សមាជិក សភា កំពូល របស់ ចិន ជួប ពិភាក្សា ជាមួយ ប្រធាន ព្រឹទ្ធសភា អ៊ូសបេគីស្ថាន
ប៉េកាំង៖ សមាជិកសភាកំពូលរបស់ប្រទេសចិន លោក Li Zhanshu បានជួបពិភាក្សាជាមួយលោក Tanzila Narbayeva ប្រធានព្រឹទ្ធសភានៃប្រទេសអ៊ូសបេគីស្ថាន តាមរយៈ តំណភ្ជាប់វីដេអូ ដោយភាគីទាំងពីរបានយល់ព្រមបង្កើនការផ្លាស់ប្តូរសភា ដើម្បីជួយសម្រួល ដល់ការអភិវឌ្ឍន៍ទំនាក់ទំនងទ្វេភាគី។
លោក Li ប្រធានគណៈកម្មាធិការអចិន្ត្រៃយ៍សភាប្រជាជនជាតិ (NPC) បានលើកឡើងដូច្នេះថា នៅពេលដែលប្រទេសចិន និងអ៊ូសបេគីស្ថានបន្តអភិវឌ្ឍភាពជាដៃគូយុទ្ធសាស្ត្រគ្រប់ជ្រុងជ្រោយរបស់ពួកគេ គួរតែត្រូវធ្វើបន្ថែមទៀតដើម្បីពង្រឹងទំនាក់ទំនងរវាងយុទ្ធសាស្ត្រអភិវឌ្ឍន៍រៀងៗខ្លួនរបស់ប្រទេសទាំងពីរ។
លោកបានកត់សម្គាល់ថា ការពង្រឹងទំនុកចិត្តគ្នាទៅវិញទៅមកផ្នែកនយោបាយ និងការពង្រឹងការគាំទ្រគ្នាទៅវិញទៅមកលើបញ្ហាទាក់ទងនឹងផលប្រយោជន៍ស្នូល និងកង្វល់សំខាន់ៗរបស់គ្នាទៅវិញទៅមកគឺជាការចាំបាច់សម្រាប់ការអភិវឌ្ឍទំនាក់ទំនងចិន-អ៊ូសបេគីស្ថាន។
លោក Li បានមានប្រសាសន៍ថា អ៊ូសបេគីស្ថានបានគាំទ្រយ៉ាងខ្ជាប់ខ្ជួននូវ ជំហររបស់ចិន លើបញ្ហាទាក់ទង នឹងកោះតៃវ៉ាន់ ហុងកុង ស៊ីនជាំង និងទីបេ ក៏ដូចជាក្នុងការប្រយុទ្ធប្រឆាំងនឹងចលនាអ៊ីស្លាម តួគីស្ថាន ខាងកើត ហើយប្រទេសចិនបានកោតសរសើរចំពោះរឿងនេះ។
លោកបានបន្ថែមថា ចិននឹងគាំទ្រយ៉ាងម៉ឺងម៉ាត់ អ៊ូសបេគីស្ថាន ក្នុងការបន្តដំណើរអភិវឌ្ឍន៍ដែលសមស្រប នឹងលក្ខខណ្ឌជាតិរបស់ខ្លួន និងក្នុងកិច្ចខិតខំប្រឹងប្រែងដើម្បីការពារអធិបតេយ្យភាពជាតិ ឯករាជ្យភាព និងបូរណភាពទឹកដី។
លោក Li បានមានប្រសាសន៍ថា ប្រទេសចិនបានត្រៀមខ្លួនជាស្រេច ក្នុងការធ្វើការ ជាមួយ ប្រទេសអ៊ូសបេគីស្ថាន ដើម្បីអនុវត្តគំនិតផ្តួចផ្តើមសន្តិសុខសកល ដើម្បីរួមគ្នាការពារសន្តិសុខ និងស្ថិរភាពក្នុងតំបន់។
លោកបានមានប្រសាសនថា ប្រទេសចិនក៏កោតសរសើរចំពោះការគាំទ្រ របស់អ៊ូសបេគីស្ថាន សម្រាប់គំនិតផ្តួចផ្តើមអភិវឌ្ឍន៍សកល ហើយទន្ទឹងរង់ចាំធ្វើការជាមួយអ៊ូសបេគីស្ថាន និងសហគមន៍ អន្តរជាតិ ដើម្បីអនុវត្តលទ្ធផលនៃ កិច្ចសន្ទនាកម្រិតខ្ពស់ស្តីពីការអភិវឌ្ឍន៍សកលដែលបានធ្វើឡើងនៅថ្ងៃទី២៤ ខែមិថុនា។
លោក Li បាននិយាយថា NPC លើកទឹកចិត្តឱ្យមានការផ្លាស់ប្តូរ និងការរៀនសូត្រទៅវិញទៅ មកជាមួយ ព្រឹទ្ធសភានៃប្រទេសអ៊ូសបេគីស្ថានគ្រប់កម្រិត ដោយមានគោលបំណងជួយសម្រួល ដល់បរិយាកាស ផ្លូវច្បាប់ដោយយុត្តិធម៌ និងតម្លាភាពសម្រាប់កិច្ចសហប្រតិបត្តិការរវាងប្រទេសទាំងពីរ។
លោក Narbayeva បាននិយាយថា Uzbekistan ប្រកាន់ខ្ជាប់យ៉ាងខ្ជាប់ខ្ជួននូវគោលការណ៍ចិនតែមួយ ហើយ ព្រឹទ្ធសភា បានត្រៀមខ្លួនជាស្រេចក្នុងការពង្រឹងការផ្លាស់ប្តូរមិត្តភាពជាមួយ NPC និងខិតខំប្រឹងប្រែង ឥតឈប់ឈ រដើម្បីលើកកម្ពស់កិច្ចសហប្រតិបត្តិការទ្វេភាគីលើគ្រប់វិស័យ និងការពារសន្តិភាព និងស្ថិរភាព ក្នុងតំបន់។
