ឧត្តមសេនីយ៍ទោ ហ៊ុន គឹមជាតិ ដឹកនាំកិច្ចប្រជុំបូកសរុបរបាយការណ៍ប្រចាំខែមករា-កុម្ភៈ ឆ្នាំ២០២៦ របស់មន្ទីរប្រឆាំងបទល្មើសគ្រឿងញៀន

ភំ្នពេញ ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃទី៣ ខែមីនា ឆ្នាំ២០២៦ នេះ ឯកឧត្តម ឧត្តមសេនីយ៍ទោ ហ៊ុន គឹមជាតិ ប្រធាននាយកដ្ឋានកណ្តាលនគរបាលយុត្តិធម៌ បានអញ្ជើញដឹកនាំកិច្ចប្រជុំបូកសរុបរបាយការណ៍ប្រចាំខែមករា-កុម្ភៈ របស់មន្ទីរប្រឆាំងបទល្មើសគ្រឿងញៀន នៅអគ្គស្នងការដ្ឋាននគរបាលជាតិ។
កិច្ចប្រជុំនេះ មានការអញ្ជើញចូលរួមពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន លោកឧត្តមសេនីយ៍ វរសេនីយ៍ នាយករងមន្ទីរ លោកនាយការិយាល័យទាំង១១ និងស្នងការរងនគរបាលផែនការងារជំនាញប្រឆាំងគ្រឿងញៀនរាជធានី-ខេត្តទាំង២៥ តាមប្រព័ន្ធ ZOOM។

ឯកឧត្តម ឧត្តមសេនីយ៍ទោ ហ៊ុន គឹមជាតិ បានលើកឡើងថា កិច្ចប្រជុំសំខាន់ផ្តោតទៅលើពង្រឹងការស៊ើបអង្កេតបទល្មើសគ្រឿងញៀន និការបញ្ចូលទិន្នន័យទៅក្នុងប្រព័ន្ធ (Database System) ការអនុវត្ត-ការគ្រប់គ្រងការអនុវត្តដីកា និងការសម្អាតប្រាក់ ខណៈរបាយការណ៍ប្រចាំខែមករា-កុម្ភៈ ឆ្នាំ២០២៦នេះ នៅពុំទាន់មានសញ្ញាថមថយនៅឡើយ។ ឯកឧត្តម ឧត្តមសេនីយ៍ទោ បន្តថា រាជរដ្ឋាភិបាលអាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចាត់ទុកការងារប្រយុទ្ធប្រឆាំងគ្រឿងញៀនជាកិច្ចការអាទិភាពមួយ និងបានដាក់បញ្ចូលការងារនេះទៅក្នុងមុំមួយ នៃយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ព្រមទាំងបានដាក់ចេញនូវគោលការណ៍ស្តីពី «សម្អាត ផ្ទះយើង និងសម្អាតចក ចេញពីផ្ទៃបឹង» ដោយបានដាក់ចេញនូវបទបញ្ជាលេខ០១បប ស្តីពីការដាក់ចេញនូវវិធានការហ្មឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ អនុវត្តផងដែរ។ មួយវិញទៀត លទ្ធផលកិច្ចប្រតិបត្តិការស៊ើបអង្កេត និងបង្រ្កាបការប្រើប្រាស់ លួចលាក់កែច្នៃ ជួញដូរ នូវសារធាតុញៀន ក៏ត្រូវបានធ្វើការបង្ក្រាបយ៉ាងសកម្មផុសផុលផងដែរ។

ដើម្បីពង្រឹងការគ្រប់គ្រងស៊ើបអង្កេត និងបង្រ្កាបឲ្យមានប្រសិទ្ធភាពបន្ថែមទៀត ឯកឧត្តម ឧត្តមសេនីយ៍ទោ ហ៊ុន គឹមជាតិ ប្រធាននាយកដ្ឋានកណ្តាលនគរបាលយុត្តិធម៌ បានដាក់ទិសដៅសម្រាប់យកទៅអនុវត្តបន្តរួមមាន ៖
១-បន្តពង្រឹងការស្រាវជ្រាវស៊ើបអង្កេតបទល្មើសគ្រឿងញៀន
២-ត្រូវកសាងកម្លាំង និងប្រមូលព័ត៌មានពីមូលដ្ឋាន
៣-ត្រូវមានកិច្ចសហការល្អជាមួយស្នងការដ្ឋាននគរបាលរាជធានី-ខេត្ត
៤-ត្រូវល្បាតតាមទីតាំងប្រមូលផ្តុំ ពិសេសទីកន្លែងក្លឹបកម្សាន្ត សណ្ឋាគារ ផ្ទះសំណាក់ និងតាមទីសួនច្បារសាធារណៈ នានាដែលជាកន្លែងយុវវ័យប្រមូលផ្តុំគ្នា៕