Online Investment Scam ការក្លែងបន្លំជាស្ថាប័នធនាគារ ដើម្បីឱ្យជនរងគ្រោះវិនិយោគរូបិយប័ណ្ណក្លែងក្លាយ !

ភ្នំពេញ៖ ជាការពិតណាស់ Telegram ជាបណ្តាញទំនាក់ទំនងសង្គមដ៏ពេញនិយមបំផុតក្នុងសម័យកាលឌីជីថលនេះ ។ ទន្ទឹមនឹងនេះ Telegram បានក្លាយជាគោលដៅរបស់ក្រុមឧក្រិដ្ឋជនបច្ចេកវិទ្យាក្នុងការបោកប្រាស់ក្លែងបន្លំជនរងគ្រោះផងដែរ ។

ថ្មីៗនេះ ក្រុមការងារបច្ចេកទេសបានសង្កេតឃើញ ក្រុមឧក្រិដ្ឋជន បច្ចេកវិទ្យា ប្រើប្រាស់ឧបាយកលបោកប្រាស់ដោយបង្កើតជាគ្រុប ប្រើប្រាស់រូបភាពថ្នាក់ដឹកនាំកំពូលៗ និងក្លែងបន្លំជាស្ថាប័នធនាគារក្នុងគោលបំណងអូសទាញជនរងគ្រោះឱ្យវិនិយោគជាមួយ Platform ក្លែងក្លាយ នៅលើបណ្តាញទំនាក់ទំនង Telegram ៖

វិធីសាស្ត្រ របស់ក្រុមឧក្រិដ្ឋជនប្រើប្រាស់:
– ប្រើប្រាស់កម្មវិធីចុះឈ្មោះ ឬ Platform ក្លែងក្លាយ
– បង្កើត Group និងគណនីក្លែងក្លាយដោយប្រើប្រាស់រូបភាពថ្នាក់ដឹកនាំលើបណ្តាញទំនាក់ទំនង Telegram
– អូសទាញជនរងគ្រោះឱ្យចុះឈ្មោះ ដាក់ប្រាក់វិនិយោគលើ Platform ក្លែងក្លាយ
– លួចយក ឬដកប្រាក់ជនរងគ្រោះដោយសម្ងាត់
វិធីសាស្ត្រការពារខ្លួន សូមអនុវត្តតាមការណែនាំដូចខាងក្រោម៖
– ពិភាក្សាជាមួយក្រុមគ្រួសារ ឬប្រឹក្សាជាមួយស្ថាប័នជំនាញមុននឹងសម្រេចចិត្តដាក់ប្រាក់វិនិយោគ
– ត្រួតពិនិត្យ និងសិក្សា ស្រាវជ្រាវ ឈ្វេងយល់អំពី Platform វិនិយោគឱ្យបានច្បាស់លាស់មុននឹងសម្រេចចិត្តដាក់ប្រាក់វិនិយោគ
សូមរាយការណ៍មកកាន់សមត្ថកិច្ចជំនាញ ប្រសិនបើលោកអ្នកជួបប្រទះករណីខាងលើ៕