ឯកឧត្តមទេសរដ្ឋមន្ត្រី សក់ សេដ្ឋា អញ្ជើញដឹកនាំគណៈប្រតិភូកម្ពុជា ទស្សនកិច្ចសិក្សាស្វែងយល់អំពីការគ្រប់គ្រងរដ្ឋបាលថ្នាក់ក្រោមជាតិ នៅខេត្តអូសាកា និងក្រុងណាហ្គាអូកាខ្យូ នៃប្រទេសជប៉ុន

ជប៉ុន៖ នៅថ្ងៃទី២០ ខែមេសា ឆ្នាំ២០២៦ ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍ នៃ គ.ជ.អ.ប. បានអញ្ជើញដឹកនាំគណៈប្រតិភូកម្ពុជាមកពីតំណាងក្រសួងមហាផ្ទៃ ក្រសួងមុខងារសាធារណៈ និងក្រសួងសេដ្ឋកិច្ចនិងហិរញ្ញវត្ថុ ព្រមទាំងមន្ត្រីជំនាញមួយចំនួន ធ្វើទស្សនកិច្ចសិក្សានៅប្រទេសជប៉ុនដើម្បីស្វែងយល់អំពីការគ្រប់គ្រងទីក្រុងមេត្រូប៉ូលីតែន។

ក្នុងដំណើរទស្សនកិច្ចសិក្សានាថ្ងៃទី២០ ខែមេសា ឆ្នាំ២០២៦នេះដែរ សម្រាប់ពេលព្រឹក គណៈប្រតិភូកម្ពុជាបានទៅទស្សនកិច្ចសិក្សានៅខេត្តអូសាកា នៃប្រទេសជប៉ុន ដើម្បីស្វែងយល់អំពីប្រព័ន្ធគ្រប់គ្រងរដ្ឋបាលខេត្តអូសាកា ការគ្រប់គ្រងក្រុងពិសេស (Designated City) និងការស្នើរៀបចំខេត្តអូសាកាឱ្យក្លាយទៅជាទីក្រុងមេត្រូប៉ូលីតែនបន្ទាប់ពីទីក្រុងតូក្យូ។ ជាមួយគ្នានេះ នៅរសៀលថ្ងៃដដែល គណៈប្រតិភូក៏បានបន្តដំណើរទៅទស្សនកិច្ចក្រុងណាហ្គាអូកាក្យូ នៃខេត្តក្យូតុ នៃប្រទេស ដើម្បីសិក្សាស្វែងយល់លើការរៀបចំផែនការអភិវឌ្ឍន៍រយៈពេលវែង និងការលើកកម្ពស់ឌីជីថលក្នុងការបង្កើនការចូលរួមរបស់ប្រជាពលរដ្ឋ ការបង្កើនប្រសិទ្ធភាពនៃការផ្តល់សេវា និងការដោះស្រាយបញ្ហានានាជូនប្រជាពលរដ្ឋ ព្រមទាំងបានទស្សនកិច្ចនៅមជ្ឈមណ្ឌលមើលថែកុមារដែលមានការលូតលាស់យឺត និងមជ្ឈមណ្ឌលសម្រាប់ថែទាំមនុស្សចាស់ផងដែរ។

សូមជម្រាបជូនថា ដើម្បីអនុវត្តកំណែទម្រង់វិមជ្ឈការនិងវិសហមជ្ឈការនៅកម្ពុជាឱ្យកាន់តែស៊ីជម្រៅបន្ថែមទៀត គណៈប្រតិភូកម្ពុជាដែលដឹកនាំដោយ ឯកឧត្តម សក់ សេដ្ឋា បានធ្វើដំណើរទស្សនកិច្ចសិក្សា និងដកស្រង់បទពិសោធនៅបណ្ដាប្រទេសជាច្រើន រួមទាំងប្រទេសនៅក្នុងតំបន់ និងបណ្ដាប្រទេសទំនើបៗផ្សេងទៀត ហើយការធ្វើដំណើរទស្សនកិច្ចសិក្សានៅប្រទេសជប៉ុននាពេលនេះ មានរយៈពេល៨ថ្ងៃ ចាប់ពីថ្ងៃទី១៨ ខែមេសា ដល់ថ្ងៃទី២៥ ខែមេសា ឆ្នាំ២០២៦៕