មេបញ្ជាការតំបន់ប្រតិបត្តិការសឹករងកំពង់ធំ ពង្រឹងវិធានការការពារ ទប់ស្កាត់ការឆ្លងជំងឺកូវីដ-១៩
ភ្នំពេញ៖ អនុវត្តតាមប្រសាសន៍ណែនាំដ៏ខ្ពង់ខ្ពស់ របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងការពង្រឹងវិធានការការពារទប់ស្កាត់ការឆ្លងជំងឺកូវីដ-១៩ជាថ្មីទៀត នៅព្រឹកថ្ងៃទី៤ ខែកក្កដា ឆ្នាំ២០២២ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានផ្សព្វផ្សាយវិធាន ការការពារទប់ស្កាត់ការឆ្លងជំងឺកូវីដ-១៩ ជាថ្មី ជូនដល់កងកម្លាំងចំណុះទីបញ្ជាការតំបន់ប្រតិបត្តិការសឹករងកំពង់ធំ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ ។
ឧត្តមសេនីយ៍ទោ សោម ស៊ុន បានមានប្រសាសន៍ថា បន្ទាប់ពីរយៈពេលជិត២ខែកន្លងមក គ្មានអ្នកឆ្លងជំងឺ កូវីដ-១៩នៅក្នុងព្រះរាជាណាចក្រកម្ពុជាយើងទេ តែបច្ចុប្បន្ននេះយើងសង្កេតឃើញមានករណីឆ្លងប្រចាំថ្ងៃមាន ចំនួនតិចតួច ដោយការនាំចូល និងនៅក្នុងសហគមន៍ជាថ្មីទៀតនៅតាមកន្លែងមួយចំនួន នៅក្នុងប្រទេសកម្ពុជាយើង ។
ឧត្តមសេនីយ៍ទោ សោម ស៊ុន បានអំពាវនាវដល់យោធិនគ្រប់រូបនឹងក្រុមគ្រួសារ ត្រូវបន្តការប្រុងប្រយ័ត្នការពារ ទប់ស្កាត់ការឆ្លងជំងឺកូវីដ-១៩ ដោយអនុវត្តឲ្យបានត្រឹមត្រូវតាមវិធានការរបស់ក្រសួងសុខាភិបាល និងវិធានការ ៣ការពារ និង៣កុំ របស់សម្ដេចតេជោ ហ៊ុន សែន ឲ្យបានខ្ជាប់ខ្ជួន ព្រមជាមួយនោះយោធិនគ្រប់រូបនិងក្រុមគ្រួសារ ត្រូវ បន្តអំពាវនាវដល់ប្រជាពលរដ្ឋនៅជិតតំបន់បោះទ័ព ឱ្យគាត់បានអញ្ជើញទៅចាក់វ៉ាក់សាំងការពារជំងឺកូវីដ-១៩ ដូសទី៣ ដូសទី៤ ដែលជាដូសជំរុញឲ្យបានគ្រប់ៗគ្នា ដើម្បីធ្វើឲ្យប្រទេសជាតិយើង បន្តបើកដំណើរការប្រក្រតីភាពឡើងវិញ លើគ្រប់វិស័យ រួមចំណែកធ្វើឲ្យកំណើនសេដ្ឋកិច្ចជាតិនិងសេដ្ឋកិច្ចគ្រួសារឲ្យកាន់តែប្រសើរឡើង ៕
