គួរឲ្យសង្វេគ! បុរសម្នាក់ស្រវឹងស្រា បើកឡានទំនើប បុកម៉ូតូពីក្រោយអូសជាច្រើនម៉ែត្រ បណ្ដាលឲ្យប្ដីប្រពន្ធ ២នាក់ស្លាប់ភ្លាមៗ

ភ្នំពេញ៖ ប្ដីប្រពន្ធមួយគូរបានស្លាប់ភ្លាមៗនៅនឹងកន្លែង បន្ទាប់ពីបុរសម្នាក់ទំនងជាស្រវឹងស្រាបើករថយន្តស៊េរីទំនើបយ៉ាងលឿនជ្រុលទៅបុកម៉ូតូពីក្រោយពេញទំហឹង ផ្លោងទៅមុខជាច្រើនម៉ែត្រ កាលពីវេលារំលងអធ្រាតឈានចូលថ្ងៃទី ៩ ខែកក្កដាឆ្នាំ ២០២២ ស្ថិតនៅតាមបណ្ដោយផ្លូវជាតិលេខ ៦ ក្នុងសង្កាត់បាក់ខែង ខណ្ឌជ្រោយចង្វា រាជធានីភ្នំពេញ។

សមត្ថកិច្ចបានឲ្យដឹងថា សពបុរសជាប្តី មានឈ្មោះអ៊ន អុន អាយុ៤៩ឆ្នាំ មានស្រុកកំណើតនៅភូមិព្រៃដើមថ្នឹង ឃុំព្រៃដើមថ្នឹង ស្រុងស៊ីធរកណ្តាល ខេត្តព្រៃវែង។ ចំណែកសពស្រ្តីជាប្រពន្ធ មានឈ្មោះភួង ស្រីយ័ន្ត អាយុ៤៨ឆ្នាំ។

តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញប្តីប្រពន្ធ២នាក់ ជិះម៉ូតូម៉ាកហុងដាវ៉េវ ពណ៌ខ្មៅពាក់ស្លាកលេខ កំពង់ឆ្នាំង 1C-6183 ជិះឌុបគ្នាតាមបណ្តោយផ្លូវជាតិលេខ៦ ទិសដៅពីលិចទៅកើត គោលបំណងជិះចេញពីភ្នំពេញត្រឡប់ទៅស្រុកកំណើត ខណះមកដល់ចំណុចកើតហេតុ ស្រាប់តែគេឃើញមានបុរសម្នាក់ ទំនងជាស្រវឹងស្រាបានបើករថយន្តស៊េរីទំនើបម៉ា Mecerdes G63 ពណ៌ខ្មៅពាក់ស្លាកលេខ កម្ពុជាHL.800 បើកតាមបណ្តោយផ្លូវជាតិលេខ៦ ទិសដៅស្របគ្នាយ៉ាងលឿន បានជ្រុលទៅបុកម៉ូតូពីក្រោយពេញទំហឹង ប៉ើងទៅមុខជាច្រើនម៉ែត្របណ្តាលឲ្យពីរនាក់ប្តីប្រពន្ធស្លាប់នៅនឹងកន្លែង ចំណែករថយន្តនៅមិនទាន់អស់ល្បឿនបានជ្រុលទៅបុកផ្ទប់រថយន្តដឹកទំនិញ២គ្រឿងទៀត ដែលចតនៅលើចិញ្ចើមផ្លូវ ចំពីក្រោយពេញទំហឹងរងការខូចខាតខ្ទេចមួយកំណាត់មុខ ភ្លាមៗនោះដែរ សមត្ថកិច្ចបានឃាត់ម្ចាស់រថយន្ត នៅនឹងកន្លែងកើតផងដែរ ។

បន្ទាប់ពីកើតហេតុសមត្ថកិច្ចមូលដ្ឋានចុះមកដល់បានទំនាក់ទំនងទៅមត្ថកិច្ចជំនាញចរាចរណ៍ចុះមកវាស់វែងស្ទូចយករថយន្តបង្កនឹងម៉ូតូរងគ្រោះ ទៅរក្សាទុកនៅខាងការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយគ្នានៅពេលក្រោយ ។ ចំណែកសពប្ដីប្រពន្ធពីរនាក់ខាងលើ សមត្ថកិច្ចបានស្រាវជ្រាវរកសាច់ញាតិឲ្យមកទទួលយកទៅធ្វើបុណ្យតាមប្រពៃណី ៕