ក្រសួងប្រៃសណីយ៍ នឹងរៀបចំកម្មវិធីប្រកួតប្រជែងផលិតវីដេអូអប់រំខ្លីៗ ស្តីពីសន្តិសុខសាយប័រសម្រាប់ឆ្នាំ២០២៦
ភ្នំពេញ៖ ក្រសួងប្រៃសណីយ៍និងទូរគមនាគមន៍ (ក.ប.ទ.) បានឱ្យដឹងថា ដើម្បីឆ្លើយតបទៅនឹងការកើនឡើងពីការគំរាមកំហែងតាមអនឡាញ និងបញ្ជ្រាបចំណេះដឹងផ្នែកសន្តិសុខសាយប័រនៅកម្ពុជា ក.ប.ទ. នឹងរៀបចំកម្មវិធី “ប្រកួតប្រជែងផលិតវីដេអូអប់រំខ្លីៗស្តីពីសន្តិសុខសាយប័រសម្រាប់ឆ្នាំ ២០២៦ – Cybersecurity Short Video Competition 2026” ដើម្បីជ្រើសរើសស្នាដៃវីដេអូដែលល្អបំផុតចំនួន ១ (មួយ) ដាក់ជាតំណាងកម្ពុជាចូលរួមប្រកួតប្រជែងក្នុងកម្មវិធី ASEAN-Japan Cybersecurity Video Competition 2026។
កម្មវិធីប្រកួតនេះធ្វើឡើងក្នុងគោលបំណង ជំរុញការបញ្ជ្រាបការយល់ដឹងលើការប្រើប្រាស់បច្ចេកវិទ្យាដោយសុវត្ថិភាពតាមរយៈសិល្បៈនៃការផលិតវីដេអូអប់រំ លើកកម្ពស់ភាពច្នៃប្រឌិត និងសមត្ថភាពរបស់យុវជនក្នុងបរិបទនៃការបង្កើតមាតិកាលើបណ្ដាញសង្គម និងចូលរួមគាំទ្រកិច្ចសហប្រតិបត្តិការរួមគ្នាក្នុងការឆ្លើយតបនឹងហានិភ័យលើប្រព័ន្ធឌីជីថល ដែលជាឱកាសដល់សិស្សានុសិស្ស និងនិស្សិតកំពុងសិក្សានៅតាមគ្រឹះស្ថានអប់រំនានាក្នុងប្រទេសកម្ពុជា បានចូលរួមប្រកួតប្រជែងក្នុងការផលិតវីដេអូអប់រំខ្លីៗស្តីពីសន្តិសុខសាយប័រ។
១.លក្ខខណ្ឌនៃការចូលរួម
– ជាសិស្ស ឬនិស្សិតកំពុងសិក្សានៅ ក្នុងគ្រឹះស្ថានអប់រំប្រទេសកម្ពុជា (ចាប់ពីថ្នាក់អនុវិទ្យាល័យឡើងទៅ)
– មានអាយុក្រោម ៣០ (សាមសិប) ឆ្នាំ
– មានសញ្ជាតិខ្មែរ
– មានភាពក្លាហាន និងភាពច្នៃប្រឌិតខ្ពស់ក្នុងការផលិត និងការបង្ហោះវីដេអូជាសាធារណៈ
២.លក្ខន្តិកៈវីដេអូ
– វីដេអូត្រូវមានរយៈពេលចន្លោះពី ៣០ទៅ ៦០វិនាទី។
– ត្រូវជាស្នាដៃដើម បង្កើតឡើងដោយបេក្ខជនផ្ទាល់ (មិនចម្លងពីគេ)។
– ប្រសិនបើប្រើប្រាស់ភាសាខ្មែរ ត្រូវតែមានបញ្ចូលចំណងជើងរង (Subtitles) ជាភាសាអង់គ្លេស។ ប្រសិនបើ
ប្រើភាសាអង់គ្លេស ត្រូវតែមានបញ្ចូលចំណងជើងរង (Subtitles) ជាភាសាខ្មែរ។
– ត្រូវដាក់បញ្ចូលឈ្មោះសាមីខ្លួន និងឈ្មោះសាលា ឬគ្រឹះស្ថានសិក្សាដែលបេក្ខជនកំពុងសិក្សាខាងចុងវីដេអូ។
