នាយឧត្តមសេនីយ៍ សែម សុវណ្ណនី អនុញ្ញាតឲ្យ អគ្គស្ថានកុងស៊ុលកម្ពុជា ប្រចាំលីបង់ ជួបពិភាគ្សាការងារ ពីកិច្ចសហប្រតិបត្តិការ រក្សាសន្តិភាពរបស់ UN
ភ្នំពេញ៖ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ អគ្គនាយកមជ្ឈមណ្ឌលជាតិរក្សាសន្តិភាព នៅថ្ងៃទី៦ ខែកក្កដា ឆ្នាំ២០២២ បានអនុញ្ញាតអោយឯកឧត្តម Kamal Agostine អគ្គស្ថានកុងស៊ុលនៃ ព្រះរាជាណាចក្រកម្ពុជា ប្រចាំនៅសាធារណរដ្ឋលីបង់ ចូលជួបសវនាការសម្តែងការគួរសម និងពិភាគ្សាការងារ ស្តីពីកិច្ចសហប្រតិបត្តិការ រក្សាសន្តិភាពរបស់អង្គការសហប្រជាជាតិ នៅមជ្ឈមណ្ឌលជាតិ ។
ឯកឧត្តម Kamal Agostine អគ្គស្ថានកុងស៊ុលនៃព្រះរាជាណាចក្រកម្ពុជា ប្រចាំនៅសាធារណរដ្ឋលីបង់ បានកោតសរសើរ និងវាយតម្លៃខ្ពស់ចំពោះ កងទ័ពមួកខៀវកម្ពុជា ដែលទទួលបាននូវលទ្ធផលល្អប្រសើរ ក្នុងប្រតិបត្តិការរក្សាសន្តិភាព បោសសម្អាតមីននៅកម្ពុជា និងការចូលរួមប្រតិបត្តិការរក្សាសន្តិភាព របស់អង្គការសហប្រជាជាតិ លើបណ្តាប្រទេសមួយចំនួន ដែលមានជម្លោះដោយសារសង្គ្រាម ជាពិសេសប្រតិបត្តិការរក្សាសន្តិភាព នៅសាធារណរដ្ឋលីបង់ ហើយឯកឧត្តម នឹងបន្តគាំទ្រ និងជួយសម្របសម្រួលដល់កងទ័ពមួកខៀវបន្តទៀត ៕
