ឯកឧត្តម ហ៊ុន ម៉ានី ជួបពិភាក្សាការងារជាមួយ គណៈប្រតិភូតំណាងបណ្តាប្រទេសផ្តល់ជំនួយសំខាន់ៗ ប្រចាំ UN ក្នុងអំឡុងពេលទស្សនកិច្ចនៅកម្ពុជា

ភ្នំពេញ៖ ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភាកម្ពុជា នារសៀលថ្ងៃទី៦ ខែកក្កដា ឆ្នាំ២០២២ បានទទួលជួបពិភាក្សាការងារជាមួយគណៈប្រតិភូតំណាងបណ្តាប្រទេសផ្តល់ជំនួយសំខាន់ៗ ប្រចាំនៅអង្គការសហប្រជាជាតិ ទទួលបន្ទុកអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។

កិច្ចពិភាក្សានាពេលនេះ ផ្តោតលើផលប៉ះពាល់និងកេរដំណែលរ បស់អង្គជំនុំជម្រះវិសាមញ្ញក្នុងតុលាការកម្ពុជា និងចង់ដឹងអំពីទស្សនៈវិស័យរបស់ ឯកឧត្តម ហ៊ុន ម៉ានី ក្នុងនាមជាតំណាងរាស្ត្រ និងជាប្រធានគណៈកម្មការជំនាញដែលជាអ្នកបោះឆ្នោតគាំទ្រលើ «ច្បាប់ស្តីពីការអនុម័តយល់ព្រមកិច្ចព្រមព្រៀងបន្ថែមទៅលើកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិទាក់ទងទៅនឹងការកាត់សេចក្តីនៅក្រោមច្បាប់កម្ពុជានូវឧក្រិដ្ឋកម្ម ដែលប្រព្រឹត្តឡើងនៅក្នុងរយៈកាលនៃកម្ពុជាប្រជាធិបតេយ្យ ស្តីពីការរៀបចំក្នុងពេលអន្តរកាល និងការបញ្ចប់ការងាររបស់អង្គជំនុំជម្រះវិសាមញ្ញ» ដែលបានចូលជាធរមានកាលពីថ្ងៃទី២២ ខែធ្នូ ឆ្នាំ២០២១ និងគ្រោងនឹងចាប់ផ្តើមអនុវត្តចាប់ពីដើមឆ្នាំ២០២៣ ដល់ឆ្នាំ២០២៥។

កិច្ចពិភាក្សាការងារខាងលើ គឺនៅក្នុងអំឡុងពេលទស្សនកិច្ច នៅកម្ពុជា ចាប់ពីថ្ងៃទី៤ ដល់ថ្ងៃទី៨ ខែកក្កដា ឆ្នាំ២០២២ របស់គណៈប្រតិភូតំណាងក្រុមបណ្តាប្រទេសផ្តល់ជំនួយសំខាន់ៗចំនួន១០ប្រទេស៖ អូស្ត្រាលី សហភាពអឺរ៉ុប បារាំង អាល្លឺម៉ង់ ជប៉ុន ណ័រវេស ស៊ុយអ៊ែដ កូរ៉េខាងត្បូង អង់គ្លេស និងសហរដ្ឋអាម៉េរិក។