ចុងសប្តាហ៍ហើយ! តោះជិះឡូរីជើងភ្នំបាណន់មើលទេសភាព និងថតរូបស្អាតៗ

ភ្នំពេញ៖ មណ្ឌលកំសាន្តឡូរីជើងភ្នំបាណន់ មានទីតាំងស្ថិតនៅ ភូមិអន្លក់កោង ឃុំឈើទាល ស្រុកបាណន់ ខេត្តបាត់ដំបង ស្ថិតនៅភាគខាងត្បូងនៃទីរួមខេត្តបាត់ដំបង ជាប់នឹងជើងភ្នំបាណន់ ចម្ងាយប្រមាណ២៥គីឡូម៉ែត្រ ។

ភ្ញៀវទេសចរដែលធ្វើដំណើរកំសាន្តទៅទស្សនាប្រាសាទភ្នំបាណន់ គឺតែងតែចំណាយពេលជិះឡូរីលេងកំសាន្តដើម្បី មើលទេសភាព ព្រៃភ្នំ វាលស្រែ ដំណាំកសិផល របស់អ្នកស្រុក និងរូបភាពស្អាត ដែលតុបតែង ប្រកបដោយភាពច្នៃប្រឌិត។ នៅក្នុងបរិវេណ មានលក់ផលិតផល និងមានបម្រើសេវាកម្មសំបូរបែបជាច្រើន ដូចជា៖ ភោជនីយដ្ឋាន ម៉ាត់លក់ផលិតផល កាហ្វេអាម៉ាហ្សូន តូបលក់វត្ថុអនុស្សាវរីយ៍ និងផ្លែឈើក្នុងតំបន់ និងមានបន្ទប់ទឹកស្អាត ធំទូលាយផងដែរ។

ភ្ញៀវទេសចរនឹងទទួលបានអារម្មណ៍រីករាយស្រស់ស្រាយ តាមរយៈការជិះឡូរីទស្សនាទេសភាពធម្មជាតិ មានទាំងដើមឈើតូចធំដុះរៀងគ្នាជាហូរហែ មានភ្នំធម្មជាតិ ប្រាសាទសិលា ល្អាងភ្នំ និងដំណាំកសិកម្មរបស់ប្រជាកសិករ បង្កើតបានជាពណ៏បៃតងខ្ចីនារដូវវស្សា និងពណ៏មាសនារដូវប្រាំង បង្កើតបានជាមន្តស្នេហ៍ទាកទាញភ្ញៀវទេសចរជាតិ និងអន្តរជាតិរាប់រយនាក់ក្នុងមួយថ្ងៃៗ ភ្ញៀវទេសចរទាំងអស់ តែងតែលាន់មាត់សរសើរ ដល់គំនិតច្នៃប្រឌិត និងស្នាដៃក្នុងការបង្កើតឡូរីនេះ៕

ប្រភព: មន្ទីរទេសចរណ៍ខេត្តបាត់ដំបង