លោក ដូណាល់ ត្រាំ ព្រមានថា ស្ពាននានាព្រមទាំងហេដ្ឋារចនាសម្ព័ន្ធថាមពលរបស់អ៉ីរ៉ង់ កំពុងស្ថិតក្រោមគោលដៅរបស់លោក
បរទេស៖ បើតាមការចេញផ្សាយដោយ ទីភ្នាក់ងារព័ត៌មាន AFP កាលពីថ្ងៃព្រហស្បតិ៍ ទី២ ខែមេសា ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា យោធាអាមេរិក មិនទាន់ទាំងចាប់ផ្តើមនៅឡើយទេ នូវការបំផ្លិចបំផ្លាញអ្វីដែលនៅសេសសល់ក្នុងប្រទេសអ៉ីរ៉ង់ ដោយព្រមានថា ស្ពាននានាព្រមទាំងហេដ្ឋារចនាសម្ព័ន្ធថាមពលរបស់អ៉ីរ៉ង់ កំពុងស្ថិតក្រោមគោលដៅរបស់លោក។
ប៉ុន្មានម៉ោងក្រោយលោកបានអះអាងថា ស្ពានខ្ពស់បំផុតរបស់អ៉ីរ៉ង់ត្រូវបានកម្ទេច លោកប្រធានាធិបតីអាមេរិក បានបង្ហោះសារនៅលើបណ្តាញសង្គម Truth Social ថា យោធាអាមេរិកមិនទាន់ទាំងចាប់ផ្តើមបំផ្លាញ អ្វីដែលនៅសេសសល់ក្នុងប្រទេសអ៉ីរ៉ង់នៅឡើយទេ ខណៈស្ពាននានាដទៃទៀតគឺជាគោលដៅជាបន្ទាប់ ហើយបន្ទាប់ពីនោះ គឺរោងចក្រថាមពលអគ្គិសនី។
គួរបញ្ជាក់ថា លោក ត្រាំ ធ្លាប់អះអាងជាដដែលៗថា គោលដៅយោធាសំខាន់ៗភាគច្រើននៅអ៉ីរ៉ង់ គឺត្រូវបានធ្វើឱ្យខូចខាត ឬបំផ្លាញចោល អំឡុងសង្រ្គាមជាង ១ខែមកនេះ។ ក្នុងការបង្ហោះសារខាងលើ លោក ត្រាំ ក៏បានបន្តទាមទារផងដែរឱ្យទីក្រុងតេហេរ៉ង់ ទទួលយកកិច្ចព្រមព្រៀងឱ្យឆាប់ៗជាមួយទីក្រុងវ៉ាស៊ីនតោន ដើម្បីស្វែងរកបទឈប់បាញ់៕
