ប្រធានក្រុម សមាជិកព្រឹទ្ធសភាប្រចាំភូមិភាគទី៦ ផ្តាំផ្ញើដល់អាជ្ញាធរពាក់ព័ន្ធ ក្រុមប្រឹក្សាឃុំ សូមបន្តចូលរួមលើកកម្ពស់ការផ្តល់សេវាសាធារណៈ និងការអភិវឌ្ឍន៍មូលដ្ឋានឱ្យកាន់តែល្អប្រសើរ

ព្រៃវែង៖ ក្នុងឱកាសចុះជួបសំណេះសំណាលជាមួយអាជ្ញាធរពាក់ព័ន្ធ និងសមាជិកក្រុមប្រឹក្សាឃុំ ក្នុងស្រុកកំចាយមារ ខេត្តព្រៃវែង សរុបចំនួន៦៧នាក់ នាព្រឹកថ្ងៃទី១៣ ខែមីនា ឆ្នាំ២០២៦ លោកជំទាវ មាន សំអាន ប្រធានក្រុម សមាជិកព្រឹទ្ធសភាប្រចាំភូមិភាគទី៦  បានផ្តាំផ្ញើដល់អាជ្ញាធរពាក់ព័ន្ធ និងសមាជិកក្រុមប្រឹក្សាឃុំ សូមបន្តចូលរួមលើកកម្ពស់ការផ្តល់សេវាសាធារណៈ និងការអភិវឌ្ឍន៍មូលដ្ឋានឱ្យកាន់តែល្អប្រសើរជូនដល់បងប្អូនប្រជាពលរដ្ឋ។

ក្នុងឱកាសនោះ លោកជំទាវប្រធានក្រុម ក៏បាននាំនូវការផ្តាំផ្ញើសួរសុខទុក្ខពីសំណាក់ថ្នាក់ដឹកនាំព្រឹទ្ធសភា ជូនចំពោះអាជ្ញាធរពាក់ព័ន្ធ ក្រុមប្រឹក្សាឃុំ និងប្រជាពលរដ្ឋស្រុក កំចាយមារ ខេត្តព្រៃវែង ប្រកបដោយក្តីនឹករលឹកបំផុត។

លោកជំទាវបានជម្រាបជូនពីគោលបំណងជួបសំណេះសំណាលនាពេលនេះ គឺដើម្បីជួបផ្ទាល់ជាមួយអង្គបោះឆ្នោតដែលជាក្រុមប្រឹក្សាឃុំ និងចែករំលែកនូវព័ត៌មាន ពីគ្នាទៅវិញទៅមក ស្វែងយល់ការអនុវត្តតួនាទី ភារកិច្ចរបស់ក្រុមប្រឹក្សាឃុំ ស្តាប់ផ្ទាល់អំពីវឌ្ឍនភាពការងារ បញ្ហាប្រឈម សំណូមពរ ឬតម្រូវការជាអាទិភាព ទិសដៅ និងការប្តេជ្ញាចិត្តអ្វីខ្លះ ក្នុងការអនុវត្តគោលនយោបាយអភិវឌ្ឍន៍ឃុំ សង្កាត់ក្នុងឆ្នាំ២០២២-២០២៧ ដែលឃុំនីមួយៗបានដាក់ចេញនាពេលកន្លងមក ផ្លាស់ប្តូរយោបល់រួមគ្នាដោះស្រាយបញ្ហាប្រឈម និងសំណូមពរនានា ជូនប្រជាពលរដ្ឋឱ្យបានទាន់ពេលវេលា ប្រកបដោយតម្លាភាព ប្រសិទ្ធភាព និងគណនេយ្យភាពឱ្យកាន់តែល្អប្រសើរ ពិសេសសំដៅកាត់បន្ថយភាពក្រីក្រ និងលើកកម្ពស់ជីវភាពរស់នៅជូនប្រជាពលរដ្ឋ។ ចំពោះបញ្ហាព្រំដែន សូមបងប្អូនប្រជាពលរដ្ឋមានការជឿជាក់ទៅលើសមត្ថភាពរបស់រាជរដ្ឋាភិបាល និងកងកម្លាំងប្រដាប់អាវុធរបស់យើង ក្នុងគ្រាដ៏លំបាកនេះទៅលើវិញ្ញាសាធំៗ ដូចជាបញ្ហាជម្លោះព្រំដែនកម្ពុជា-ថៃ  និងសភាពការណ៍វិបត្តិនយោបាយថ្មីៗនៅអន្តរជាតិ ដែលធ្វើឱ្យមានការប៉ះពាល់ដល់សេដ្ឋកិច្ចជាតិរបស់យើងផងដែរ។ ជាមួយគ្នានេះដែរ ចំពោះសំណើ សំណូមពរ ដែលបានលើកឡើងរបស់ក្រុមប្រឹក្សាឃុំ ពាក់ព័ន្ធនឹងបញ្ហាផ្សេងៗ ក្រុមសមាជិកព្រឹទ្ធសភាប្រចាំភូមិភាគទី៦ និងដកស្រង់ធ្វើនូវរបាយការណ៍ ដើម្បីគោរពជូនដល់គណៈកម្មាធិការអចិន្ត្រៃយ៍ព្រឹទ្ធសភា និងស្នើសុំគោលការណ៍ឯកភាពពីថ្នាក់ដឹកនាំព្រឹទ្ធសភា ដើម្បីធ្វើសំណើទៅក្រសួង ស្ថាប័ន អង្គភាពជំនាញពាក់ព័ន្ធនានា ដើម្បីចូលរួមគ្នាជួយដោះស្រាយ៕