ភ្នំពេញ៖ យោងតាមការសង្កេត និងរបាយការណ៍អាជ្ញាធរ បរិមាណសំរាមប្រមូលបាននៅរាជធានីភ្នំពេញ ក្នុងថ្ងៃទី១៤ ខែមេសា ឆ្នាំ២០២៦ ដែលជាថ្ងៃទី១ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៦ មានចំនួនប្រមាណ ២ ៦០៩ តោន។ បរិមាណសំរាមបានធ្លាក់ចុះ ៣៨% ធៀបនឹងបរិមាណសំរាមប្រមូលបានប្រចាំថ្ងៃ នៅរាជធានីភ្នំពេញ។ ជាមួយគ្នានេះ បរិមាណសំរាមប្រមូលបាននៅថ្ងៃដដែលនេះ (ថ្ងៃចូលឆ្នាំទី១) មានការកើនឡើង១៦% ធៀបនឹងថ្ងៃចូលឆ្នាំថ្ងៃទី១ ក្នុងឆ្នាំ២០២៥។
អ្នកនាំពាក្យក្រសួងបរិស្ថាន ឯកឧត្តមខ្វៃ អាទិត្យា បានឱ្យដឹងថា ការថយចុះនេះ ដោយសារតែប្រជាពលរដ្ឋមានការយល់ដឹងច្រើនជាងមុន ក្នុងការទុកដាក់សំរាម កាត់បន្ថយការប្រើប្រាស់ថង់ប្លាស្ទិក និងចូលរួមសម្អាតបរិស្ថាន នៅតាមទីសាធារណៈ និងនៅតាមមូលដ្ឋានរស់បានស្អាត។ លើសពីនេះ ការចូលរួមសកម្មភាពពីអ្នកពាក់ព័ន្ធ រាប់តាំងពីមន្រ្តីក្រសួងបរិស្ថាន មន្ទីរបរិស្ថានរាជធានី ខេត្ត រដ្ឋបាលថ្នាក់ក្រោមជាតិគ្រប់ជាន់ថ្នាក់ រួមជាមួយ អាជ្ញាធរមូលដ្ឋាន យុវជន: និងអង្គការសង្គមស៊ីវិល វិស័យឯកជន អ្នកមកចូលរួមដើរកម្សាន្តក្នុងពិធីបុណ្យ បានសំដែងការសប្បាយរីករាយ និងចូលរួមយ៉ាងសស្រាក់សស្រាំ ក្នុងការចុះផ្សព្វផ្សាយ ដើររើសសំរាម សម្អាតអនាម័យបរិស្ថានតាមទីកម្សាន្តនានា ជំរុញសកម្មភាពការទុកដាក់សំរាមឱ្យបានត្រឹមត្រូវ និងការកាត់បន្ថយការប្រើប្រាស់ប្លាស្ទិកជាដើម។
អ្នកនាំពាក្យក្រសួងបរិស្ថាន បានលើកឡើងថា ការផ្លាស់ប្តូរផ្នត់គំនិតនេះ ជាសញ្ញាវិជ្ជមានសម្រាប់បរិស្ថាននៅកម្ពុជា៕
