ចិនដាក់ទណ្ឌកម្មលើសមាជិកសភាជប៉ុន លោក Keiji Furuya ដោយចោទថា គប់គិតជាមួយចលនាចង់បានឯករាជ្យនៅតៃវ៉ាន់

ប៉េកាំង៖ បើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី៣០ ខែមីនា ឆ្នាំ២០២៦ ចិនបានប្រកាសដាក់ទណ្ឌកម្មលើសមាជិកសភាជប៉ុន លោក Keiji Furuya ដែលមានទំនាក់ទំនងជិតស្និទ្ធ ជាមួយនាយករដ្ឋមន្រ្តីជប៉ុន លោកស្រី Sanae Takaichi ដោយចោទថា រូបលោកគប់គិតជាមួយចលនាចង់បានឯករាជ្យនៅតៃវ៉ាន់។

ក្រសួងការបរទេសចិន បាននិយាយថា ទីក្រុងប៉េកាំង នឹងហាមឃាត់មិនឱ្យលោក Furuya ឈានជើងចូលទឹកដីចិន ហើយបង្កកចលនទ្រព្យ ក៏ដូចជាទ្រព្យសម្បត្តិដទៃទៀតរបស់លោក នៅក្នុងប្រទេសចិន គិតចាប់ពីពេលនេះតទៅ។ ក្រសួងការបរទេសចិន បានចោទប្រកាន់លោក Furuya ថាគប់គិតជាមួយកម្លាំងបំបែករដ្ឋនៅតៃវ៉ាន់។

លោក Furuya ក្នុងនាមជាប្រធានក្រុមសមាជិកសភាជប៉ុនចម្រុះបក្ស ដែលលើកកម្ពស់កិច្ចសហប្រតិបត្តិការជប៉ុន-តៃវ៉ាន់ ធ្លាប់បំពេញទស្សនកិច្ចជាច្រើនលើក ដោយអមដំណើរថ្នាក់ដឹកនាំនយោបាយជប៉ុន ទៅកាន់កោះតៃវ៉ាន់ ហើយទស្សនកិច្ចថ្មីចុងក្រោយបង្អស់ ទើបតែត្រូវបានធ្វើឡើងក្នុងខែមីនានេះ ដើម្បីជួបជាមួយមេដឹកនាំកោះតៃវ៉ាន់ លោក Lai Ching-te នៅទីក្រុងតៃប៉ិ។

ឆ្លើយតបការដាក់ទណ្ឌកម្ម លោក Furuya បាននិយាយថា ការធ្វើទស្សនកិច្ចទៅកាន់តៃវ៉ាន់ គឺជាការងារធម្មតានៃក្រុមសមាជិកសភាដែលលោកដឹកនាំ ហើយលោកបានបន្ថែមទៀតថា រូបលោកមិនដែលធ្វើដំណើរទៅចិន រាប់ទសវត្សរ៍មកហើយ និងពុំមានទ្រព្យសម្បត្តិអ្វីនៅទីនោះទេ។ លោក Furuya ក៏មានទំនាក់ទំនងជិតស្និទ្ធជាមួយ លោកស្រី Takaichi ផងដែរ ដោយគាំទ្រការជាប់ឆ្នោតរបស់លោកស្រី ជាមេដឹកនាំគណបក្សកាន់អំណាច LDP កាលពីឆ្នាំមុន។

គួរបញ្ជាក់ថា ចំណងទាក់ទងរវាងទីក្រុងតូក្យូនិងទីក្រុងប៉េកាំង បានធ្លាក់ដុនដាបយ៉ាងខ្លាំង ចាប់តាំងពីលោកស្រី Takaichi បានលើកឡើងថា ក្នុងករណីចិនវាយប្រហារលើតៃវ៉ាន់ ជប៉ុនអាចនឹងត្រូវបង្ខំចិត្តធ្វើអន្តរាគមន៍យោធា៕