អគ្គាធិការដ្ឋាន ក្រសួងមហាផ្ទៃ ប្រជុំត្រួតពិនិត្យវឌ្ឍនភាពការងារ នូវបញ្ហាប្រឈម និងសំណូមពររបស់នាយកដ្ឋានចំណុះ

ភ្នំពេញ៖ ឯកឧត្តម អ៊ីវ លាង អគ្គាធិការ នៃអគ្គាធិការដ្ឋាន ក្រសួងមហាផ្ទៃ នារសៀលថ្ងៃទី០៥ ខែកក្កដា ឆ្នាំ២០២២ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារ នូវបញ្ហាប្រឈម និងសំណូមពររបស់នាយកដ្ឋានទាំង៦ ចំណុះអគ្គាធិការដ្ឋាន ដោយមានការចូលរួមពី អគ្គាធិការរងទទួលបន្ទុកនាយកដ្ឋាន ប្រធាននាយកដ្ឋាន និងប្រធាន-នាយការិយាល័យទាំងអស់។

បន្ទាប់ពីប្រធាននាយកដ្ឋាន និងអគ្គាធិការរង បានធ្វើសេចក្តីរាយការណ៍សង្ខេបពីវឌ្ឍនភាពការងារ និងបញ្ហាប្រឈម សំណូមពររួចមក ឯកឧត្តម អ៊ីវ លាង បានកោតសរសើរចំពោះនាយកដ្ឋានចំនួន៣ ពីវឌ្ឍនភាពការងារ។ ចំពោះការបណ្តុះបណ្តាលនៅកន្លែងការងារ ដោយអ្នកចេះច្រើនបង្រៀនអ្នកមិនចេះ ឯកឧត្តម អគ្គាធិការ ក៏បានមានមតិគាំទ្រ និងសូមបន្តអនុវត្តបែបនេះទៅទៀត។

បន្ថែមពីនេះ ឯកឧត្តម អគ្គាធិការ បានជំរុញចាប់ពីប្រធាននាយកដ្ឋានចុះ ត្រូវចេះប្រើប្រាស់កុំព្យូទ័រ ជាពិសេសកម្មវិធី Word និងExcel ហើយក៏ត្រូវពិនិត្យមន្ត្រីមិនចេះកុំព្យូរទ័រ ត្រូវជំរុញគាត់ បើចាំបាច់ សូមលើកសំណើដើម្បីចាត់បញ្ជូនទៅរៀនតែម្តង និងសូមកុំប្រកាន់ការងារ ហើយចាប់កំហុសគ្នា ឬមានអចេតនាអាក្រក់ណាមួយចំពោះគ្នា ឬថ្នាក់ដឹកនាំខ្លួន ដោយត្រូវធ្វើការជាប្រព័ន្ធ និងចេះបំពេញភាពខ្វះខាតឱ្យគ្នា។

ឯកឧត្តម បានបន្ថែមថា សម្រាប់វគ្គបណ្តុះបណ្តាលវិញ សូមប្រធាននាយកដ្ឋានសហការជាមួយ អគ្គាធិការរងទទួលបន្ទុក ត្រូវពិនិត្យថា តម្រូវការវគ្គបណ្តុះបណ្តាលអីខ្លះ ហើយការបណ្តុះបណ្តាលនេះទៀតសោត មានការយកចិត្តទុក និងមានការជំរុញពីថ្នាក់ដឹកនាំក្រសួង ជាពិសេស សម្តេចក្រឡាហោម ស ខេង ឧបនាយករដ្ឋមន្ដ្រី ក្រសួងមហាផ្ទៃ តែងតែចង្អុលបង្ហាញ និងលើកទឹកចិត្ត ដើម្បីបង្កើនសមត្ថភាពរបស់មន្ត្រី និងប្រសិទ្ធភាពការងារតាមអង្គភាព។

ឆ្លៀតឱកាសនោះ ឯកឧត្តម អគ្គាធិការ បានណែនាំអគ្គាធិការរង ប្រធាននាយកដ្ឋាន ជាពិសេសនាយការិយាល័យជាមន្ត្រីជំនាញ រាល់របាយការណ៍បំភ្លឺពីអង្គភាពពាក់ព័ន្ធ មកក្រសួងមហាផ្ទៃ ត្រូវពិនិត្យវិភាគខ្លឹមសារឱ្យបានគ្រប់ជ្រុងជ្រោយ ឱ្យបានម៉ត់ចត់ មិនមែនចេះតែផ្អែកតាមការបំភ្លឺរបស់អង្គភាពពាក់ព័ន្ធនោះទេ បើក្នុងករណីការបំភ្លឺមកមិនសមស្រប អាចលើកយោបល់ថា តើគួរចុះអង្កេតជាក់ស្តែង ឬក្រើនរំលឹកឱ្យបំភ្លឺម្តងទៀត៕