កាកបាទក្រហមកម្ពុជាបំពាក់ឯកសណ្ឋានដល់យុវជន១៥០នាក់ មកពីអនុវិទ្យាល័យ និង វិទ្យាល័យ នៅខេត្តសៀមរាប

យុវសិស្ស ចំនួន ១៥០នាក់ មកពីអនុវិទ្យាល័យ និង វិទ្យាល័យ ក្នុងស្រុកចំនួន៣ គឺស្រុកពួក, ស្រុកក្រឡាញ់ និង ស្រុកស្រីស្នំ បានរៀបចំពិធីបំពាក់កន្សែងយុវជនកាកបាទក្រហមកម្ពុជា កាលពីពម្សិលមិញ នៅអនុវិទ្យាល័យកំពង់ថ្កូវ ស្រុកក្រឡាញ់ ។

លោកស្រី ម៉ននី រងី្ស ប្រធានអនុសាខាកាកបាទក្រហមកម្ពុជាស្រុកក្រឡាញ់ បានលើកឡើង អំពីសកម្មភាពលទ្ធផលការងារដែលក្រុមយុវជនកាកបាទក្រហមកម្ពុជាស្រុក បានអនុវត្តកន្លងមកគួរឲ្យកត់សម្គាល់ សំខាន់ក្នុងពេលប្រទេសជួបនូវវិបត្តិជម្ងឺកូវីដ-១៩។ ក្មួយៗបានចូលរួមយ៉ាងសកម្ម ក្នុងយុទ្ធនាការប្រយុទ្ធប្រឆាំងជម្ងឺកូវីដ-១៩ លើសកម្មភាពចែកស្បៀងអាហារដល់គ្រួសារក្រីក្រ ដែលជួបការខ្វះខាតក្នុងវិបត្តិកូវីដ-១៩ នៅក្នុងតំបន់បិទខ្ទប់តាមមូលដ្ឋានមួយចំនួន និង ចូលរួមធ្វើការផ្សព្វផ្សាយអប់រំ ដល់មិត្តរួមសាលា និងប្រជាពលរដ្ឋក្នុងមូលដ្ឋាន ដោយផ្តោតលើវិធានការការពារជម្ងឺកូវីដ-១៩ ( ៣កុំ ៣ការពារ) និងការគោរពច្បាប់ចរាចរណ៍ រួមទាំងគ្រឿងញៀងទៀតផង ។

លោកជំទាវ សុខ ណារ៉ូ បានលើកឡើងថា សាខាកាកបាទក្រហមកម្ពុជាខេត្ត បានរៀបចំពិធីនេះឡើង ដោយបានចាត់ទុកយុវជនជាធនធានគន្លឹះ និងមានតម្លៃបំផុត សម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព ដែលនៅគ្រប់សម័យកាលគ្រប់សង្គម យុវជនជាកម្លាំងស្រួច ពោរពេញដោយកម្លាំងកាយ-កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ និងការលំបាកនានា ពិសេសយុវជន គឺជាសសរទ្រូងរបស់ប្រទេសជាតិទាំងនៅពេលបច្ចុប្បន្ន និងទៅអនាគត ។

ជាមួយគ្នានេះដែរ កាកបាទក្រហមកម្ពុជា បានទទួលស្គាល់ថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មានសារ:សំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា” និង “យុវជនជាភ្នាក់ងារ នៃការផ្លាស់ប្តូរឥរិយាបទក្នុងសង្គម”។ លោកជំទាវក៏បានលើកសរសើផងដែរ ចំពោះក្មួយៗយុវជនកាកបាទក្រហមកម្ពុជា នៅតាមគ្រឹះស្ថានសិក្សា ក្នុងការចូលរួមយ៉ាងសកម្មក្នុងការងារសង្គម ជាពិសេសក្នុងពេលដែលខេត្តសៀមរាប ជួបនូវវិបត្តិជម្ងឺកូវីដ-១៩ ដោយតំបន់មួយចំនួនត្រូវបានបិទខ្ទប់ ក្មួយៗបានដឹកនាំយក នូវស្បៀងអាហារ ដើមី្បផ្គត់ផ្គង់ដល់បងប្អូនប្រជាពលរដ្ឋជួបការខ្វះខាត ព្រមទាំងការងារគ្រោះមហន្តរាយទៀតផង។

ក្នុងនោះលោកជំទាវ សុខ ណារ៉ូ ក៏បានលើកអំពីតួនាទី ភារកិច្ចដល់ប្អូនៗ ក្នុងការចូលរួមការងារសង្គម ក្នុងនាមតំណាងឲ្យយុវជនកាកបាទក្រហមកម្ពុជា គ្រប់ស្រទាប់យុវវ័យ និងជាទំពាំងស្នងឫស្សី ជាអ្នកបន្តវេន ក្នុងសកម្មភាពមនុស្សធម៌ ត្រូវគោរពវិន័យសាលា និងខិតខំរៀនសូត្រឲ្យបានពូកែ ធ្វើជាគំរូល្អគ្រប់សម្មភាពក្នុងស្រទាប់យុវវ័យ ក្លាយជាកូនល្អ សិស្សល្អ មិត្តល្អ និងពលរដ្ឋល្អ ក្នុងសង្គម ព្រមទាំងចូលរួម ក្នុងការផ្សព្វផ្សាពីគោលការណ៍គ្រឹះរបស់ចលនាអន្តរជាតិកាកបាទក្រហមអឌ្ឍចន្ទក្រហម នៅក្នុងសាលា និងសហគមន៍ ក្នុងសកម្មភាពមនុស្សធម៌ទាំងក្នុងសាលា និងសហគមន៍របស់ខ្លួន ។

លោកជំទាវ ក៏បានផ្តាំផ្ញើដល់ក្មួយៗ ទាំងអស់ ត្រូវប្រកាន់ភ្ជាប់នូវគោលការណ៍របស់កាកបាទក្រហមកម្ពុជា និងគោរពឲ្យបានវិធានការ ៣កុំ ៣ការពាររបស់រាជរដ្ឋាភិបាល បច្ចុប្បន្ននេះកម្ពុជាយើង ចាប់ផ្តើមរលកថ្មី នៃការឆ្លងជម្ងឺកូវីដ (ប្រភេទថ្មី ) និងចូលរួមផ្សព្វផ្សាយជម្រុញដល់បងប្អូនប្រជាពលរដ្ឋ ដែលបានទទួលវ៉ាក់សាំងដូសមូលដ្ឋានហើយ ត្រូវបន្តចាក់វ៉ាក់សាំងដូសជម្រុញឲ្យបានគ្រប់ៗគ្នា សំខាន់ក្មួយៗ ក៏ត្រូវជៀសឲ្យឆ្ងាយពីគ្រឿងញៀន និងត្រូវចេះគោរពច្បាប់ចរាចរណ៍ ក្នុងពេលបើកបរផងដែរ៕