សម្តេចតេជោ៖ យើងមានប្រជាជនខ្មែរប្រមាណ ១៧លាននាក់ នឹងចូលរួមប្រកួតជាស្មារតី ហើយដែលតែងតែនៅជាមួយគ្នា ដើម្បីលើកទឹកចិត្តកីឡាករ កីឡាការិនីខ្មែរគ្រប់ៗរូប

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី៦ ខែកក្កដា ឆ្នាំ២០២២ បានអនុញាតិឲ្យប្រតិភូកីឡាប៉ារ៉ាឡាំពិកកម្ពុជា បានចូលជួបសំណេះសំណាល នៅវិមានសន្តិភាព មុនពេលដែលប្រតិភូកីឡាត្រូវចេញដំណើរដើម្បីចូលរួមប្រកួត កីឡាប៉ារ៉ាហ្គេមលើកទី១១ នៅប្រទេសឥណ្ឌូនេស៊ី ចាប់ពីថ្ងៃទី៣០ ខែកក្កដា ដល់ថ្ងៃទី៦ ខែសីហា ឆ្នាំ២០២២។

ក្នុងជំនួបនេះ សម្តេចតេជោនាយករដ្ឋមន្ត្រីបានមានប្រសាសន៍លើកទឹកចិត្តដល់កីឡាករ កីឡាការិនីដែលជាជនពិការថា សម្តេចក៏ជាជនពិការម្នាក់ដែរ តែសម្តេចអាចបំពេញតួនាទីភារកិច្ចជានាយករដ្ឋមន្ត្រីបាន ដូច្នេះកីឡាករ កីឡាការិនីដែលជាជនពិការដូចគ្នាត្រូវតែមានទឹកចិត្តពុះពារ ខំប្រឹងហ្វឹកហាត់ធ្វើយ៉ាងណាប្តេជ្ញាជ្រោងទង់ជាតិនៃព្រះរាជាណាចក្រកម្ពុជាឲ្យបានកាន់តែខ្ពស់ត្រដែត ក្នុងនាមជាជាតិសាសន៍មួយ ហើយពាក់ទង់ជាតិព្រះរាជាណាចក្រកម្ពុជា នៅលើឆាកអន្តរជាតិ។

លើសពីនេះទៅទៀតនោះ សម្តេចតេជោក៏បានបញ្ជាក់ជូនចំពោះប្រតិភូកីឡាប៉ារ៉ាឡាំពិកកម្ពុជា ផងដែរថា រាល់ការចេញទៅប្រកួតនេះ យើងមិនមែនមានតែកីឡាករ កីឡាការិនី នោះទេ គឺមានសម្តេចដែលជាប្រធានកីឡាប៉ារ៉ាឡាំពិកកម្ពុជា ហើយយើងនៅមានប្រជាជនខ្មែរប្រមាណ១៧លាននាក់ទៀត ដែលនឹងចូលរួមប្រកួតជាស្មារតី ហើយដែលតែងតែនៅជាមួយគ្នា ដើម្បីលើកទឹកចិត្តកីឡាករ កីឡាការិនីខ្មែរគ្រប់ៗរូប។

ឆ្លៀតក្នុងឱកាសនេះ ឯកឧត្ដម ហ៊ុន ម៉ានី ក៏បានគោរព ថ្លែងអំណរគុណយ៉ាងជ្រាលជ្រៅ ចំពោះសម្តេចតេជោ នាយករដ្ឋមន្ត្រី ដែលបានអនុញាតិ ក៏ដូចជាផ្តល់សេចក្តីទុកចិត្ត ដល់ឯកឧត្ដម ក្នុងភាពជាតំណាងដ៏ខ្ពស់ខ្ពស់ របស់សម្តេចតេជោនាយករដ្ឋមន្ត្រី ដើម្បីដឹកនាំប្រតិភូកីឡាប៉ារ៉ាឡាំពិកកម្ពុជា ចូលរួមប្រកួតក្នុង ព្រឹត្តិការណ៍កីឡាប៉ារ៉ាហ្គេមលើកទី១១ នៅប្រទេសឥណ្ឌូនេស៊ី ៕