពីអ៉ីរ៉ាក់ បន្ទាប់ពីត្រូវឃាត់ទុកដោយកងទ័ពជើងទឹកអាមេរិកអស់ ៥ថ្ងៃ នៅឯឈូងសមុទ្រអូម៉ង់
ហាណូយ៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters ទិន្នន័យតាមដានចរាចរណ៍ដឹកជញ្ជូន LSEG បង្ហាញថា កប៉ាល់ដឹកប្រេងខ្នាតយក្ស Agios Fanourios I កំពុងធ្វើដំណើរទៅវៀតណាម ដោយដឹកប្រេងឆៅរបស់ខ្លួនចេញពីអ៉ីរ៉ាក់ បន្ទាប់ពីត្រូវឃាត់ទុក ដោយកងទ័ពជើងទឹកអាមេរិកអស់ ៥ថ្ងៃ នៅឯឈូងសមុទ្រអូម៉ង់។
កប៉ាល់ដែលដោតទង់ជាតិម៉ាល់ត៍មួយគ្រឿងនេះ បានចេញពីច្រកសមុទ្រ Hormuz កាលពីថ្ងៃទី១០ ខែឧសភា ហើយទៅដល់ឈូងសមុទ្រអូម៉ង់ មុនពេលបត់ត្រឡប់ក្រោយនៅថ្ងៃទី១១ ខែឧសភា។ Agios Fanourios I បានបន្តដំណើរទៅវៀតណាមនៅថ្ងៃទី១៦ ខែឧសភា ហើយត្រូវបានគេរំពឹងថា នឹងទៅដល់រោងចក្រចម្រាញ់ប្រេង Nghi Son នៅថ្ងៃទី៣០ ខែឧសភា។
តាមទីបញ្ជាការកណ្តាលយោធាអាមេរិក កប៉ាល់នេះត្រូវបានប្រាប់ឱ្យប្តូរទិសដៅ ជាផ្នែកមួយនៃការអនុវត្តការបិទផ្លូវប្រឆាំងនឹងអ៉ីរ៉ង់៕