– ត្រូវបង្ហោះជាសាធារណៈ (Public) នៅលើបណ្ដាញសង្គមផ្ទាល់ខ្លួនទាំងហ្វេសបុក (Facebook) និង
តិកតុក (TikTok)។
៣.ជម្រើសប្រធានបទ
– បេក្ខជនអាចជ្រើសរើសយកប្រធានបទមួយក្នុងចំណោមប្រធានបទខាងក្រោម៖
– ការបោកបញ្ឆោតតាមបែបចិត្តសាស្ត្រ (Social Engineering)
– ការបោកបន្លំផ្ទេរប្រាក់ (Money Mule)
– បញ្ញាសិប្បនិម្មិត (Artificial Intelligence)
– ការធ្វើបាបតាមប្រព័ន្ធអ៊ីនធឺណិត (Cyberbullying)
– ការបោកបញ្ឆោតតាមរយៈកូដ QR (QR Code Phishing ឬ Quishing)
– សុវត្ថិភាពសាយប័រសម្រាប់មនុស្សចាស់ ឬមនុស្សវ័យចំណាស់ (Cyber Safety for Seniors)
– អ៊ីនធឺណិតនៃវត្ថុ (Internet of Things ឬ IoT)
– ឧបករណ៍ឆ្លាតវៃ (Smart Devices)
– ឬប្រធានបទផ្សេងៗដែលទាក់ទងនឹងសន្តិសុខសាយប័រ។
៤.អត្ថប្រយោជន៍នៃការប្រកួតប្រជែង
ក.ប.ទ. នឹងជ្រើសរើសជ័យលាភីចំនួន ៣ (បី) វីដេអូ ៖
– ជ័យលាភីលេខ ១ នឹងទទួលបានប្រាក់រង្វាន់ចំនួន ២,០០០,០០០ (ពីរលាន) រៀល
– ជ័យលាភីលេខ ២ នឹងទទួលបានប្រាក់រង្វាន់ចំនួន ១ ,000,000 (មួយលាន) រៀល
– ជ័យលាភីលេខ ៣ នឹងទទួលបានប្រាក់រង្វាន់ចំនួន ៦ 00,000 (ប្រាំមួយសែន) រៀល
៥.លក្ខណៈវិនិច្ឆ័យនៃការដាក់ពិន្ទុ
– ខ្លឹមសារ ៥០% (Message) ៖ អត្ថន័យ និងសារអប់រំអំពីសន្តិសុខសាយប័រមានភាពច្បាស់លាស់ និង
វិសាលភាពទូលំទូលាយទៅកាន់អ្នកប្រើប្រាស់ទូទៅ។
– ភាពច្នៃប្រឌិត ២៥% (Creativity) ៖ បង្ហាញនូវគំនិតថ្មីប្លែក និងវិធីសាស្ត្រក្នុងការរៀបចំសាច់រឿង ឬ
និទានរឿងមានភាពប៉ិនប្រសប់។
– គុណភាពបច្ចេកទេស ២៥% (Quality)៖ កម្រិតគុណភាពបច្ចេកទេសនៃការថត ការកាត់តសំឡេង ពន្លឺ
មាន ភាពច្បាស់ល្អ។
៦.កាលបរិចេ្ឆទ និងនីតិវិធីនៃការជ្រើសរើស
– សិស្សានុសិស្ស និងនិស្សិតទាំងអស់ត្រូវដាក់ពាក្យចូលរួមការប្រកួតតាមរយៈ https://go.gov.kh/mptc/csvc2026 ចាប់ពីថ្ងៃជូនដំណឹងនេះរហូតដល់ថ្ងៃទី១៧ ខែកក្កដា ឆ្នាំ២០២៦ វេលាម៉ោង ២៣:៥៩នាទី
– ការប្រកាសលទ្ធផលនឹងប្រព្រឹត្តនៅថ្ងៃទី១០ ខែសីហា ឆ្នាំ២០២៦។ ព័ត៌មានលម្អិតនៃទីតាំង និងកាលវិភាគ
នឹងត្រូវផ្ញើទៅកាន់បេក្ខជនផ្ទាល់។
សម្រាប់ព័ត៌មានបន្ថែមសូមទាក់ទងតាមរយៈលេខទូរសព្ទ 017 916 208៕
