ឯកឧត្តម ហ៊ុន ម៉ាណែត៖ ការភ្ជាប់គ្នារវាងទ្រឹស្តីសាសនា និងការប្រតិបត្តិជាក់ស្តែង នៅក្នុងសង្គម គឺជាការចាំបាច់ មិនអាចខ្វះគ្នាបានឡើយ

ភ្នំពេញ៖ ឯកឧត្តម ឧត្តមសេនីយ៏ឯក ហ៊ុន ម៉ាណែត អគ្គមេបញ្ជាការរង អគ្គមេបញ្ជាការរង នៃកងយោធភូមិន្ទ មេបញ្ជាការកងទ័ពជើងគោក បានមានប្រសាសន៍ថា ការភ្ជាប់គ្នារវាងទ្រឹស្តីសាសនា និងការប្រតិបត្តិឥរិយាបទជាក់ស្តែង នៅក្នុងសង្គម គឺការចាំបាច់ មិនអាចខ្វះគ្នាបានឡើយ។

ឯកឧត្តមមានប្រសាសន៍បែបនេះក្នុងពេល តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ក្នុងពិធីបុណ្យបញ្ចុះ ខណ្ឌសីមាព្រះវិហារថ្មី និងសម្ពោធឆ្លងសមិទ្ធផលនានា ក្នុងវត្តព្រះពុទ្ធឃោសាចារ្យ ស្ថិតនៅភូមិទួលតាហោ ឃុំគងជ័យ ស្រុកអូររាំងឪ ខេត្តត្បូងឃ្មុំ, ថ្ងៃទី១០ ខែកក្កដា ឆ្នាំ២០២២។

ឯកឧត្តម ហ៊ុន ម៉ាណែត សូមចូលរួមអនុមោទនាត្រេកអរចំពោះការទទួលបានសមិទ្ធផលថ្មី បន្ថែមទៀតនៅក្នុងទីអារាមនេះ ដើម្បីតម្កល់ទុកក្នុងព្រះពុទ្ធសាសនា ក៏ដូចសម្រាប់ការប្រើប្រាស់ជួបជុំធ្វើបុណ្យទានរបស់បងប្អូនប្រជាពលរដ្ឋជាពុទ្ធបរិស័ទទៅតាមគន្លងប្រពៃណីសាសនានៃយើង។

ឯកឧត្តមបន្តថា សមិទ្ធផលថ្មីៗក្នុងវិស័យពុទ្ធចក្រទាំងនេះ បានកើតឡើងពីផលនៃសុខសន្តិភាព ដែលបានបង្កលក្ខណៈដល់ការអនុវត្តសិទ្ធិសេរីភាពរបស់ប្រជាពលរដ្ឋទាំងផ្នែកសង្គម សេដ្ឋកិច្ច និងជំនឿសាសនា ហើយដែលសំខាន់នោះ គឺបានស្តែងឱ្យឃើញនូវកម្លាំងសាមគ្គីធម៌របស់ព្រះសង្ឃ គណៈកម្មការ អាចារ្យវត្ត និងពុទ្ធបរិស័ទពីទីជិតឆ្ងាយ ក្នុងការរួមគ្នាបំពេញបុណ្យកុសលតាមរយៈ ការចូលរួមកសាងសមិទ្ធផលនានាប្រកបដោយទឹកចិត្តសប្បាយរីករាយ និងសទ្ធាជ្រះថ្លា ដូចទៅនឹងអ្វីដែលប្រជាជនកម្ពុជាតែបានប៉ងប្រាថ្នារហូតមក គឺការរស់នៅក្នុងសង្គម ប្រកបដោយសន្តិភាព សុខដុមរមនា និងសុខសាន្ត។

ឯកឧត្ដម បញ្ជាក់ថា “ការភ្ជាប់គ្នារវាងទ្រឹស្តីសាសនា និងការប្រតិបត្តិឥរិយាបទជាក់ស្តែងនៅក្នុងសង្គម គឺការចាំបាច់ និងមិនអាចខ្វះគ្នាបានឡើយ ជាពិសេសការបង្រៀនរបស់សាសនាឱ្យមនុស្ស ចេះស្គាល់សច្ចភាព, សុច្ចរិតភាព, បុណ្យបាប ក៏ដូចជាគោលការណ៍សីលធម៌ គុណធម៌ និងការគោរពស្រឡាញ់ឱ្យតម្លៃគ្នាទៅវិញទៅមក។ មេដឹកនាំដែលពុំមានធម៌ក្នុងខ្លួន គឺនឹងធ្វើឱ្យប្រទេសជាតិ និងប្រជាជនរងទុក្ខវេទនា ដូចដែលធ្លាប់បានឆ្លងកាត់រួចមក ហើយនៅក្នុងរបបប៉ុលពត”៕