ប្រធានរដ្ឋសភា ប្រគល់ម៉ាសការពារសារធាតុពុលជូនតំណាងក្រសួងការពារជាតិ សម្រាប់ចែកជូនវីរកងទ័ពនៅសមរភូមិមុខ

ភ្នំពេញ៖ ក្រោយពីទទួលបានម៉ាសការពារសារធាតុពុល ពីសមាជិកសមាជិការដ្ឋសភានិងសប្បុរសជននានា នៅព្រឹកថ្ងៃទី ១៥ ខែធ្នូ ឆ្នាំ២០២៥នេះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានប្រគល់ម៉ាសទំាងអស់នេះជូនតំណាងក្រសួងការពារជាតិ សម្រាប់ធ្វើការបែងចែកជូនវីរកងទ័ពកម្ពុជា នៅតាមសមរភូមិមុខ ដែលកំពុងតតំាងយ៉ាងអង់អាចក្លាហានប្រឆំាងការឈ្លានពានរបស់ថៃ មកលើធិបតេយ្យរបស់កម្ពុជាទំាងកំរោលនិងឃោរឃៅជាទីបំផុត ដោយបានរំលោភច្បាប់អន្តរជាតិ បង្កអសន្តិសុខក្នុងតំបន់និងសកលលោក។

ម៉ាសការពារសារធាតុពុល ដែលសម្តេចប្រធានរដ្ឋសភា ប្រគល់ជូនតំណាងក្រសួងការពារជាតិនាពេលនេះ មានចំនួន៥ពាន់។ កន្លងមកសម្តេចប្រធានរដ្ឋសភា បានទទួលជំនួយជាម៉ាសការពារសារធាតុពុលនេះ ពី គណៈកម្មការទី៨ នៃរដ្ឋសភានិងពីឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែននៃរដ្ឋសភា និងលោកជំទាវ ផងដែរ។

ម៉ាសការពារសារធាតុពុលទាំងនេះ ពិតជាមានសារៈសំខាន់និងឆ្លើយតបតម្រូវការជាក់ស្តែង។ ដ្បិតអីនៅក្នុងការឈ្លានពានមកលើអធិបតេយ្យកម្ពុជាកម្ពុជានាពេលនេះ ថៃបានប្រើប្រាស់សព្វាវុធធុនធ្ងន់ ព្រមទំាងផ្សែងពុលយ៉ាងព្រៃផ្សៃ មកលើវីរកងទ័ពនិងពលរដ្ឋស៊ីវិលរបស់កម្ពុជា។

ឆ្លៀតនៅក្នុងឱកាសនេះដែរ សម្តេចប្រធានរដ្ឋសភា បានគោរពថ្លែងអំណរគុណយ៉ាងជ្រាលជ្រៅ ជូនវីរកងទ័ពទំាងអស់ ដែលបានខិតខំតស៊ូស្វិតស្វាញ ក្រាញននៀល ប្រយុទ្ធប្រឆំាងនឹងការឈ្លានពានរបស់ថៃមកលើអធិបតេយ្យកម្ពុជាដោយគោរពតាមបទបញ្ជាយ៉ាងម៉ឹងម៉ាត់របស់ថ្នាក់ដឹកនាំ មិនចុះញ៉មនឹងខ្មាំងសត្រូវឡើយ។ វីរភាពដ៏អង់អាចក្លាហានរបស់យុទ្ធជនក្នុងសមរភូមិមុខ បានជំរុញឱ្យមានកម្លំាងសាមគ្គីជាតិយ៉ាងរឹងមាំឈរពីក្រោយ លើកទឹកចិត្តនិងឧបត្ថម្ភគំាទ្រជានិច្ច។

ថ្នាក់ដឹកនាំរដ្ឋសភា និងអគ្គលេខាធិការដ្ឋានរដ្ឋសភា នៅបន្តទទួលបានជំនួយឧបត្ថម្ភជាបន្តបន្ទាប់ និងធ្វើការបែងចែកអំណោយទំាងអស់នោះ ជូនសមរភូមិជួរមុខបន្តទៀត ឆ្លើយតបការអំពាវនាវនិងការយកចិត្តទុកដាក់ជាខ្លំាងបំផុត ចំពោះវីរកងទ័ពនិងពលរដ្ឋ ពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាប្រឆាំងនឹងសត្រូវឈ្លានពាន ប្រកបដោយស្មារតី ស្នេហាជាតិមាតុភូមិ៕